Nshɛ 97 - EBƆRƐ BE KAWƆL

Ebɔrɛ ka bee ji asheŋ nɛ amo be ekpa so be asheŋ

¹ Enyɛnpe Ebɔrɛ na e la Ewura! Shin nɛ durnya kikɛ e ji eyur nɛ mplasawule kikɛ e wora awɔr.

² Bɔrɛwɔlpa nɛ tentembiri mina e kulti mo n wɔtɔ kaplɛkama. Mo alɛ bee ji mbe kuwura ekpa niŋiso nɛ keji asheŋ nɛ amo be ekpa so nna.

³ Edɛ e naa juŋkpar mo a chɔɔ mo doŋana kaba kama so a mur.

⁴ Mo e naa shin nɛ bɔrɛ bee nyɛkpɛ nɛ durnya bee fulto, nɛ kasawule so ebi bee wu kumo a chicha.

⁵ Abee bee ŋalga fanɛ kemar ashi Enyɛnpe Ebɔrɛ nɛ e la durnya kikɛ be Enyɛnpe na be anishito nna.

⁶ Ebɔrɛso bee ber mbe kebaawɔtɔ niŋiso be kebomboŋ nna, nɛ efuliana na kikɛ be basa bee wu mbe kemaŋkura.

⁷ Bekama nɛ baa shuŋ agbirana ŋko a puchi amo so na bee ŋaba nna; ŋkpal manɛ so, agbirana kikɛ maŋ la shɛŋ Ebɔrɛ be anishito.

⁸ O Enyɛnpe Ebɔrɛ, Jerusalɛm to nɛ Juda be efuli so be ndeana to be basa be ŋgbene fuli nna, nɛ baa ji eyur ŋkpal fo demuji so.

⁹ Ŋkpal manɛ so, fo, Enyɛnpe Ebɔrɛ na e naa ji kuwura durnya kikɛ ebi so. Fo alɛ shi ga a chɔ agbirana kikɛ.

¹⁰ Bekama nɛ baa sha Enyɛnpe Ebɔrɛ na kishi kulubi nna. Ŋkpal manɛ so, mo e naa kuŋ mbe basa nɛ baa ji kashenteŋ a sa mo na be ŋkpa nsaa kɔ a suge bumo ashi kumukpakpasowuraana be enɔ to.

¹¹ Kefulto bee nyaŋɛ a yuu basa niŋiso so nna, nɛ ŋgbenefufulwuraana malɛ bee nya kagbenefuli.

¹² Menyi nɛ men wɔ kebaawɔtɔ niŋiso to e shin nɛ menyi be ŋgbene e fuli menyi ŋkpal kusɔ nɛ Enyɛnpe Ebɔrɛ na wora so. Men baa nyiŋi kusɔ nɛ Ebɔrɛ cheembi na bee wora nsaa di mo epaŋ.