Nshɛ 99 - EBƆRƐ BE KAWƆL

Ebɔrɛ ka la bewura to be ewura be asheŋ

¹ Enyɛnpe Ebɔrɛ na e la ewura! Efuliana kikɛ so be basa e baa chicha. E chena mbe kuwurputi nɛ emalaika nɛ b kɔ aba wɔ kumo be kaseto na so nna; nɛ kasawule bee gbuŋgbuŋ.

² Enyɛnpe Ebɔrɛ na la esagboŋ nna ashi Jerusalɛm to; mo e kɔ eleŋ efuliana na kikɛ so.

³ Ekama beeŋ kpaŋ mbe ketregboŋ nɛ k kɔ eleŋ ga na. Ŋkpal manɛ so, e du cheembi nna.

⁴ Ewura na la esagboŋ nna, nsaa sha kebaaji asheŋ nɛ amo be ekpa so. Mo e yili keji asheŋ nɛ amo be ekpa so ashi Israɛl be efuli so be kaplɛkama.

⁵ Men baa maŋ Enyɛnpe anyi be Ebɔrɛ na so, nsaa bunyaŋ mo ashi mbe kuwurputi ase. Ŋkpal manɛ so, e du cheembi nna.

⁶ Mosis nɛ Ɛɛrɔn daa la mbe bɔrɛmatapoana nna, nɛ anebi Samuɛl malɛ daa la esa nɛ e daa bɔla Ebɔrɛ be ketre to a kule mo. Enyɛnpe Ebɔrɛ na nɛ bumo kikɛ daa shu a tre, nɛ e daa nu a sa bumo.

⁷ E daŋ bɔla kuwɔlpa to nna m malga n sa Mosis nɛ Ɛɛrɔn; nɛ bumo alɛ daŋ wora mbe mbraana nɛ atande nɛ e ta n sa bumo na kasonu.

⁸ O Enyɛnpe anyi be Ebɔrɛ, fo e daŋ nu bumo be kekule, nseŋ ta bumo be alubi m paŋ bumo. Ama b ka naŋ wora kusɔ nɛ k maŋ daga na, fo gberge bumo kusoe nna.

⁹ Anyee kpaŋ fo, Enyɛnpe anyi be Ebɔrɛ na, nsaa bunyaŋ fo ashi fo kebee cheembi na ase. Ŋkpal manɛ so, Enyɛnpe anyi be Ebɔrɛ na du cheembi nna.