Nɔmbɛs 16 - EBƆRƐ BE KAWƆL

Koora nɛ Deetan nɛ Abiram be kekini kenu n sa Mosis be asheŋ

^1-2 Kachako nɛ Iza pibinyɛn Koora nɛ e shi Livai be yiri to nsaa shi Kohaf be kabuna na tre Eliab be mbinyɛnsobi Deetan nɛ Abiram nɛ Pɛlɛf pibinyɛn Ɔɔn, nɛ mo nɛ bumo kre fanɛ b maaŋ naa nu a sa Mosis fanɛ ejuŋkparpo. Bumo nɛ Israɛl be basa alfa anyɔ nɛ adunu nɛ b la bejuŋkparpo nɛ basa bee sa bumo bunyaŋ ga na e daŋ wora kɔnɔ.

³ Bumo kikɛ daŋ shɛr Mosis nɛ Ɛɛrɔn kutɔ nna ŋ kaŋɛ bumo le: “Manɛ nna nɛ menyee fɛ fanɛ men bɔ esa kikɛ ere? An kikɛ la Enyɛnpe Ebɔrɛ be basa cheembi nna.”

⁴ Mosis ka nu loŋ, nɛ e gbir ŋ kurgi kumu n yuu to ŋ kule Ebɔrɛ.

⁵ Kumo be kaman nɛ e kaŋɛ Koora nɛ mo braana na le: “Echefo kachipurso Enyɛnpe Ebɔrɛ beeŋ ŋini anyi esa nɛ mo gbagba lara fanɛ e ki bɔrɛmatapo. Amodoŋwura malɛ beeŋ shuŋ mo kashenteŋto.

^6-7 Koora, echefo kachipurso, fo nɛ fo braana na e muu ajanwulɛ n wɔtɔ edɛtɔl to n ta duwu n deŋi amo so n yɔ bɔrɛsure na ase. Ndoŋ nɛ anyeeŋ pin anyi to be emo nɛ Enyɛnpe Ebɔrɛ lara fanɛ bɔrɛmatapo. Menyi Livaiebi e naa fɛ fanɛ men bɔ basa.”

⁸ Kede be kaman nɛ Mosis naŋ kaŋɛ Koora le: “Nu nfe!

⁹ K maŋ bɔlɔ menyi Livaiebi, kenishi fanɛ Israɛl be Ebɔrɛ na ka lara menyi ashi Israɛlebi na kikɛ to fanɛ men ba kaa shuŋ mbe wajɛbu na to nsaa juŋkpar mbe basa nɛ b baa shuŋ mo a?

¹⁰ E ta bunyaŋ be kushuŋ tumase ere n sa fo nɛ Livaiebi na kikɛ, ama amo nɛ amo kikɛ nɛ fo kraa kɔ a fin kabɔrɛmata be kushuŋ gba a!

¹¹ Fo baa malga a gbiti Ɛɛrɔn, kumo ere Enyɛnpe Ebɔrɛ na nɛ fo braana bee kini kenu n sa na.”

¹² Kumo be kaman nɛ Mosis shuŋi n tre Deetan nɛ Abiram. Ama le nɛ b daŋ kaŋɛ: “Anyi maaŋ ba!

¹³ Men ka lara anyi ashi Ijipt be kasawule nɛ ajibi damta nɛ kedamaya wɔ na m ba lɛ keshishɛrsawule ere so nɛ men mɔ ere bre maŋ kukwe a? Nɛ men naa sha nɛ men ta anyi ŋ ki menyi be nyɛrbi a tɔrɔ a?

¹⁴ Men nase kɔnɔ fanɛ menyeeŋ yɛra anyi kudɔsawule lela nɛ k bee wora adɔjibi nɛnɛ nɛ anyeeŋ tiŋ n dɔ asɔrso nɛ baa tre greeps kumo so na so nɛ k ki anyeya. Ama naniere nnɛ nɛ a wɔ? Menyee fule anyi nna. Amoso anyi maaŋ ba!”

¹⁵ Ndoŋ nna nɛ Mosis nya agbo ga nseŋ kaŋɛ Enyɛnpe Ebɔrɛ le: “Sa maŋ kaŋ sɔ sarga nɛ basa ere kɔ a bar fo ere. M maŋ wora bumo be ekama kulubi. Ma alɛ maŋ sɔ esa kama be kurma.”

¹⁶ Kede be kaman nɛ Mosis kaŋɛ Koora malɛ le: “Echefo, fo nɛ fo braana na kikɛ nɛ Ɛɛrɔn e ba Enyɛnpe Ebɔrɛ be wajɛbu na ase.

¹⁷ Men be ekama e chulgi duwu n wɔtɔ mbe edɛtɔl to m ba chɔɔ n lara sarga n sa Enyɛnpe Ebɔrɛ na.”

¹⁸ Kumo be ŋklade nɛ b muu ajanwulɛ n wɔtɔ bumo be edɛtɔl to nseŋ chulgi duwu n wɔtɔ edɛ na to nɛ bumo nɛ Mosis nɛ Ɛɛrɔn kikɛ ya yili Enyɛnpe be wajɛbu na be kabuna.

¹⁹ Nɛ Koora shin nɛ Israɛlebi na kikɛ gbargbar abar m ba yili Mosis nɛ Ɛɛrɔn be anishito ashi wajɛbu na be kabuna. Epul na to nɛ Enyɛnpe Ebɔrɛ be kemaŋkura lar basa na kikɛ so,

²⁰ nɛ e kaŋɛ Mosis nɛ Ɛɛrɔn le:

²¹ “Men barga men be amu ashi basa na kutɔ saŋɛ na so, meeŋ mɔ bumo epul ere to.”

²² Ama Mosis nɛ Ɛɛrɔn bre daŋ gbir nna ŋ kurgi amu n yuu to nseŋ kaŋɛ le: “O Ebɔrɛ, fo e naa sa anyi ŋkpa. Feeŋ shuli n nya agbo n wɔtɔ basa ere kikɛ ŋkpal esa koŋwule be kulubi so a?”

²³ Nɛ Enyɛnpe Ebɔrɛ kaŋɛ Mosis le:

²⁴ “Kaŋɛ basa na fanɛ b loŋi Koora nɛ Deetan nɛ Abiram be ewajɛbu na ase.”

²⁵ Ndoŋ nna nɛ Mosis kpa n niŋi to nɛ Israɛl be bejuŋkparpoana na bɛ mo so n yɔ Deetan nɛ Abiram kutɔ.

²⁶ Nɛ Mosis kpele basa na kusoe ŋ kaŋɛ le: “Men loŋi basa lubi ere be ewajɛbu ase. Men sa maŋ beta bumo be kusɔ kama, nɛ manɛ aloŋ menyi nɛ bumo kikɛ beeŋ wu ŋkpal bumo be alubi so.”

²⁷ Amoso basa na kikɛ daŋ shile Koora nɛ Deetan nɛ Abiram be ewajɛbu na ase nna ŋ ka bumo nɛ bumo be beche nɛ mbia nawule n yili bumo be ewajɛbu na be mbuna.

²⁸ Nɛ Mosis kaŋɛ basa na le: “Kede e naaŋ shin nɛ men pin fanɛ Enyɛnpe Ebɔrɛ na e shuŋi ma fanɛ n wora asɔ ere kikɛ, mannɛ fanɛ ŋ gbagba be keparso nɛ mee wora amo.

²⁹ Nɛ Ebɔrɛ baŋ maŋ gberge basa ere kusoe n shin nɛ b wu, kumo ere mannɛ Enyɛnpe Ebɔrɛ na e lara ma fanɛ ŋ ki men be ejuŋkparpo.

³⁰ Ama nɛ fanɛ Enyɛnpe Ebɔrɛ na wora kusɔ nɛ k maŋ naŋ wora kikɛ nseŋ shin nɛ kasawule baŋɛ to n ta basa ere nɛ bumo be beche nɛ mbia nɛ kusɔ kama nɛ b kɔ kikɛ m min, loŋ nɛ menyeeŋ pin fanɛ basa ere kini Enyɛnpe Ebɔrɛ na kashenteŋto.”

³¹ Mosis ka baŋ malga n loge, nɛ kasawule baŋɛ to epul to

³² n ta Deetan nɛ Abiram nɛ Koora nɛ bumo be kanaŋ kikɛ nɛ bumo be mpetɛ kikɛ m min.

³³ Kasawule na daŋ baŋɛ to nna nɛ bumo nɛ bumo be mpetɛ kikɛ tɔr to nɛ k daŋ buu bumo so nɛ b kra keni nɛ basa na maŋ naŋ wu bumo.

³⁴ Israɛlebi nɛ b daa wɔ ndoŋ na ka nu bumo be kushu, nɛ b shile nsaa cha awɔr e kaŋɛ le: “Men baa shile! Nɛ manɛ aloŋ, kasawule na beeŋ ta anyi alɛ gba m min!”

³⁵ Kede be kaman nɛ Enyɛnpe Ebɔrɛ na shin nɛ edɛ wuloŋ wuloŋ ko ba chɔɔ benyɛn alfa anyɔ nɛ adunu nɛ b ta eduwu n ya ka lara sarga na m mɔ.

Edɛtɔl be asheŋ

³⁶ Ade kikɛ be kaman nɛ Enyɛnpe Ebɔrɛ na kaŋɛ Mosis le:

³⁷ “Kaŋɛ bɔrɛmatapo Ɛɛrɔn pibinyɛn Eliaza fanɛ e lara danyaŋ be edɛtɔl na ashi kedɛmurmur na to nseŋ gbeŋi ajanwulɛ nɛ a wɔ amo to na n lɛ. Edɛtɔlana na ki asɔ cheembi nna,

³⁸ ŋkpal b ka ta amo m ba Enyɛnpe Ebɔrɛ na be bɔrɛsure na ase so. Ta basa nɛ edɛ chɔ m mɔ ŋkpal bumo be alubi so ere be edɛtɔl m bɛl ebuuso a buu bɔrɛsure na so nɛ kumo be loŋ e baa la kefiɛso n sa Israɛlebi.”

³⁹ Amoso bɔrɛmatapo Eliaza e daŋ ta edɛtɔl na n sa nɛ b bɛl ebuuso a buu bɔrɛsure na so,

⁴⁰ nɛ k baa la kanyiŋi n sa Israɛlebi na fanɛ esa kama nɛ e maŋ shi Ɛɛrɔn be kanaŋ to, maŋ daga e ka chɔɔ duwu n lara sarga bɔrɛsure na so n sa Enyɛnpe Ebɔrɛ na. Esa kama nɛ e wora loŋ beeŋ wu fanɛ kananɛ Koora nɛ mbe basa wu na.

Ɛɛrɔn ka mɔlga Israɛlebi na be asheŋ

⁴¹ Kumo be ŋklade nɛ Israɛlebi kikɛ naŋ fubel m bile asheŋ m malga ŋ gbiti Mosis nɛ Ɛɛrɔn ŋ kaŋɛ le: “Men mɔ Enyɛnpe Ebɔrɛ be basa, ŋko!”

⁴² B ka ba abar so nɛ b ba malga ŋ gbiti Mosis nɛ Ɛɛrɔn na, nɛ b keni wajɛbu na be kaba so, nseŋ wu Enyɛnpe Ebɔrɛ be kemaŋkura ka bɔla kuwɔlpa to m ba buu kumo so.

⁴³ Ndoŋ nna nɛ Mosis nɛ Ɛɛrɔn ya yili wajɛbu na be anishito,

⁴⁴ nɛ Enyɛnpe Ebɔrɛ kaŋɛ Mosis le:

⁴⁵ “Men shile basa ere kutɔ nɛ m ba mɔ bumo epul ere to!” Epul na to nɛ Mosis nɛ Ɛɛrɔn gbir ŋ kurgi amu n yuu to ŋ kule Ebɔrɛ,

⁴⁶ nɛ Mosis kaŋɛ Ɛɛrɔn le: “Ya chɔɔ bɔrɛsure na so be edɛ n wɔtɔ fo kedɛtɔl to nseŋ ta duwu n wɔtɔ amo to n wora manaŋ n yɔ basa na kutɔ n ya lara alubi be ketampaŋ be sarga n sa bumo. Ŋkpal manɛ so Enyɛnpe Ebɔrɛ na nya agbo nɛ aleblawu fara.”

⁴⁷ Ndoŋ nna nɛ Ɛɛrɔn nu kusɔ nɛ Mosis kaŋɛ na nseŋ ta mbe kedɛtɔl n shile n yɔ jimaŋ na be nferinto. E ka wu fanɛ aleblawu na teŋ fara, nɛ e ta duwu n wɔtɔ edɛ na to n chɔɔ n lara alubi be ketampaŋ be sarga n sa basa na.

⁴⁸ E kraa yil basa nɛ aleblawu mɔ na nɛ bumo nɛ b maŋ naŋ wu na be nferinto nna nɛ aleblawu na ku.

⁴⁹ Basa ŋgboŋ kuduana nɛ alfa ashunu nɛ aleblawu na daŋ mɔ. B daa maŋ karga Koora nɛ mo braana bre n ti so.

⁵⁰ Aleblawu na ka ku nɛ Ɛɛrɔn yɔ Mosis kutɔ ashi wajɛbu na be kabuna to.