Nɔmbɛs 13 - EBƆRƐ BE KAWƆL

Bedarapo na be asheŋ

¹ Le nɛ Enyɛnpe Ebɔrɛ kaŋɛ Mosis:

² “Lara Israɛl be yiri kuduanyɔ na to be kekama be ejuŋkparpo n shuŋi bumo nɛ b ya dara Keenan be kasawule nɛ mee ta a sa Israɛlebi na.”

³ Ndoŋ nna nɛ Mosis nu kusɔ nɛ Enyɛnpe Ebɔrɛ kaŋɛ mo ashi Paran be keshishɛrsawule so na nseŋ shuŋi le be bejuŋkparpo ere:

⁴ Zakuur pibinyɛn Shamua e daŋ shi Ruben be yiri to nɛ

⁵ Hoori pibinyɛn Shafat shi Simiɔn be yiri to nɛ

⁶ Jefune pibinyɛn Kalɛb shi Juda be yiri to nɛ

⁷ Josɛf pibinyɛn Igaal shi Isaaka be yiri to nɛ

⁸ Nun pibinyɛn Hoshiya shi Efreim be yiri to nɛ

⁹ Rafu pibinyɛn Paalti shi Bɛnjamin be yiri to nɛ

¹⁰ Soodi pibinyɛn Gadiɛl shi Zebulun be yiri to nɛ

¹¹ Suusi pibinyɛn Gaadi shi Manase be yiri to nɛ

¹² Gemalli pibinyɛn Ammiɛl shi Dan be yiri to nɛ

¹³ Maikel pibinyɛn Sɛtuur shi Ashɛr be yiri to nɛ

¹⁴ Vopsi pibinyɛn Nabii shi Naftali be yiri to nɛ

¹⁵ Maaki pibinyɛn Geuɛl shi Gad be yiri to.

¹⁶ Bumo nɛ Mosis daŋ shuŋi fanɛ b ya dara kasawule na ŋ keni. E daŋ chɛrga Nun pibinyɛn Hoshiya be ketre nna ŋ ki Joshuwa.

¹⁷ Pɔɛŋ nɛ Mosis shuŋi bumo Keenan be kasawule so na, le nɛ e daŋ kaŋɛ bumo: “Men yili nfe m bɔla Keenan be keshishɛrsawule na be kelargato be kaseto be kaba so n sɔ to kelargato be esoso be kaba so n ya luri kebee be efuli na so.

¹⁸ Men dara nɛnɛ ŋ keni kananɛ efuli na du nɛ kananɛ kumo be basa be keshi sa nɛ kananɛ bumo be eleŋ nɛ kapɔshi sa.

¹⁹ Men keni, kasawule na walɛ ŋko k maŋ walɛ. Nseŋ naŋ keni, b pɔr egbal ŋ kulti bumo be ndeana ŋko b maŋ pɔr.

²⁰ Men keni, kasawule na walɛ kudɔ ŋko k maŋ walɛ? K kɔ ndibi ŋko k maŋ kɔ? Men wora ania n chuge ndoŋ be asɔrso jiso a ba.” Asɔrso nɛ baa tre greep na be kesɔr be saŋɛ e daa la.

²¹ Ndoŋ nna nɛ basa na ya yili Zin be keshishɛrsawule nɛ k wɔ kelargato be kaseto be kaba so na n dara kasawule na n ya fo kade nɛ baa tre Rehɔb nɛ k wɔ Lɛbo Hamaf be kepla so na.

²² B ka bɔla kelargato be kaseto be kaba so a yɔ na nɛ b ya tu kade ko nɛ baa tre Hibrɔn. Ndoŋ nɛ b tu Ahiman nɛ Shishai nɛ Talmai nɛ b shi basa tenteŋ gboŋgboŋi nɛ baa tre Anakebi be kanaŋ to na. Hibrɔn daŋ chena nfɛ ashunu nna pɔɛŋ nɛ Zowan nɛ k wɔ Ijipt be efuli so na chena.

²³ Basa nɛ b shuŋi na ka fo ketaŋɛ nɛ baa tre Eshkɔl na to, nɛ b ku kesɔrso nɛ baa tre greep na be asɔrso be keyabi. Ŋkpal k ka daa shibi ga nsaa wɔ egbɛ so b daŋ ta kumo nna n deŋi kedibi so nɛ basa anyɔ cha abar n sulɔ kumo bumo be abatimu so a nite. B daŋ ta kedibi nɛ baa tre pomegranates na be asɔrso nɛ figidibi be asɔrso gba nna n ti kumo so.

²⁴ B daŋ nase kaboŋ na Eshkɔl be ketaŋɛ nna ŋkpal Israɛlebi na ka daŋ ku greep be asɔrso nɛ a chɛ gbi gbi ndoŋ so.

²⁵ Bedarapo na ka dara kasawule na nchɛ adena n loge nɛ b bɛta

²⁶ n yɔ Mosis nɛ Ɛɛrɔn nɛ Israɛlebi na kikɛ kutɔ ashi Kadɛsh nɛ k wɔ keshishɛrsawule nɛ baa tre Paran na n ya kaŋɛ bumo kusɔ nɛ b ya wu ndoŋ nseŋ ta ndoŋ be asɔrso na ŋ ŋini bumo.

²⁷ Le nɛ b daŋ kaŋɛ Mosis: “An ya keni kasawule na nseŋ wu fanɛ k la kasawule lela nna. Kumo be asɔrso gba be ako nde.

²⁸ Ama basa nɛ b wɔ ndoŋ na kɔ eleŋ ga nseŋ pɔr egbal ŋ kulti ndegboŋ nɛ a wɔ ndoŋ na kikɛ nɛnɛ. An wu Anak be kanaŋ to be basa tenteŋ gboŋgboŋi lempoana gba ndoŋ.

²⁹ Amalɛkebi e chena kasawule na be kelargato be kaseto be kaba so, nɛ Hitebi nɛ Jebusiebi nɛ Amɔriebi malɛ chena kebee be efuli na be kaba so; nɛ Keenanebi malɛ chena m mata Teku nɛ baa tre Mɛditerenia na nɛ Jɔɔdan be lɔr na be ekarso.”

³⁰ Ndoŋ nna nɛ Kalɛb kaŋɛ jimaŋ nɛ baa fubel a bile asheŋ a malga a gbiti Mosis na fanɛ b wushi eyur, nseŋ kaŋɛ bumo le: “Men shin nɛ an ya kɔ n sɔ kasawule na. Anyeeŋ tiŋ m pɔɔ bumo so.”

³¹ Ama le nɛ basa nɛ bumo nɛ Kalɛb yɔ na daŋ kaŋɛ: “Anyi maaŋ tiŋ n tu basa na ŋ kɔ kena, ŋkpal manɛ so, b kɔ eleŋ a chɔ anyi.”

³² Nseŋ fara a sa Israɛlebi na efɛ be baru a yɔ kasawule na be kaplɛa so a kaŋɛ le: “Kasawule na gba maŋ la kudɔsawule lela nɛ esa beeŋ tiŋ n dɔ kumo so n nya adɔjibi nɛnɛ m bela basa nɛ b wɔ ndoŋ na. Basa nɛ an wu ndoŋ na malɛ kikɛ la basa tenteŋ gboŋgboŋi nna.

³³ An ka wu basa tenteŋ gboŋgboŋi nɛ b shi Anak be kanaŋ to na, an ki fanɛ alonte nna ashi bumo be anishito.”