Nshɛ 96 - EBƆRƐ BE KAWƆL

Men boŋ kashɛ popɔr n sa Enyɛnpe Ebɔrɛ na

¹ Ekama nɛ e wɔ durnya to, e boŋ kashɛ popɔr n sa Enyɛnpe Ebɔrɛ na!

² Men boŋ kashɛ n sa Enyɛnpe Ebɔrɛ na, nseŋ kpaŋ mbe ketre na. Karechɛ kama men baa ber mbe kumɔlga na be asheŋ be kubomboŋ.

³ Men baa malga mbe kemaŋkura nɛ asheŋgboŋ be asheŋ a sa basa nɛ b wɔ efuliana kikɛ so.

⁴ Ŋkpal manɛ so, Enyɛnpe Ebɔrɛ shi ga, nseŋ daga fanɛ ekama e baa kpaŋ mo nsaa ŋana mo a chɔ agbirana kikɛ.

⁵ Efuli pɔtɛana so ebi bee shuŋ agbirana nna; ama Enyɛnpe Ebɔrɛ na e to ebɔrɛso.

⁶ E kɔ kemaŋkura nɛ bunyaŋgboŋ, nɛ eleŋgboŋ nɛ kela bɔlɔ mbe bɔrɛlambu to.

⁷ Durnya to be basa kikɛ e kpaŋ Enyɛnpe Ebɔrɛ na, nseŋ shuli so fanɛ kemaŋkura nɛ eleŋ la mo peya nna.

⁸ Men kpaŋ Enyɛnpe Ebɔrɛ na be ketre nɛ k kɔ kemaŋkura na; nseŋ ta esarga m ba mbe bɔrɛlambu to.

⁹ Men baa yili Enyɛnpe Ebɔrɛ na be kela nɛ kecheembiya so a bunyaŋ. Durnya to ebi kikɛ e ta kechicha chicha m ba mbe anishito.

¹⁰ Men kaŋɛ efuliana na so ebi le: “Enyɛnpe Ebɔrɛ na e la Ewura! Mo e tɔl durnya na n yili dindiŋ nɛ k maa fifir; mo alɛ e naaŋ ji basa kikɛ demu nɛ e maŋ puni eko.”

¹¹ Kaŋɛ esoso nɛ kasawule so ebi fanɛ b shin nɛ bumo be ŋgbene e wushi bumo nɛ b baa ji eyur! Shin nɛ teku nɛ kumo to be asɔ keniso kikɛ e baa wora awɔr,

¹² nseŋ shin nɛ adɔsawule nɛ adɔjibi nɛ a wɔ amo so na gba e ji eyur. Kumo be kaman nɛ kupo to be ndibi kikɛ e boŋ nshɛ kagbenefuliso

¹³ n sa Enyɛnpe Ebɔrɛ na. E bee ba nɛ e ba bɔla ekpa niŋiso nɛ kashenteŋ so nna n ji basa nɛ b wɔ durnya to demu.