Nɔmbɛs 17 - EBƆRƐ BE KAWƆL

Ɛɛrɔn be kekpabi be asheŋ

¹ Le nɛ Enyɛnpe Ebɔrɛ daŋ kaŋɛ Mosis:

² “Kaŋɛ Israɛlebi fanɛ bumo be nnaŋ kuduanyɔ na be kekama e wora bumo be ejuŋkparpo be kekpabi. Nɛ fo sibɛ ejuŋkparpo kama be ketre n deŋi mbe kekpabi so.

³ Sibɛ Ɛɛrɔn be ketre n deŋi Livai be kanaŋ be kekpabi so, ŋkpal manɛ so, kanaŋ kama be ejuŋkparpo daga kekpabi koŋwule nna.

⁴ Nɛ fo ta akpabi na n ya yili ŋkre be deka na be anishito, ashi Enyɛnpe be wajɛbu na be kakpa nɛ mee kaa tu fo na.

⁵ Ekama nɛ n lara fanɛ bɔrɛmatapo na be kekpabi beeŋ gbu kenishi. Loŋ e naaŋ shin nɛ Israɛlebi ere e yige kebaa fubel a bile asheŋ a malga a gbiti fo.”

⁶ Ndoŋ nna nɛ Mosis kaŋɛ Israɛlebi na kusɔ nɛ Enyɛnpe Ebɔrɛ kaŋɛ na, nɛ bumo be nnaŋ kuduanyɔ na be kekama sa mo bumo be ejuŋkparpo be kekpabi n ta Ɛɛrɔn peya n ti so.

⁷ Nɛ Mosis ta akpabi na kikɛ n nase Enyɛnpe Ebɔrɛ be ŋkre be deka na be anishito ashi wajɛbu na to.

⁸ Kumo be ŋklade, Mosis ka yɔ wajɛbu na to, nɛ Ɛɛrɔn be kekpabi nɛ k yili n sa Livai be kanaŋ to ebi na gbu kenishi nseŋ purge n futi n wora atoto n sɔr asɔrso nɛ baa tre amɔnd na.

⁹ Ndoŋ nna nɛ Mosis lara akpabi na kikɛ wajɛbu na to n m ba ŋini Israɛlebi na. B ka wu kusɔ nɛ k wora na, nɛ bejuŋkparpoana na be ekama ta mbe kekpabi.

¹⁰ Nɛ Enyɛnpe Ebɔrɛ kaŋɛ Mosis le: “Bɛta Ɛɛrɔn bre be kekpabi na n ya nase ŋkre be deka na be anishito, nɛ k baa la kefiɛso n sa Israɛlebi nɛ baa fubel a bile asheŋ a malga a gbiti ma na. B baa maŋ yige bumo be nfubel na, bumo kikɛ beeŋ wu.”

¹¹ Nɛ Mosis wora kusɔ nɛ Enyɛnpe Ebɔrɛ kaŋɛ mo na kikɛ chap.

¹² Ndoŋ nna nɛ Israɛlebi na kaŋɛ Mosis le: “Kumo ere, an wu nna na!

¹³ Nɛ ekama nɛ e ba wajɛbu na ase beeŋ wu bre, kumo ere anyi kikɛ maŋ naa wɔtɔ nna na!”