Nshɛ 98 - EBƆRƐ BE KAWƆLEnyɛnpe Ebɔrɛ ka bee wora emamachisheŋ be asheŋ 1 Men boŋ kashɛ popɔr n sa Enyɛnpe Ebɔrɛ na! Mo e ta mbe enɔ lempo cheembi na n wora emamachisheŋ ŋ kɔ m pɔɔ so na. 2 Enyɛnpe Ebɔrɛ na lara mbe kumɔlga nɛ kebaawɔtɔ niŋiso ŋ ŋini efuli pɔtɛana so be basa. 3 E nyiŋi mbe kasha nɛ kashenteŋji nɛ e kɔ n sa Israɛlebi na be asheŋ. Bekama nɛ b wɔ kasawule so be kaplɛkama wu anyi be Ebɔrɛ na be kumɔlga. 4 Durnya to be basa kikɛ e boŋ nshɛ kagbenefuliso ŋ kpaŋ Enyɛnpe Ebɔrɛ na. 5 Men laŋ ejaŋjilaŋ m boŋ nshɛ belbelso n sa Enyɛnpe Ebɔrɛ na. 6 Men foŋ mbel m boŋ nshɛ n ji eyur kagbenefuliso; ŋkpal manɛ so, Enyɛnpe anyi be Ebɔrɛ na e la ewura! 7 Shin nɛ teku nɛ kumo to be asɔ keniso kikɛ, nɛ kasawule nɛ kumo so be basa kikɛ e baa wora awɔr a kpaŋ Enyɛnpe Ebɔrɛ na. 8 Shin nɛ elɔrana e baa gbri fanɛ a ka bee kpla enɔ na, nɛ abeebi so e baa gbri fanɛ a ka bee cha abar a boŋ nshɛ kagbenefuliso ashi Enyɛnpe Ebɔrɛ be anishito. 9 Ŋkpal manɛ so, mo e naa ba nɛ e ba ji kuwura kasawule so. E beeŋ ba bɔla ekpa niŋiso so n ji esa kama nɛ e wɔ kasawule so demu nɛ e maŋ kpɛa ekama to. |
© 2015 GILLBT Ghana Institute of Linguistics, Literacy and Bible Translation