Nɔmbɛs 19 - EBƆRƐ BE KAWƆL

Kena peper na be nsunɔ be asheŋ

¹ Kumo be kaman nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn

² fanɛ b ta mbra ere n sa Israɛlebi na fanɛ b bar kena peper nɛ b maŋ naŋ ta kumo n shuŋ kikɛ nɛ k maŋ kɔ ndulgi kumo so m ba sa Mosis nɛ Ɛɛrɔn,

³ nɛ b ta kumo n sa bɔrɛmatapo Eliaza nseŋ keta kumo n lar keeyi na to n ya mɔ mbe anishito.

⁴ Nɛ Eliaza e suse kumo be ŋklaŋ na be ako n ta keshilbi n nyɔ amo to ŋ ŋmenyaŋ wajɛbu na be kaba so ale ashunu.

⁵ Kumo be kaman nɛ b chɔɔ kena na kikɛ nɛ kumo be kawɔl nɛ eblaŋ nɛ ŋklaŋ nɛ apuntosɔ bɔrɛmatapo na be anishito.

⁶ Nɛ bɔrɛmatapo na e ta kedibi nɛ baa tre sida na nɛ kumo nɛ baa tre hisɔp na nɛ jese peper n lɛ edɛ na to.

⁷ Kumo be kaman nɛ bɔrɛmatapo na e ya fɔr mbe epiŋi nseŋ bɛr pɔɛŋ m bɛta m ba keeyi na to. Ama e maaŋ baa walɛ so daŋkare be ekpa so hale n ya fo kaaseso.

⁸ Esa nɛ e chɔɔ kena na gba daga kefɔr mbe epiŋi nseŋ bɛr. Mo alɛ gba maaŋ baa walɛ so hale n ya fo kaaseso.

⁹ Kumo be kaman nɛ esa nɛ e walɛ so daŋkare be ekpa so e muu kena nɛ b chɔɔ na be nsunɔ n ya yili keeyi na to be ekarso be kakpa nɛ k walɛ daŋkare be ekpa so. Nɛ Israɛlebi na e baa ta nsunɔ na a wea nchu nɛ baa ta a fɔr basa be alubi a lɛ daŋkare be ekpa so na to.

¹⁰ Esa nɛ e muu nsunɔ na gba daga e fɔr mbe epiŋi. Mo alɛ maaŋ baa walɛ so hale n ya fo kaaseso. Le be mbra ere dese nna mbaanaayɔ n sa Israɛlebi na nɛ befɔ nɛ b chena bumo to na kikɛ.

Kebeta ebuni be asheŋ

¹¹ Esa kama nɛ e beta ebuni maaŋ baa walɛ so daŋkare be ekpa so nchɛnshunu.

¹² Ama e baaŋ ta nchu nɛ b ta kena peper na be nsunɔ n wea to na nna n fɔr mbe kumu so daŋkare be ekpa so kachɛ sasopo nɛ kachɛ shunusopo na. Nɛ e baa maŋ wora loŋ, e maaŋ ba walɛ so daŋkare be ekpa so.

¹³ Esa kama nɛ e beta ebuni nseŋ kini kefɔr mbe kumu so daŋkare be ekpa so, wora eyurpi n jija Enyɛnpe be wajɛbu na nna nsaa maaŋ naŋ ti Ebɔrɛ be basa so.

¹⁴ Nɛ fanɛ esa ko malɛ wu wajɛbu to, bekama nɛ b wɔ kumo to nɛ e wu na nɛ bekama nɛ e wu pɔɛŋ nɛ b luri kumo to na kikɛ wora eyurpi daŋkare be ekpa so nchɛnshunu.

¹⁵ Kusɔ kama malɛ nɛ k yil wajɛbu na to a maŋ buuso ki eyurpi be kusɔ nna na.

¹⁶ Ekama nɛ e beta esa nɛ b mɔ kowushina ŋko esa nɛ e wu kowushina be kebuni, ŋko dimɛdi be kuwibi ŋko nchaŋ gba wora eyurpi daŋkare be ekpa so nchɛnshunu.

¹⁷ Pɔɛŋ nɛ esa na e nyalɛ so daŋkare be ekpa so, a daga fanɛ b ta kena peper nɛ b chɔɔ n lara alubi be kefɔrso be sarga na be nsunɔ n wɔtɔ kapuya nɛ nchu to.

¹⁸ Nɛ esa nɛ e walɛ so daŋkare be ekpa so, e ta kedibi nɛ baa tre hisɔp be keyabi n nyɔ nchu na to ŋ ŋmenyaŋ ŋ ŋmenyaŋ wajɛbu na nɛ kusɔ kama nɛ k wɔ kumo to na, nɛ basa nɛ b daa wɔ ndoŋ na kikɛ so. Loŋ koŋwule nɛ baaŋ wora esa kama nɛ e beta dimɛdi be kuwibi ŋko kebuni ŋko nchaŋ.

¹⁹ Esa nɛ e walɛ so daŋkare be ekpa so na e naaŋ ta nchu na ŋ ŋmenyaŋ basa nɛ b wora eyurpi daŋkare be ekpa so na so kachɛ sasopo nɛ kushunusopo na. Loŋ be kachɛ shunusopo na, nɛ esa nɛ e maŋ walɛ so na e fɔr mbe epiŋi nseŋ bɛr pɔɛŋ n nyalɛ so kaaseso.

²⁰ Esa kama nɛ e wora eyurpi daŋkare be ekpa so nseŋ kini kefɔr mbe kumu so daŋkare be ekpa so wora eyurpi n jija Enyɛnpe be wajɛbu na nna nsaa maaŋ naŋ ti Ebɔrɛ be basa so.

²¹ Mbra ere maaŋ chɛrga kikɛ. Ekama nɛ e bee ŋmenyaŋ nchu na a fɔr basa so daŋkare be ekpa so gba, daga e fɔr mbe epiŋi. Ekama nɛ e beta nchu na malɛ beeŋ wora eyurpi daŋkare be ekpa so n ya fo kaaseso.

²² Kusɔ kama nɛ esa nɛ e wora eyurpi daŋkare be ekpa so beta gba wora eyurpi. Esa kama nɛ mo alɛ beta kumo beeŋ wora eyurpi n ya fo kaaseso.