Nɔmbɛs 11 - EBƆRƐ BE KAWƆL

Kade nɛ baa tre Tabera na be asheŋ

¹ Israɛlebi na fara nna a fubel a bile asheŋ ŋkpal awurfoŋ nɛ b daa ji so. Enyɛnpe Ebɔrɛ ka nu bumo be nfubel na nɛ e nya agbo nseŋ shin nɛ edɛ ba bumo to m ba chɔɔ bumo be keeyi na to be ekarso.

² Ndoŋ nna nɛ basa na shu ŋ ŋini Mosis fanɛ e chɛ bumo to, nɛ e kule Enyɛnpe Ebɔrɛ nɛ edɛ na duŋ.

³ Amoso b daŋ nase kakpa na be ketre Tabera nna, ŋkpal Enyɛnpe Ebɔrɛ be edɛ ka daŋ chɔɔ bumo be keeyi to ndoŋ so.

Mosis ka lara bejuŋkparpo adushunu be asheŋ

⁴ Kachako nɛ befɔ nɛ b daŋ tu Israɛlebi na a yɔ na fara a yɛlga ajibi ko kenishipereso, ndoŋ nna nɛ Israɛlebi na gba fara a fubel a bile asheŋ a kaŋɛ le: “Anyi maŋ nya eblaŋ kikɛ nɛ an we!

⁵ Ama an ka daa wɔ Ijipt na bre, an daa nya ekɔrɔtɔ kananɛ anyee sha nna a we jiga. Eŋampo nɛ asɔrso nɛ baa tre watamelɔŋ nɛ albasa be eyiri yiri kikɛ wɔ ndoŋ nna nɛ an daa ji anyi be kepar.

⁶ Ama naniere bre, akoŋ gbagba e naa mɔ anyi. Ajibi nɛ baa tre manna na nawule a baa wɔtɔ karechɛ kikɛ!”

⁷ Manna na daa du fanɛ asɔrso wurwurbi ko nna nsaa la kachɔnɔnyifu n fuli n weato.

^8-9 Kanyɛso nɛ a daa tɔr fanɛ bunyaŋ na nɛ b muu amo kachipurso nseŋ wuse amo nɛ a ki nyifu nɛ b daŋɛ amo ŋko n ta amo n wora ekrakashi. Amo alɛ wɔ ebel nna fanɛ bodobodo nɛ b ta ɔlif be ŋku n wora na.

¹⁰ Mosis ka nu basa na kikɛ ka yil ntuŋ so bumo be ewajɛbu na be mbuna ase a fubel a bile asheŋ na nɛ mbe kagbene jija mo ga ŋkpal b ka daŋ shin nɛ Enyɛnpe Ebɔrɛ nya agbo na so.

¹¹ Kumo be kaman nɛ Mosis kule Enyɛnpe Ebɔrɛ ŋ kaŋɛ le: “Manɛ nna nɛ fo shin nɛ le be asheŋ ere tu ma? Manɛ nna nɛ fo nya agbo n wɔtɔ ma loŋ? Manɛ nna nɛ fo ta basa ere be esulɔ kikɛ n sulɔ ma?

¹² Mannɛ ma e di bumo be kedampo ŋko ŋ kurge bumo! Nɛ mannɛ nna nɛ fee sha fanɛ ŋ keta bumo enɔ to fanɛ mbi popɔrbi n yɔ kasawule nɛ fo bɔ ntaŋ n nase kɔnɔ fanɛ feeŋ sa bumo nananyɛnana na so?

¹³ Nnɛ nɛ meeŋ nya eblaŋ n sa basa damta nɛ baa ponte a cha awɔr fanɛ n sa bumo eblaŋ ere kikɛ?

¹⁴ Kushuŋ ere bre du kpakpa ga n sa ma, m maaŋ tiŋ n sɔ basa ere kikɛ be esulɔ n sulɔ!

¹⁵ Nɛ le bre nɛ fee sha kewora ma, kumo ere wu ma kuwɔr nseŋ mɔ ma nɛ n wushi.”

¹⁶ Nɛ Enyɛnpe Ebɔrɛ kaŋɛ Mosis le: “Lara Israɛl be bejuŋkparpo adushunu nɛ basa na bee sa bunyaŋ nɛ b nyi bumo be ashuŋ nɛnɛ, nɛ fo nɛ bumo kikɛ e ba yili Enyɛnpe be wajɛbu na be kabuna.

¹⁷ Meeŋ gbelge m ba ndoŋ m ba malga menyi kutɔ, nseŋ sa bumo eleŋ nɛ n sa fo na, saŋɛ na so baaŋ baa chɛ fo to a keni ma basa so nɛ esulɔ na maaŋ naa la fo nawule peya.

¹⁸ Nɛ fo kaŋɛ basa na malɛ fanɛ b lara kulubi ashi bumo be ŋgbene to nseŋ ki cheembi m ba echefo m ba sɔ eblaŋ. Ŋkpal manɛ so, n nu b ka bee fubel a bile asheŋ fanɛ b maŋ nya eblaŋ nɛ b we, bumo alɛ ka daa wɔ Ijipt be efuli so na bɔ nfe. Naniere ma Enyɛnpe Ebɔrɛ na beeŋ sa menyi eblaŋ nɛ men we amo.

¹⁹ Mannɛ kachɛ koŋwule ŋko nchɛnnyɔ ŋko nchɛnnu ŋko nchɛ kudu ŋko nchɛ adunyɔ nɛ menyeeŋ we eblaŋ na,

²⁰ ama kufɔl lelemu nɛ menyee we amo hale nɛ a fi menyi. Ŋkpal men ka kini ma nsaa fubel a bile asheŋ a kaŋɛ fanɛ men daa nyi gba nna, menyi maŋ lar Ijipt be efuli so so.”

²¹ Nɛ Mosis malɛ kaŋɛ Enyɛnpe Ebɔrɛ le: “Basa ŋgboŋ alfa ashe nɛ mee juŋkpar na nɛ fo kaŋɛ fanɛ feeŋ sa bumo eblaŋ nɛ b we kufɔl lelemu!

²² Hale nɛ an mɔ anyi be mbolpɔ nɛ ana kikɛ ŋko m pɛ teku to be ekɔrɔtɔ kikɛ gba, a kra maaŋ fo bumo.”

²³ Nɛ Enyɛnpe Ebɔrɛ kaŋɛ le: “Kusɔ ko du ma Enyɛnpe na so kpakpa a? K maaŋ chɛr, menyeeŋ wu kusɔ nɛ ŋ kaŋɛ ere ka wora.”

²⁴ Ndoŋ nna nɛ Mosis ya kaŋɛ basa na kusɔ nɛ Enyɛnpe Ebɔrɛ kaŋɛ na, nseŋ shin nɛ bejuŋkparpo adushunu nɛ e daŋ lara na, ba yili ŋ kulti Enyɛnpe be wajɛbu na.

²⁵ Nɛ kuwɔlpa na gbelge m ba nɛ Enyɛnpe Ebɔrɛ malga Mosis kutɔ nseŋ sa bejuŋkparpo adushunu na gba eleŋ nɛ e sa Mosis na. B ka nya eleŋ na nɛ b fara a malga a cha awɔr fanɛ anebiana na. Ama b daa maŋ malga loŋ n chɛr.

²⁶ Bejuŋkparpo adushunu na be benyɔ nɛ b da maŋ lar keeyi na to n yɔ wajɛbu na ase e daa la Eldad nɛ Mɛdad. Ama eleŋ na daŋ ba bumo alɛ gba so nna ashi keeyi na to nɛ b fara a malga a cha awɔr fanɛ anebiana na.

²⁷ Ndoŋ nna nɛ kabrantiɛbia ko shile n ya kaŋɛ Mosis kusɔ nɛ Eldad nɛ Mɛdad bee wora ashi keeyi na to.

²⁸ Nɛ Nun pibinyɛn Joshuwa nɛ e la kabrantiɛbia a chɛ Mosis to na kaŋɛ mo le: “Jande n nyɛnpe, kaŋɛ Eldad nɛ Mɛdad nɛ b yige!”

²⁹ Nɛ Mosis malɛ kaŋɛ le: “Fee kɔ kukɔrkɔ nna a sa ma a? K daa beeŋ par ma ga fanɛ Enyɛnpe Ebɔrɛ ka beeŋ sa mbe basa kikɛ eleŋ nɛ b baa malga fanɛ anebiana!”

³⁰ Ndoŋ nna nɛ Mosis nɛ Israɛl be bejuŋkparpo na bɛta n yɔ keeyi to.

Enyɛnpe Ebɔrɛ ka shuŋi mbuibi nɛ baa tre kweels na be asheŋ

³¹ K maŋ chɛr ko nɛ Enyɛnpe Ebɔrɛ shin nɛ afu ber mbuibi ko nɛ baa tre kweels na ashi teku ase nɛ b ba kaa lɛa lɛa kasawule nseŋ tɔr n deŋi abar so n yɔ emayɛl damta ŋ kulti Israɛlebi be keeyi na to.

³² Amoso nchɛ lelemu anyɔ nɛ basa na wɔtɔ a pɛ mbuibi na. Mbuibi nɛ ekama daŋ pɛ mbe kumu so be egbɛ kikɛ daa sa fanɛ kilo kagboŋ nna. B daŋ ta bumo nna n fata ŋ kulti keeyi na to kikɛ.

³³ Ama pɔɛŋ nɛ b we eblaŋ na, Enyɛnpe Ebɔrɛ daŋ nya agbo n wɔtɔ bumo nna nseŋ shin nɛ kulɔ be aleblawu tɔr bumo so.

³⁴ Ndoŋ nna nɛ b nase kakpa nɛ b puli basa nɛ kulɔ be aleblawu na mɔ na Kibrɔf Hataava. Kumo be kifito e la bejibishapo be nchaŋana.

³⁵ Kumo be kaman nɛ Israɛlebi na koso ndoŋ n ya wora bumo be keeyi to kakpa nɛ baa tre Hazerɔf na.