Nɔmbɛs 20 - EBƆRƐ BE KAWƆL

Kusɔ nɛ k wora Kadɛsh be asheŋ

¹ Kafɛ to be kufɔl juŋkparso to nɛ Israɛlebi na fo keshishɛrsawule nɛ baa tre Zin na nseŋ wora bumo be keeyi to ashi Kadɛsh. Ndoŋ nɛ Miriam wu nɛ b ta mo m puli.

² Nchu daa maŋ wɔ kakpa nɛ b wora bumo be keeyi to na, amoso basa na daŋ ba kulti Mosis nɛ Ɛɛrɔn nna n wɔtɔ

³ nseŋ fubel m bile asheŋ m malga ŋ gbiti Mosis ŋ kaŋɛ le: “Anyi nɛ an braana Israɛlebi ere kikɛ daŋ wu Enyɛnpe Ebɔrɛ be wajɛbu ere ase gba, k daa bɔ.

⁴ Manɛ nna nɛ fo bar anyi nɛ an be asɔbɔya keshishɛrsawule ere so nɛ fo ba mɔ?

⁵ Manɛ nna nɛ fo lara anyi Ijipt be kasawule so m ba lɛ kakpa lubi nɛ ajibi kikɛ maa wora ere? Aboyu nɛ figi be ndibi nɛ afeelebi nɛ a bee sɔr asɔrso nɛ baa tre greep na nɛ ndibi nɛ baa tre Pomegranates na kikɛ maŋ wɔ nfe. Nchu gba jalama anyi maŋ nya nɛ an nuu!”

⁶ Ndoŋ nna nɛ Mosis nɛ Ɛɛrɔn lar basa na kutɔ n ya gbir wajɛbu na be kabuna a kule Ebɔrɛ nɛ Enyɛnpe Ebɔrɛ be kemaŋkura lar bumo so.

⁷ Nɛ Enyɛnpe Ebɔrɛ kaŋɛ Mosis le:

⁸ “Ta kekpabi nɛ k wɔ ŋkre be deka na be anishito na, nɛ fo nɛ Ɛɛrɔn e tre basa na kikɛ n shɛr, nɛ fo yili bumo be anishito m malga n sa kefalta na nɛ nchu e shi kumo to n lar eleŋso nɛ basa na nɛ bumo be asɔbɔya kikɛ e nya nchu n nu.”

⁹ Ndoŋ nna nɛ Mosis bɛ kusɔ nɛ Enyɛnpe Ebɔrɛ kaŋɛ na so nseŋ ta mbe kekpabi na.

¹⁰ Nɛ mo nɛ Ɛɛrɔn shin nɛ basa na kikɛ shɛr kefalta na be anishito nɛ Mosis kaŋɛ bumo le: “Menyi basa nɛ men maa nu a sa kusɔ nɛ baa kaŋɛ menyi ere, men nu nfe! Menyee sha an ka shin nɛ nchu e lar kefalta ere to nna n sa menyi a?”

¹¹ Kumo be kaman nɛ Mosis maŋ mbe kekpabi so ŋ ŋmɛa kefalta na ale anyɔ. Epul to nɛ nchu lar kefalta na to eleŋso a wurge nɛ basa na nɛ bumo be asɔbɔya kikɛ nuu.

¹² Ama le nɛ Enyɛnpe Ebɔrɛ daŋ kaŋɛ Mosis nɛ Ɛɛrɔn: “Ŋkpal men ka maŋ yirda ma nseŋ kini keshin nɛ Israɛlebi na pin ma eleŋ so, men maaŋ juŋkpar bumo n yɔ kasawule nɛ n nase kɔnɔ fanɛ meeŋ sa bumo na so.”

¹³ Israɛlebi na daŋ fubel m bile asheŋ nna m malga ŋ gbiti Enyɛnpe Ebɔrɛ na, nɛ e ŋini bumo mbe kecheembiya be eleŋ nseŋ sa bumo nchu nɛ b nuu nseŋ nase kakpa na be ketre Mɛriba. Mɛriba be kifito e la kefubel m bile asheŋ.

¹⁴ Nɛ Mosis yili Kadɛsh n shuŋi mbɔ fanɛ b ya kaŋɛ Edɔm be ewura le: “Fo kurgepoana Israɛlebi e la anyi. Fo gbagba nyi awurfoŋ nɛ anyee ji

¹⁵ nɛ kananɛ an nananyɛnana daŋ yɔ Ijipt be kasawule so nɛ kananɛ an chena ndoŋ n chɛr nɛ Ijiptebi na daŋ tɔrɔ anyi ga.

¹⁶ Nɛ an shu ŋ ŋini Enyɛnpe Ebɔrɛ nɛ e nu anyi be kushu nseŋ shuŋi malaika nɛ e ba lara anyi ashi Ijipt be kasawule so. Naniere an fo kade nɛ baa tre Kadɛsh nɛ k wɔ fo kasawule be egbaŋ be ekar na.

¹⁷ Amoso jande, sa anyi ekpa nɛ an bɔla fo kasawule so n choŋ. Anyi maaŋ bɔla men be ndɔana ŋko men be asɔrso nɛ baa tre greep na be adɔ to. Anyi alɛ maaŋ nuu menyi be atirbu to be nchu. Anyeeŋ baŋ bɔla kegbembi so nna n nite a yɔ hale n ya baŋ menyi be kasawule so.”

¹⁸ Ndoŋ nna nɛ Edɔm be ewura na kaŋɛ le: “M maaŋ shin nɛ men bɔla ma efuli so n choŋ! Men baŋ bɔla ndoŋ anyeeŋ lar ŋ kɔ menyi kena.”

¹⁹ Nɛ Israɛlebi na kaŋɛ le: “Anyeeŋ baa nite kegbembi so a yɔ. Nɛ anyi be ekama ŋko kusɔbɔya kaŋ nuu menyi be nchu, anyeeŋ ka kumo be kukɔ. An baa sha nɛ an bɔla ndoŋ nna n choŋ nawule.”

²⁰ Nɛ Edɔmebi na malɛ naŋ kaŋɛ le: “Anyi maaŋ shuli!” Kede be kaman nɛ b keta bumo be benapo lempo n lar nɛ b ya kɔ Israɛlebi na kena.

²¹ Ŋkpal Edɔmebi na ka maŋ shuli fanɛ Israɛlebi na e bɔla bumo be efuli so n choŋ na so, Israɛlebi na daŋ kilgi nna m bɔla ekpa pɔtɛ.

Ɛɛrɔn be luwu be asheŋ

²² Nɛ Israɛlebi na kikɛ lar Kadɛsh n ya fo kebeegboŋ nɛ baa tre Hɔɔr

²³ nɛ k wɔ Edɔm be kasawule be ekarso na, nɛ Enyɛnpe Ebɔrɛ kaŋɛ Mosis nɛ Ɛɛrɔn le:

²⁴ “Ɛɛrɔn be keya maaŋ cha kasawule nɛ n nase kɔnɔ fanɛ meeŋ ta n sa Israɛlebi na so. Ŋkpal menyi benyɔ ka kini kenu n sa ma ashi Mɛriba na so, meeŋ shin nɛ e wu.

²⁵ Amoso keta Ɛɛrɔn nɛ mo pibinyɛn Eliaza n yɔ kebeegboŋ nɛ baa tre Hɔɔr na so

²⁶ n ya lara Ɛɛrɔn be kabɔrɛmata be epiŋi na m buu mo pibinyɛn Eliaza, ŋkpal manɛ so, Ɛɛrɔn beeŋ wu ndoŋ.”

²⁷ Nɛ Mosis wora kusɔ nɛ Enyɛnpe Ebɔrɛ kaŋɛ mo na, nseŋ shin nɛ b dii kebeegboŋ nɛ baa tre Hɔɔr na so nɛ basa na kikɛ bee keni bumo.

²⁸ Ndoŋ nna nɛ Mosis lara Ɛɛrɔn be kabɔrɛmata be piŋi na m buu Eliaza. Nɛ Ɛɛrɔn wu kebee na be esoso ndoŋ nɛ Mosis nɛ Eliaza gbelge to m ba.

²⁹ Basa na kikɛ ka nu fanɛ Ɛɛrɔn wu, nɛ b shu mbe keeli nchɛ adesa.