Nɔmbɛs 15 - EBƆRƐ BE KAWƆL

Esarga be mbraana be asheŋ

¹ Enyɛnpe Ebɔrɛ daŋ kaŋɛ Mosis nna fanɛ

² e ta le be esarga be kelara be mbraana n sa Israɛlebi na nɛ b baa bɛ amo so ashi kasawule nɛ baa yɔ nɛ b ya chena so na so.

³ B baa ta gbolu ŋko kpakpa ŋko kubolpɔche ŋko kaboe n lara sarga chɔɔso ŋko kɔnɔ be ketia be sarga ŋko keparso be sarga ŋko kabɔrɛshuŋ be nchɛgboŋ be sarga. Le be esarga ere be efɛa bee wora ma Enyɛnpe Ebɔrɛ na ebel nna.

^4-5 Ekama nɛ e ta kusɔbɔya nɛ e ba lara ayu be sargajibi n sa Enyɛnpe Ebɔrɛ na, e ta ɔlif be ŋku kɔlba be bɔlɔ m baga nyifu kurwa koŋwule n ta yabra belbelso kɔlba koŋwule n ti so n lara sarga na.

⁶ Nɛ fanɛ kpakpa nɛ b kɔ a lara sarga na kumo ere b ta ɔlif be ŋku kɔlba koŋwule nɛ bargato m baga nyifu kurwa anyɔ n lara ayu be sargajibi na

⁷ nseŋ ta yabra belbelso kɔlba nɛ bargato malɛ n lara asɔnuuso be sarga. Le be esarga ere be efɛa bee par Enyɛnpe Ebɔrɛ nna.

⁸ Nɛ b baŋ ta gbolu a lara sarga chɔɔso ŋko kɔnɔ be ketia be sarga ŋko kɔnɔkoŋwuleso be sarga,

⁹ kumo ere b ta ɔlif be ŋku kɔlba koŋwule m baga nyifu kurwa asa n lara ayu be sargajibi na,

¹⁰ nseŋ ta yabra belbelso kɔlba anyɔ n ti so m ba lara asɔnuuso malɛ be sarga. Le be esarga ere be efɛa bee wora Enyɛnpe Ebɔrɛ ebel nna.

¹¹ Saŋkama nɛ men ta gbolu ŋko kpakpa ŋko kubolpɔche ŋko kaboe nɛ men ya lara sarga, men baa bɛ le be mbra ere so.

¹² Kusɔbɔya kama nɛ ekama bar nɛ e ba lara sarga daga le be asɔ ere ka ti kumo so.

¹³ Israɛl be kadetobia kikɛ nɛ e bee lara sarga chɔɔso daga fanɛ e lara ayu nɛ yabra belbelso be sarga n ti so, ŋkpal manɛ so amo kikɛ be efɛa bee wora Enyɛnpe Ebɔrɛ na ebel nna.

¹⁴ Nɛ fanɛ befɔ nɛ b wɔ menyi to na gba bee sha kelara sarga n sa Enyɛnpe Ebɔrɛ na, a daga fanɛ bumo alɛ gba e bɛ le be mbra ere so.

¹⁵ Mbra ere dese nna n sa menyi Israɛlebi nɛ men la ndetobia na nɛ befɔ nɛ b chena menyi to na kikɛ hale mbaanaayɔ. Sarga be kelara bre be kaplɛa so, menyi nɛ bumo kikɛ la kukoŋwule nna ashi Enyɛnpe Ebɔrɛ na be anishito,

¹⁶ nɛ le be mbra ere malɛ la menyi nɛ bumo kikɛ peya.

¹⁷ Enyɛnpe Ebɔrɛ e daŋ ta le be mbra ere n sa Mosis

¹⁸ fanɛ e sa Israɛlebi na nɛ b baa bɛ amo so ashi kasawule nɛ e kɔ bumo a yɔ nɛ b ya chena so na so.

¹⁹ “Nɛ men ba ya ka ji ndoŋ be kasawule so be ajibi, men baa lara ako fanɛ sarga a sa Enyɛnpe Ebɔrɛ na.

²⁰ Men baŋ wora bodobodo, men ta amo nɛ men juŋkpar n wora na n lara sarga n sa Enyɛnpe Ebɔrɛ fanɛ kananɛ menyeeŋ ta ayu nɛ men juŋkpar m biri n lara sarga na.

²¹ A daga fanɛ menyi be kaman to ebi gba ka bɛ le be mbra ere so a ta bodobodo nɛ b juŋkpar n wora a lara sarga a sa Enyɛnpe Ebɔrɛ na.

²² Ama nɛ fanɛ men maŋ kute n wora n da mbra nɛ Enyɛnpe Ebɔrɛ ta n sa Mosis na be kekama so,

²³ ŋko nɛ echefoso Israɛlebi na wora n da amo so

²⁴ ŋkpal b ka maŋ nyi so, kumo ere a daga fanɛ kade na to ebi ka fin gbolu n lara sarga chɔɔso nɛ kumo be efɛa bee wora Enyɛnpe Ebɔrɛ na ebel nseŋ ta ayu nɛ yabra belbelso nɛ kaboelote n ti amo so n lara alubi be ketampaŋ be sarga.

²⁵ Nɛ bɔrɛmatapo na e kule alubi be ketampaŋ n sa kade na to ebi kikɛ nɛ n ta m paŋ bumo ŋkpal b ka maŋ kute n wora kulubi na nseŋ lara alubi be sarga n sa ma Enyɛnpe Ebɔrɛ na so.

²⁶ Loŋ na, Israɛlebi na nɛ befɔ nɛ b chena bumo to na kikɛ beeŋ nya alubi be ketampaŋ ŋkpal bumo kikɛ ka maŋ kute n wora kulubi na so.

²⁷ Ama nɛ fanɛ esa koŋwule e maŋ kute n wora kulubi, kumo ere amodoŋwura e lara kaboeche nɛ k fo kafɛ koŋwule m ba lara alubi be ketampaŋ be sarga.

²⁸ Nɛ bɔrɛmatapo na e kule alubi be ketampaŋ n sa esa nɛ e maŋ kute n wora kulubi na nɛ n ta m paŋ mo.

²⁹ Mbra koŋwule ere e dese n sa ndetobia nɛ befɔ nɛ b maŋ kute n wora kulubi na kikɛ.

³⁰ Ama kadetobia ŋko efɔ nɛ e kute n wora kulubi bre, bee fɛl Enyɛnpe Ebɔrɛ na nna nsaa maŋ daga e ka wɔ basa na to.

³¹ Ŋkpal amodoŋwura ka kini kenu n sa Enyɛnpe Ebɔrɛ na nseŋ kute n wora n da mbe mbra na so so, men ju mo nɛ e maŋ naa wɔ mbe basa to. Mo alɛ be kulubi beeŋ bɛ mo gbagba be kumu so.”

Kewora n da kewushiachɛ be mbra so be asheŋ

³² Jemanɛ nɛ Israɛlebi na daa wɔ keshishɛrsawule na so na, nɛ b wu kanyɛn ko ka bee kil ndibi kewushiachɛ na kachako.

³³ Nɛ b keta mo m ba Mosis nɛ Ɛɛrɔn nɛ Israɛlebi kikɛ be anishito.

³⁴ Kumo be kaman nɛ b ti mo so n wɔtɔ mbe wajɛbu to, ŋkpal manɛ so b daŋ maŋ nyi kusɔ nɛ k daga fanɛ b wora mo.

³⁵ Ndoŋ nna nɛ Enyɛnpe Ebɔrɛ kaŋɛ Mosis le: “Shin nɛ b keta kanyɛn na n lar keeyi na to nɛ basa na kikɛ e ya kpla mo ajembu m mɔ.”

³⁶ Nɛ b keta kanyɛn na n lar keeyi na to n ya kpla mo ajembu m mɔ fanɛ kananɛ Enyɛnpe Ebɔrɛ kaŋɛ Mosis na.

³⁷ Kumo be kaman nɛ Enyɛnpe Ebɔrɛ naŋ kaŋɛ Mosis

³⁸ fanɛ e kaŋɛ Israɛlebi na fanɛ bumo nɛ bumo be kaman to ebi e baa ba ajolobi nɛ a kɔ ejese buru a chɔga bumo be epiŋi be nnɔkarya.

³⁹ Saŋkama nɛ men wu ajolobi na, a beeŋ ba nyiŋi menyi Enyɛnpe Ebɔrɛ be mbraana na, nɛ men ba bɛ amo so nsaa maaŋ ya ka ji kubojua a bɛ men be anishi be awuso nɛ men be ŋgbene be aparsheŋ lubi so.

⁴⁰ Aloŋ nɛ menyeeŋ nyiŋi ma mbraana nsaa bɛ amo so nseŋ lara alubi menyi be ŋgbene to a shuŋ ma nɛnɛ.

⁴¹ Ma e la men Nyɛnpe nɛ men be Ebɔrɛ nɛ e lara menyi ashi Ijipt be efuli so na.