Nɔmbɛs 14 - EBƆRƐ BE KAWƆL

Israɛlebi be nfubel be asheŋ

¹ Israɛlebi na ka nu baru nɛ basa nɛ b ya dara Keenan be kasawule na bar na, nɛ b shu kagbenejijaso ga loŋ be kanyɛ na kikɛ

² nseŋ fubel m bile asheŋ m malga ŋ gbiti Mosis nɛ Ɛɛrɔn ŋ kaŋɛ le: “An daŋ wu Ijipt be kasawule so ŋko keshishɛrsawule ere so be kakpa ko gba, k daa beeŋ par anyi!

³ Manɛ nna nɛ Enyɛnpe Ebɔrɛ keta anyi a ba Keenan nɛ b mɔ anyi nseŋ pɛ anyi be beche nɛ mbia ŋ ki anya? An daa wɔ Ijipt be kasawule so gba, k daa ba bɔ.”

⁴ Kede be kaman nɛ b kaŋɛ abar le: “Men shin nɛ an lara an gbagba be ejuŋkparpo nɛ e beeŋ keta anyi m bɛta n yɔ Ijipt be kasawule so.”

⁵ Ndoŋ nna nɛ Mosis nɛ Ɛɛrɔn kurgi amu n yuu to ŋ kule Ebɔrɛ ashi Israɛlebi na be anishito.

⁶ Nɛ Nun pibinyɛn Joshuwa nɛ Jefune pibinyɛn Kalɛb nɛ b ti basa nɛ b ya dara kasawule na so na kpɛa bumo be asɔbuuso to kagbenejijaso

⁷ nseŋ kaŋɛ basa na le: “Anyi alɛ gba wu kasawule na. K walɛ alegaiso.

⁸ Nɛ an wora Enyɛnpe Ebɔrɛ na kasonu, e beeŋ yɛra anyi kasawule nɛ k walɛ nsaa wora adɔjibi nɛnɛ ere so n ya ta kumo n sa anyi.

⁹ Amoso men sa maŋ shin nɛ an kini kenu n sa Enyɛnpe Ebɔrɛ na. K maŋ daga an ka bee ŋana basa nɛ b wɔ ndoŋ na, ŋkpal manɛ so, Enyɛnpe Ebɔrɛ na wɔ anyi kutɔ, amoso b maaŋ tiŋ ŋ kɔ m pɔɔ anyi so.”

¹⁰ Ŋkpal kusɔ nɛ Joshuwa nɛ Kalɛb kaŋɛ na so Israɛlebi na daa sha kekpa bumo ajembu nna m mɔ, ama epul na to nɛ Enyɛnpe Ebɔrɛ be kemaŋkura lar Israɛlebi na so nseŋ buu Enyɛnpe be wajɛbu cheembi na so.

Mosis ka kule Ebɔrɛ n sa basa na be asheŋ

¹¹ Ndoŋ nna nɛ Enyɛnpe Ebɔrɛ kaŋɛ Mosis le: “Emamachisheŋ damta nɛ n wora n sa basa ere kikɛ ere, b kraŋ kini keyirda ma nsaa keni ma jiga a?

¹² Meeŋ shin nɛ aleblawu e ba mur bumo, ama meeŋ shin nɛ fo ere be kaman to ebi e ki efuligboŋ nɛ k kɔ eleŋ a chɔ bumo be efuli ere.”

¹³ Nɛ Mosis kaŋɛ Enyɛnpe Ebɔrɛ le: “Fo eleŋ nɛ fo ta n lara fo basa ashi Ijipt be kasawule so, amoso nɛ Ijiptebi na nu kusɔ nɛ fo naŋ wora bumo,

¹⁴ baaŋ kaŋɛ basa nɛ b wɔ kasawule ere so kikɛ kumo be asheŋ. Bumo alɛ teŋ nu fanɛ fo Enyɛnpe Ebɔrɛ na wɔ anyi kutɔ nɛ anyi nɛ fo bee malga abar kutɔ, nɛ fo kuwɔlpa buu anyi so nsaa juŋkpar anyi kapaso nɛ fo edɛ be kabulpi malɛ bee juŋkpar anyi kanyɛso.

¹⁵ Naniere nɛ fo baŋ mɔ basa ere, efuliana nɛ b nu fo ketre lela be asheŋ na beeŋ kaŋɛ le:

¹⁶ ‘Fo, Enyɛnpe Ebɔrɛ mɔ fo basa ashi keshishɛrsawule na so nna ŋkpal fo ka maŋ tiŋ ŋ keta bumo n luri kasawule nɛ fo bɔ ntaŋ n nase kɔnɔ fanɛ feeŋ sa bumo na to so.’

¹⁷ Amoso Enyɛnpe Ebɔrɛ, mee kule fo nna nɛ fo ŋini fo eleŋ nseŋ wora kusɔ nɛ fo nase kɔnɔ fanɛ feeŋ wora na. Ŋkpal manɛ so fo e kaŋɛ le:

¹⁸ ‘Ma, Enyɛnpe Ebɔrɛ na maa nya agbo manaŋ manaŋ, ma alɛ kɔ kashenteŋ be kasha nsaa ta bekama nɛ baa kini kenu n sa ma nsaa wora alubi na be alubi a paŋ bumo. Ama ma alɛ maaŋ yige kegberge bekama nɛ b wora alubi kusoe hale n ya fo bumo be kenanafofo nɛ kenana gbiramuli.’

¹⁹ Amoso Enyɛnpe Ebɔrɛ, keni fo kashenteŋ be kasha nɛ fo kɔ na so nseŋ ta basa ere be alubi m paŋ bumo fanɛ kananɛ fo ta m paŋ bumo, yili saŋɛ nɛ b lar Ijipt be efuli so kikɛ m ba fo kabre na.”

²⁰ Ndoŋ nna nɛ Enyɛnpe Ebɔrɛ kaŋɛ Mosis le: “Ŋkpal fo ka kule ma so, n ta bumo be alubi m paŋ bumo.

²¹ Ama ŋkpal ŋ ka wɔ ŋkpa to nɛ ma kemaŋkura bɔlɔ durnya ere to kikɛ so,

²² basa ere b ekama maaŋ yɔ kasawule nɛ n nase kɔnɔ n sa bumo na so. Ŋkpal manɛ so b wu ma kemaŋkura nɛ emamachisheŋ nɛ n wora ashi Ijipt be kasawule so nɛ keshishɛrsawule na so, ama b kini kenu n sa ma nseŋ wora ma ŋ keni alɛ damta.

²³ Bumo be keya maaŋ cha kasawule nɛ n nase kɔnɔ fanɛ meeŋ sa bumo nananyɛnana na so kikɛ. Bekama nɛ b kini ma na be ekama be keya maaŋ cha ndoŋ.

²⁴ Ama ŋkpal ma kayɛrbi Kalɛb bre ka maŋ du fanɛ bumo nɛ b ka na nseŋ ji kashenteŋ a sa ma so, meeŋ yɛra mo kasawule nɛ e ya dara na so nseŋ ta kumo n sa mbe kaman to ebi nɛ k ki bumo be kapetɛ.

²⁵ Ŋkpal Amalɛkebi nɛ Keenanebi na ka tase ataŋɛ nɛ a wɔ men be anishito na so, echefo men kilgi n sɔ keshishɛrsawule na so m bɔla teku peper na be kaba so.”

²⁶ Kede be kaman nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn le:

²⁷ “Saŋɛ mo gba nɛ basa lubi ere beeŋ yige kebaa fubel a bile asheŋ a malga a gbiti ma? Bumo be nfubel na wora kebaŋso!

²⁸ Kaŋɛ bumo fanɛ meeŋ wora bumo kusɔ nɛ b kaŋɛ gbagba. Ma Enyɛnpe Ebɔrɛ na e malga na.

²⁹ Menyeeŋ wu n dese n dese keshishɛrsawule ere so ŋkpal men ka malga ŋ gbiti ma so. Menyi be ekama nɛ e fo nfɛ adunyɔ m baŋ so

³⁰ maaŋ yɔ kasawule nɛ m bɔ ntaŋ n nase kɔnɔ fanɛ meeŋ sa menyi na so. Jefune pibinyɛn Kalɛb nɛ Nun pibinyɛn Joshuwa nawule e naaŋ yɔ ndoŋ.

³¹ Menyi be mbia nɛ men yɛ baaŋ pɛ ŋ ki anya na nɛ meeŋ yɛra kasawule nɛ men kini na so nɛ k ki bumo peya.

³² Menyi ere beeŋ wu n dese keshishɛrsawule ere so.

³³ Ŋkpal men ka maŋ kɔ yirda so, menyi be mbia beeŋ baa wɔ keshishɛrsawule ere so a kilgi to a ji awurfoŋ nfɛ adena hale nɛ menyi be esa lalalogesopo e wu.

³⁴ Ŋkpal men ka ta nchɛ adena n dara efuli na so, menyeeŋ nite a kilgi to keshishɛrsawule ere so nfɛ adena. Kafɛ koŋwule kikɛ bee yili nna a sa kachɛ koŋwule. Ndoŋ nɛ menyeeŋ pin kananɛ ma kekilgi ŋ kɔ esa du.

³⁵ Menyi basa lubi nɛ men chala a fubel a bile asheŋ a malga a gbiti ma ere kikɛ beeŋ wu n dese keshishɛrsawule ere so. Ma Enyɛnpe Ebɔrɛ na e malga na.”

³⁶ Basa nɛ Mosis daŋ shuŋi fanɛ b ya dara kasawule na ŋ keni na be kudu nɛ b bar baru lubi na, e daŋ shin nɛ Israɛlebi na daŋ fubel m bile asheŋ m malga ŋ gbiti Enyɛnpe Ebɔrɛ.

³⁷ Amoso e daŋ shin nna nɛ aleblawu be kulɔ mɔ loŋ be basa na kikɛ.

³⁸ Joshuwa nɛ Kalɛb nawule e maŋ wu bumo to.

³⁹ Mosis ka kaŋɛ Israɛlebi na kusɔ nɛ Enyɛnpe Ebɔrɛ kaŋɛ na nɛ b shu kagbenejijaso ga.

⁴⁰ Kumo be ŋklade nɛ b fara a yɔ kebee be efuli na so nseŋ kaŋɛ le: “K daa maŋ daga fanɛ an fubel m bile asheŋ m malga ŋ gbiti Enyɛnpe Ebɔrɛ na. Amoso an wora alubi. Men shin nɛ an yɔ Keenan be kasawule nɛ Enyɛnpe Ebɔrɛ ŋini anyi fanɛ an yɔ na so.”

⁴¹ Nɛ Mosis kaŋɛ bumo le: “Manɛ nna nɛ menyi maŋ kɔ kasonu n sa Enyɛnpe Ebɔrɛ na? Men baa nyi fanɛ men be ŋkre ere maaŋ tiŋ n shuŋ!

⁴² Enyɛnpe Ebɔrɛ na maŋ naa wɔ menyi kutɔ, amoso men sa maŋ yɔ nɛ men doŋana e ya pɔɔ menyi so.

⁴³ Menyi nɛ Amalɛkebi nɛ Keenanebi na baŋ ya ka kɔ, Enyɛnpe Ebɔrɛ na beeŋ lar menyi kaman nɛ b pɔɔ menyi so m mɔ menyi ŋkpal men ka maŋ wora mo kasonu so.”

⁴⁴ Ama amo nɛ amo kikɛ Israɛlebi na kplaŋ so nseŋ pɛ kebee so be efuli na so be ekpa a yɔ saŋɛ nɛ Enyɛnpe Ebɔrɛ be ŋkre be deka na nɛ Mosis kikɛ maŋ naŋ lar keeyi na to.

⁴⁵ Ndoŋ nna nɛ Amalɛkebi nɛ Keenanebi nɛ b wɔ kebee so be efuli na so na kɔ m pɔɔ bumo so nseŋ ju bumo hale n ya fo kade nɛ baa tre Hɔɔma na.