Nɔmbɛs 18 - EBƆRƐ BE KAWƆL

Bɔrɛmatapoana nɛ Livaiebi be kushuŋ be asheŋ

¹ Le nɛ Enyɛnpe Ebɔrɛ kaŋɛ Ɛɛrɔn a laŋɛ bɔrɛmatapoana be kushuŋ be kaplɛa so: “Fo nɛ fo mbinyɛnsobi nɛ Livaiebi na kikɛ e naaŋ nya kulubi kama nɛ k wora Enyɛnpe be wajɛbu na be kushuŋ be kaplɛa so be kasogberge ama fo nɛ fo mbinyɛnsobi nawule e naaŋ nya kulubi kama nɛ k wora ashi bɔrɛmatapoana bre be kushuŋ be kaplɛa so bre be kasogberge.

² Fo kurgepoana Livaiebi na e naaŋ baa chɛ fo nɛ fo mbinyɛnsobi to a shuŋ wajɛbu na to.

³ Shin nɛ b baa shuŋ kushuŋ kama nɛ feeŋ sa bumo ashi wajɛbu na to, ama b sa maŋ kaŋ beta asɔ cheembi nɛ a wɔ Enyɛnpe be wajɛbu na to na nɛ bɔrɛsure na bre, nɛ mannɛ aloŋ, fo nɛ bumo kikɛ beeŋ wu.

⁴ Bumo nawule e naaŋ baa tu menyi a shuŋ wajɛbu na to. A maŋ daga esa pɔtɛ ka wora loŋ.

⁵ Fo nɛ fo mbinyɛnsobi nawule e daga kebaashuŋ Enyɛnpe be wajɛbu na to nɛ bɔrɛsure na so, loŋ nɛ ma agbo maaŋ naŋ ba Israɛlebi na so.

⁶ Ŋ gbagba e lara fo kurgepoana Livaiebi na ashi Israɛlebi to fanɛ kakɛ nɛ b ta m bɔɔ ma enɔ n sa menyi, nɛ b baa chɛ to a shuŋ wajɛbu na to.

⁷ Fo nɛ fo mbinyɛnsobi nawule e naaŋ baa shuŋ kabɔrɛmata be kushuŋ na ashi bɔrɛsure na so nɛ acheembiana to be kakpa cheembi na to. Ŋkpal manɛ so ma e ta kabɔrɛmata be kushuŋ ere n sa menyi. Amoso esa kama nɛ e ta kpramɛ n shuŋ kumo, daga b ka mɔ mo.”

Bɔrɛmatapoana be kachige be asheŋ

⁸ Kede be kaman nɛ Enyɛnpe Ebɔrɛ naŋ kaŋɛ Ɛɛrɔn le: “Baa nyiŋi fanɛ sarga nɛ b maaŋ chɔɔ a sa ma na la fo nɛ fo kaman to ebi peya nna mbaanaayɔ.

⁹ Sarga cheembi kama nɛ b maa chɔɔ bɔrɛsure na so bre la menyeya nna, amo e la ayu be sargajibi nɛ kulubi be sarga nɛ abar be kelɔŋɛ be sarga. Kusɔ cheembi kama nɛ b ta m ba lara sarga n sa ma la fo nɛ fo mbinyɛnsobi peya nna.

¹⁰ Le be asɔ ere la asɔ cheembi nna, amoso benyɛn nawule e chena kakpa cheembi n ji amo.

¹¹ Sarga pɔtɛ kama nɛ k naŋ ti ade so bre la menyeya nna mbaanaayɔ, nɛ fo nɛ fo mbinyɛnsobi nɛ becheso nɛ fo laŋ to ebi nɛ b walɛ so daŋkare be ekpa so, beeŋ tiŋ n ji amo.

¹² N ta ɔlif be ŋku nɛ yabra belbelso nɛ ayu nɛ a la sososo be ajibi nɛ Israɛlebi bee lara kafɛ kafɛ kikɛ a sa ma na nna n sa menyi.

¹³ Amo kikɛ la menyeya nna nɛ men be laŋ to be esa kama nɛ e walɛ so daŋkare be ekpa so beeŋ tiŋ n ji amo.

¹⁴ Kusɔ kama nɛ b lara n yili n sa ma ashi Israɛl be efuli so, la menyeya nna.

¹⁵ Dimɛdi ŋko kusɔbɔya be wurkoŋ kama nɛ Israɛlebi na baaŋ ta n sa ma, la menyeya nna. Ama a daga men ka shuli nɛ b ka wurkoŋ kama nɛ kusɔbɔya be wurkoŋ kama nɛ k maŋ walɛ so daŋkare be ekpa so be kukɔ.

¹⁶ Enyɛnpe be wajɛbu to be kananɛ baa karga amansherbi na be gbiti be ndarbi anu e daga fanɛ b ka n tɔ mbia nɛ b ji afɔl koko.

¹⁷ Ama a maŋ daga men ka tɔ ana nɛ mbolpɔ nɛ mboe bre be ewurkoŋ. Amo ere daga keta n lara sarga n sa ma ŋkpal manɛ so a la meya nna. Men mɔ amo n chulgi amo be ŋklaŋ n wurge bɔrɛsure na so nseŋ chɔɔ amo be nfɔ saŋɛ na so amo be edishi beeŋ dii m ba ŋ kutɔ ŋkpal manɛ so amo be efɛa bee wora ma ebel nna.

¹⁸ Amo be eblaŋ na bre kikɛ la menyeya nna fanɛ kananɛ sarga nɛ baa maŋ so a ŋini Ebɔrɛ na be ŋgbene na nɛ jiso be ebɛaŋana la menyeya na.

¹⁹ Baŋ yili kabre a yɔ, sarga cheembi kama nɛ Israɛlebi na lara n sa ma ki fo nɛ fo mbinyɛnsobi nɛ mbichesobi peya mbaanaayɔ. Kɔnɔ nɛ n sa fo nɛ fo kaman to ebi nna na, kumo alɛ maaŋ chɛrga kikɛ.”

²⁰ Nɛ Enyɛnpe Ebɔrɛ naŋ kaŋɛ Ɛɛrɔn le: “Fo maaŋ nya kasawule be kachige nɛ k beeŋ baa la fo kapetɛ ashi Israɛl be kasawule so. Ma Enyɛnpe Ebɔrɛ na e naŋ baa la fo kapetɛ.”

Livaiebi na be kushuŋ be asheŋ

²¹ Nɛ Enyɛnpe Ebɔrɛ naŋ kaŋɛ le: “N ta Israɛlebi na be kudukudusopo kikɛ nɛ baa bar ma nna a sa Livaiebi na. Amo e la Enyɛnpe be wajɛbu na to na be kushuŋ nɛ baa shuŋ be kakɔka.

²² Baŋ yili kabre a yɔ, Israɛlebi nɛ b ka na e sa maŋ taga Enyɛnpe be wajɛbu na to, manɛ aloŋ baaŋ wu nɛ k baa la bumo be alubi be kasogberge.

²³ Livaiebi na nawule e naa ba shuŋ wajɛbu na to nɛ kumo be kewora n da so be turju e ba bɛ bumo. Le be mbra ere dese nna n sa menyi nɛ men be kaman to ebi kikɛ mbaanaayɔ. Bumo alɛ maaŋ nya kapetɛ kikɛ ashi Israɛlebi na to,

²⁴ ŋkpal manɛ so, mee ta kudukudusopo nɛ Israɛlebi na bee ta a lara sarga a sa ma na nna a sa Livaiebi na fanɛ bumo be kapetɛ ashi Israɛl be kasawule so.”

Livaiebi na be kudukudusopo be asheŋ

²⁵ Ade kikɛ be kaman nɛ Enyɛnpe Ebɔrɛ kaŋɛ Mosis fanɛ

²⁶ e kaŋɛ Livaiebi na le: “Men baŋ sɔ Israɛlebi be kudukudusopo nɛ mee ta a sa menyi fanɛ men be kapetɛ na, menyi alɛ gba e lara amo be kudukudusopo n sa Enyɛnpe Ebɔrɛ,

²⁷ fanɛ kananɛ Israɛlebi na bee lara bumo be kudukudusopo na.

²⁸ Le be ekpa so nɛ menyee baa bɔla a lara men be kudukudusopo. Bɔrɛmatapowura Ɛɛrɔn nɛ menyeeŋ ba ta amo a sa.

²⁹ Amo to be alela e daga fanɛ men ka lara n ya sa Enyɛnpe Ebɔrɛ na.

³⁰ Men baŋ lara amo to be alela n sa Enyɛnpe Ebɔrɛ na, menyeeŋ tiŋ n ta amo nɛ a ka na fanɛ kananɛ edɔpo bee lara mbe adɔjibi be kudukudusopo nsaa ta amo nɛ a ka na.

³¹ Menyi nɛ menyi be kanaŋ kikɛ beeŋ tiŋ n ji amo, ŋkpal manɛ so menyi be wajɛbu to be kushuŋ be kakɔka nna na.

³² Nɛ men baŋ lara amo to be alela n sa Enyɛnpe Ebɔrɛ na pɔɛŋ nseŋ ji amo nɛ a ka na, kumo ere men maŋ wora n da so. Menyi alɛ maŋ jija Israɛlebi na be esarga cheembi na. Menyi alɛ maaŋ wu.”