Nɔmbɛs 12 - EBƆRƐ BE KAWƆL

Miriam ka nya kasogberge be asheŋ

¹ Miriam nɛ Ɛɛrɔn daŋ malga nna ŋ gbiti Mosis ŋkpal e ka ta Kush be efuli so be eche so.

² Le nɛ b daŋ kaŋɛ: “Mosis nawule so nɛ Enyɛnpe Ebɔrɛ bee bɔla a malga a? E maŋ bɔla anyi alɛ so m malga a?” B ka malga loŋ na nɛ Enyɛnpe Ebɔrɛ nu kusɔ nɛ b kaŋɛ na.

³ Mosis daa kɔ kamubrase nna ga, e daa kɔ kamubrase a chɔ esa kikɛ durnya to.

⁴ Epul na to nɛ Enyɛnpe Ebɔrɛ kaŋɛ Mosis nɛ Ɛɛrɔn nɛ Miriam le: “Menyi besa kikɛ e ba Enyɛnpe be wajɛbu na ase.” Nɛ b lar n yɔ ndoŋ,

⁵ nɛ Enyɛnpe Ebɔrɛ na bɔla kuwɔlpa to m ba yili wajɛbu na be kabuna to nseŋ tre Ɛɛrɔn nɛ Miriam awɔrso, nɛ bumo benyɔ na lar n yɔ anishito.

⁶ Ndoŋ nna nɛ Enyɛnpe Ebɔrɛ kaŋɛ bumo le: “Men kaŋ kusoe n nu ma mmalga ere: Ma e naa bɔla kewuŋkaŋɛ so a lara ma kumu a ŋini anebiana nsaa bɔla edare so a malga bumo kutɔ.

⁷ Ama kananɛ mee malga ma kayɛrbi Mosis bre kutɔ kɔr. Mo nɛ n ta ŋ ki ma basa Israɛlebi be ejuŋkparpo.

⁸ Ma nɛ mo ere bee wu abar nna nsaa malga abar kutɔ. Mannɛ aŋasa to nɛ mee malga mo kutɔ. E nyi kananɛ ma kapɔr du kikɛ! Amoso men maŋ kɔ ekpa nɛ men malga ŋ gbiti ma kayɛrbi Mosis!”

⁹ Amoso Enyɛnpe Ebɔrɛ daŋ nya agbo nna n wɔtɔ Ɛɛrɔn nɛ Miriam, nseŋ lar ndoŋ n yɔ,

¹⁰ nɛ kuwɔlpa na gba lar kakpa nɛ wajɛbu na wɔ na. Ndoŋ nna nɛ keboti pɛ Miriam nɛ mbe kayurwule ki n fuli parr fanɛ ateebi. Ɛɛrɔn ka wu fanɛ keboti pɛ Miriam na,

¹¹ nɛ e kaŋɛ Mosis le: “Jande n nyɛnpe, sa maŋ gberge anyi kusoe ŋkpal kulubi nɛ an wora kawuliso ere so.

¹² Sa maŋ shin nɛ Miriam be kayurwule e ba du fanɛ kebia nɛ e wu mo nio be epun to pɔɛŋ nɛ b kurge mo be kayurwule.”

¹³ Ndoŋ nna nɛ Mosis boŋ to awɔrso ŋ kaŋɛ le: “Enyɛnpe Ebɔrɛ, jande, chɛ Miriam!”

¹⁴ Ndoŋ nna nɛ Enyɛnpe Ebɔrɛ kaŋɛ Mosis le: “Nɛ fanɛ mo tuto e daŋ n tuu echɔl n fɛa mbe anishito, nchɛ ashunu nɛ kumo be anishinyɔr maŋ kraa kɔ mo a? Amoso, ju mo ashi keeyi na to n ya fo nchɛ ashunu pɔɛŋ nɛ e naŋ bɛta m ba ndoŋ.”

¹⁵ Amoso b daŋ lara Miriam keeyi na to nchɛ ashunu nna nɛ e nya alenfia m bɛta m ba pɔɛŋ nɛ Israɛlebi kaa ndoŋ n yɔ

¹⁶ Hazerɔf, n ya wora bumo be keeyi to ashi Paran be keshishɛrsawule so.