Nɔmbɛs 10 - EBƆRƐ BE KAWƆL

Gbiti be mbel be asheŋ

¹ Nɛ Enyɛnpe Ebɔrɛ kaŋɛ Mosis le:

² “Ta gbiti m bɛl mbel anyɔ nɛ baaŋ baa foŋ a tre basa na a shɛr abar so ŋko a shin nɛ b baa kaa keeyi to.

³ B baŋ foŋ mbel anyɔ na, basa na kikɛ daga fanɛ b shɛr fo anishito ashi Enyɛnpe be wajɛbu na be kabuna to nna.

⁴ Ama nɛ b foŋ kabel koŋwule bre, kumo ere Israɛl be eyiri kuduanyɔ na be bejuŋkparpoana e daga fanɛ b shɛr fo anishito.

⁵ B baŋ foŋ mbel na gbrɛbi nseŋ yige, kumo ere eyiri nɛ b chena epeŋilarkpa be kaba so na e daga fanɛ b juŋkpar ŋ kaa keeyi to.

⁶ B baŋ naŋ foŋ mbel na gbrɛbi kela nyɔsopo nseŋ yige, eyiri nɛ bumo alɛ chena kelargato be kaseto be kaba so na e naaŋ kaa m bɛ so. Amoso, mbel na be kefoŋ gbrɛbi nseŋ yige, bee ŋini nna fanɛ b kaa keeyi to na.

⁷ Ama nɛ fee sha basa na kikɛ ka shɛr abar so malɛ nna, kumo ere k daga fanɛ b foŋ mbel anyɔ na n chɛr.

⁸ Ɛɛrɔn be kanaŋ to ebi be mbinyɛnsobiana nɛ b la bɔrɛmatapoana e daga fanɛ b baa foŋ mbel na. Loŋ malɛ nɛ k beeŋ ba la hale mbaanaayɔ.

⁹ Nɛ men doŋana kaŋ baa kaa kɔ menyi kena men gbagba be kasawule so nɛ men foŋ mbel na, ma Enyɛnpe Ebɔrɛ na beeŋ nu nseŋ ba mɔlga menyi.

¹⁰ Nɛ men baa ji menyi be kufɔl popɔr be kejigboŋ nɛ kabɔrɛshuŋ be kejigboŋana ko, k daga men baa foŋ mbel na saŋɛ nɛ menyee lara sarga chɔɔso nɛ kɔnɔkoŋwuleso be esarga na nɛ ma nɛ n la men Nyɛnpe nɛ men be Ebɔrɛ na e chɛ menyi to.”

¹¹ Israɛlebi na ka lar Ijipt be kasawule so be kafɛ nyɔsopo to be kufɔl nyɔsopo to be kachɛ adunyɔsopo na nɛ kuwɔlpa nɛ k buu Enyɛnpe Ebɔrɛ be wajɛbu na so na tia a yɔ,

¹² nɛ Israɛlebi na malɛ gba lar Sainai be keshishɛrsawule na so nseŋ pɛ ekpa m bɛ kuwɔlpa na so hale nɛ k ya yili Paran be keshishɛrsawule so.

¹³ Kede e la Israɛlebi na be enite juŋkparso nɛ Enyɛnpe Ebɔrɛ bɔla Mosis so ŋ kaŋɛ bumo fanɛ b koso a yɔ.

¹⁴ Juda be yiri nɛ eyiri nɛ b chena m mata bumo na e daŋ ta bumo be etuuta n juŋkpar n lar. Aminadab pibinyɛn Naashɔn e daa la bumo be benapo be ejuŋkparpo.

¹⁵ Zuwa pibinyɛn Nataniɛl e daa la Isaaka be yiri to be benapo be ejuŋkparpo

¹⁶ nɛ Hɛlɔn pibinyɛn Eliab malɛ daa juŋkpar Zebulun be yiri to be benapo.

¹⁷ B ka bee kaa na nɛ b gboŋi wajɛbu na to nɛ Gɛshɔn nɛ Mɛrari be mbunaebi nɛ b la Livaiebi nɛ bumo be kushuŋ la wajɛbu na be kesulɔ na ta kumo n sulɔ a yɔ.

¹⁸ Nɛ Ruben be yiri nɛ eyiri nɛ b chena m mata bumo na, ta bumo be etuuta m bɛ so a la katuŋ nyɔsopo a yɔ. Shedur pibinyɛn Elizur e daa la bumo be benapo be ejuŋkparpo.

¹⁹ Zurishaddai malɛ pibinyɛn Shelumiɛl e daa la Simiɔn be yiri to be benapo be ejuŋkparpo,

²⁰ nɛ Duwɛl pibinyɛn Eliazaf malɛ daa la Gad be yiri to be benapo be ejuŋkparpo.

²¹ Kohaf be kabuna ebi nɛ b la Livaiebi na be kushuŋ e daa la asɔ cheembi nɛ baa ta a wora asheŋ wajɛbu na to be kebaasulɔ. Ama a daga b ka yuu wajɛbu na keeyi popɔr na to nna pɔɛŋ nɛ bumo kikɛ e fo ndoŋ.

²² Efreim be yiri nɛ eyiri nɛ b chena m mata bumo na malɛ e naaŋ baa la katuŋ sasopo ŋ keta bumo be etuuta m bɛ so. Amihuud pibinyɛn Elishama e daa la Efreim be yiri na to be benapo be ejuŋkparpo.

²³ Pɛdazur pibinyɛn Gamaliɛl e daa la Manase be yiri to be benapo be ejuŋkparpo,

²⁴ nɛ Gidiɔni Pibinyɛn Abidan malɛ la Bɛnjamin be yiri to be benapo be ejuŋkparpo.

²⁵ Dan be yiri nɛ eyiri nɛ a chena m mata bumo na e naaŋ baa la katuŋ lalalogesopo n ta bumo be etuuta a wɔ kaman a kuŋ. Amishadai pibinyɛn Ahieza e daa la Dan be yiri to be benapo be ejuŋkparpo.

²⁶ Okran pibinyɛn Pagiɛl malɛ e daa la Ashɛr be yiri to be benapo be ejuŋkparpo,

²⁷ nɛ Eenan malɛ pibinyɛn Ahira daa la Naftali be yiri to be benapo be ejuŋkparpo.

²⁸ Israɛlebi na baa kaa bumo be keeyi to, kananɛ baa nite kebɛso kebɛso so nna na.

²⁹ B ka bee bela ase nɛ b kaa na, nɛ Mosis kaŋɛ Jetro pibinyɛn Hobab nɛ e la mo ere Mosis mo churo na le: “Anyee bela ase nna nɛ an yɔ kakpa nɛ Enyɛnpe Ebɔrɛ nase kɔnɔ fanɛ e beeŋ sa anyi na. Mo e kaŋɛ fanɛ e beeŋ nɛfa Israɛl, amoso bɛ anyi so, asheŋ beeŋ ya nyalɛ n sa anyi kikɛ.”

³⁰ Nɛ Hobab kaŋɛ le: “M-m ma ere bee bɛta nna a yɔ ma efuli so, amoso m maaŋ yɔ.”

³¹ Nɛ Mosis malɛ kaŋɛ mo le: “Jande, sa maŋ yige anyi, ŋkpal manɛ so, fo e nyi mboŋ nɛ a daga an baa wora anyi be keeyi to a yili saŋkama, amoso fo e naaŋ baa juŋkpar a ŋini anyi akpa.

³² Nɛ fo baŋ tu anyi n yɔ, nɛfa kama nɛ Enyɛnpe Ebɔrɛ beeŋ ta n nɛfa anyi na, fo alɛ gba beeŋ nya ako.”

Basa na ka lar a yɔ be asheŋ

³³ Basa na ka lar kebeegboŋ cheembi nɛ baa tre Sainai na ase, nchɛ asa nɛ b wɔ enite to. Livaiebi na e daa sulɔ ŋkre be deka na a juŋkpar a fin kaboŋ nɛ k daga b wora bumo be keeyi to.

³⁴ Saŋkama nɛ b baŋ kaa keeyi to a yɔ malɛ, Enyɛnpe Ebɔrɛ be kuwɔlpa na daa parga nna a buu bumo so kapaso.

³⁵ Saŋkama nɛ Livaiebi na baŋ ta ŋkre be deka na n lar a yɔ, le nɛ Mosis daa kaŋɛ: “Enyɛnpe Ebɔrɛ, koso ŋ kɔ fo doŋana n shin nɛ b pesaŋ to n shile.”

³⁶ Saŋkama malɛ nɛ b baŋ yili, e bee kaŋɛ le nna: “Enyɛnpe Ebɔrɛ, naŋ bɛta n shin nɛ Israɛl be basa kikɛ e pin fanɛ fo wɔ anyi kutɔ.”