Nshɛ 89 - EBƆRƐ BE KAWƆL

Enyɛnpe Ebɔrɛ nɛ Deevid ka wora kɔnɔkoŋwule be ŋkre be asheŋ

¹ O Enyɛnpe Ebɔrɛ, meeŋ baa boŋ nshɛ a laŋɛ fo kasha nɛ k maŋ kɔ ekar na be kaplɛa so jemanɛ kikɛ. Ma alɛ beeŋ naa ber fo kashenteŋji na be kebomboŋ mbaanaayɔ.

² Meeŋ kaŋɛ ekama fanɛ fo kasha wɔtɔ nna mbaanaayɔ, nɛ fo kashenteŋji malɛ wɔ ebɔrɛso jemanɛ kikɛ.

³ Fo yɛ: “Ma nɛ esa nɛ n lara na wora kɔnɔkoŋwule be ŋkre nna. Ma alɛ nase kɔnɔ nna n sa ma kayɛrbi Deevid fanɛ

⁴ mbe kaman to ebi e naaŋ baa ki bewura jemanɛ kikɛ. Ma alɛ beeŋ shin nɛ mbe kabuna ebi e baa wɔtɔ mbaanaayɔ.”

⁵ O Enyɛnpe Ebɔrɛ, shin nɛ asɔ nɛ a wɔ ebɔrɛso e baa kpaŋ fo emamachisheŋ, nseŋ shin nɛ fo emalaika e baa kpaŋ fo kashenteŋji.

⁶ Ekama maŋ du fanɛ fo, Enyɛnpe Ebɔrɛ na ashi ebɔrɛso; Ekama malɛ maaŋ tiŋ n ta mbe kumu m ber fo ashi ndoŋ.

⁷ Fo nɛ ekama bee ŋana ga ashi ebɔrɛso ndoŋ. Fo asheŋ malɛ bee keta kufu nsaa kɔ bunyaŋ ga a chɔ bekama nɛ b wɔ ebɔrɛso.

⁸ Fo e la Enyɛnpetale Ebɔrɛ na. Ekama maŋ naa kɔ kasha nsaa ji kashenteŋ fanɛ fo.

⁹ Fo e naa ji kuwura ashi teku nɛ k bee baga to na so, a shin nɛ atili nɛ a bee koso kumo so na bee wora shruum.

¹⁰ Fo e daŋ to m pɛ teku to be kusɔbɔya lubi gboŋgboŋi nɛ baa tre Reehab na to kpakpa nseŋ mɔ kumo na. Fo gbagba be eleŋgboŋ nɛ fo ta m pɔɔ fo doŋana so, nseŋ shin nɛ b pesaŋ to n sɔ kaplɛkama.

¹¹ Ebɔrɛso nɛ kasawule so kikɛ la feya nna; fo e to durnya nɛ kusɔ kama nɛ k wɔ kumo to.

¹² Fo e to kelargato be esoso nɛ kaseto kikɛ. K du fanɛ abee nɛ baa tre Tabɔɔ nɛ Hɛɛmɔn na bee boŋ nshɛ kagbenefuliso nna a kpaŋ fo ketre.

¹³ Fo shibi nsaa kɔ eleŋ pasaa!

¹⁴ Fee ji kuwura ekpa niŋiso so, nsaa ji asheŋ nɛ amo be ekpa so nna. Kasha nɛ kashenteŋji bee dii efuli kusɔ kama nɛ fee wora to nna.

¹⁵ O Enyɛnpe Ebɔrɛ, kagbenefuli la bekama nɛ baa bugi ŋgbene to a bunyaŋ fo nsaa wɔ fo kefultogboŋ na to na peya nna.

¹⁶ Baa ji eyur nna ashi fo ketre to karechɛ lelemu kikɛ, nsaa kpaŋ fo ŋkpal fo alelasheŋ so.

¹⁷ Ŋkpal manɛ so, bumo be kemaŋkura nɛ eleŋ shi fo kutɔ nna, nɛ fo kuwɔrwu malɛ bee shin nɛ anyee nya eleŋ a ti so.

¹⁸ Kashenteŋto, anyi be kekuŋ bee shi Enyɛnpe Ebɔrɛ na kutɔ nna. Israɛl be Ebɔrɛ cheembi na e la anyi be ewura.

¹⁹ Le nɛ fo daŋ bɔla bɔrɛdare to ŋ kaŋɛ fo bebɛsopo nɛ baa ji kashenteŋ a sa fo na: “Ma e naa sa enapo eleŋ. Ma alɛ e ta kuwurputi na n sa esa nɛ ŋ gbagba lara ashi ma basa to.

²⁰ Ma e lara ma kayɛrbi Deevid nseŋ duga ma ŋku cheembi n do mbe kumu so n ta mo ŋ ki ewura.

²¹ Jemanɛ kikɛ ma eleŋ beeŋ baa wɔ mo so, nɛ ma eleŋgboŋ na e baa sa mo eleŋ.

²² Mo doŋana maaŋ tiŋ m pɔɔ mo so kikɛ, kumukpakpasowuraana gba beeŋ kɔ mo ŋ gben.

²³ Meeŋ tɔrɔ mo doŋana ga nseŋ mɔ ekama nɛ e kishi mo.

²⁴ Ma kashenteŋji be kasha na beeŋ baa wɔ mo so; ma alɛ beeŋ shin nɛ e baa kɔ a pɔɔ so jemanɛ kikɛ.

²⁵ Meeŋ shin nɛ mbe kuwurji e yili Teku nɛ baa tre Mɛditerenia na n salga to n ya fo lɔr nɛ baa tre Yufreetes na.

²⁶ Ndoŋ nna nɛ e kaŋɛ ma le: ‘Fo e la n tuto nɛ ma Ebɔrɛ; Fo e la ma ekumpo nɛ ma emɔlgapo.’

²⁷ Meeŋ shin nɛ e ki ma wurkoŋnyɛn, nseŋ ki esagboŋ a chɔ durnya to be bewura kikɛ.

²⁸ Jemanɛ kikɛ meeŋ baa wora a bɔlɔ ma nnɔ nɛ n nase a sa mo; nɛ ma nɛ mo be kɔnɔkoŋwule be ŋkre na e baa wɔtɔ mbaanaayɔ.

²⁹ Meeŋ shin nɛ mbe kabuna ebi e baa ji kuwura mbaanaayɔ; mbe kanaŋ to be esa e naaŋ baa ji kuwura jemanɛ kikɛ.

³⁰ Ama nɛ fanɛ mbe kaman to ebi kini kewora ma mbraana kasonu, nseŋ kini kewora m bɔlɔ ma atande so,

³¹ ŋko nɛ b kplaŋ ma keŋini so nsaa maŋ bɛ ma mbraana so,

³² kumo ere meeŋ gberge bumo kusoe ŋkpal bumo be alubi so. Meeŋ shin nɛ b ji awurfoŋ ŋkpal bumo be kewora n jija so.

³³ Ama m maaŋ yige kebaasha Deevid, ŋko ŋ kini kebɛ nnɔ nɛ n nase n sa mo na so.

³⁴ Ma alɛ maaŋ ku ma nɛ mo be kɔnɔkoŋwule be ŋkre na to, ŋko n lar nnɔ nɛ n nase n sa mo na be kekama kaman.

³⁵ Kelekoŋwule pati nɛ n ta ma Ketre cheembi na m bɔ ntaŋ fanɛ, m maaŋ ku efɛ n sa Deevid kikɛ.

³⁶ Mbe kanaŋ to ebi e naaŋ baa ji kuwura jemanɛ kikɛ. Kananɛ epeŋi nɛ kufɔl baa lar awɔlpa so ere, aloŋ nɛ mbe kuwurji gba beeŋ baa wɔtɔ mbaanaayɔ.

³⁷ Mbe kuwurji na beeŋ baa wɔtɔ mbaanaayɔ nna fanɛ kananɛ kufɔl baa wɔ esoso mbaanaayɔ na.”

³⁸ Ama naniere fo, Ebɔrɛ na nya agbo nna n wɔtɔ ewura nɛ fo lara na nseŋ kini mo n lɛ, nseŋ pal kaman n sa mo.

³⁹ Fo lar fo nɛ fo kayɛrbi be kɔnɔkoŋwule be ŋkre na kaman kuraa nseŋ shin nɛ mbe kuwura terge m paŋ kumo be kemaŋkura kikɛ.

⁴⁰ Fo shin nɛ egbal nɛ a kulti kadegboŋ na kikɛ bure nɛ kumo be mboŋ lempoana na kikɛ ki alambure a dese.

⁴¹ Bekama nɛ b bɔla kumo ase a choŋ nya ewura na be asɔ ko n ta, nɛ mbe bechenashapoana bee mushe mo nsaa wora mo eyurto.

⁴² Fo shin nɛ mo doŋana sɔ kelempo mo so, nɛ bumo kikɛ be ŋgbene fuli bumo.

⁴³ Fo shin nɛ mbe akɔsɔ kikɛ ki asɔ jiga, nseŋ shin nɛ e kɔ kena n tɔr.

⁴⁴ Fo suge mbe kuwurwuro n shin nɛ mbe kuwura paŋ kumo be kemaŋkura.

⁴⁵ Fo shin nɛ e bel katinso nɛ e kraa la kebifɔlbi, nseŋ ta anishinyɔr be piŋi m buu mo nɛ nyɔmɔ pɛ mo.

⁴⁶ O Enyɛnpe Ebɔrɛ, feeŋ ta fo kumu ŋ ŋana mbaanaayɔ a? Jemanɛ mo nɛ fo agbo nɛ k bee suse fanɛ edɛ na beeŋ wushi?

⁴⁷ Baa nyiŋi fanɛ ma ŋkpa maŋ wɔ nteŋ. Fo to anyi nna nɛ an baa wɔ ŋkpa to gbrɛbi nseŋ wu!

⁴⁸ Dimɛdi kikɛ maaŋ tiŋ n suge mbe kumu ashi luwu nɛ nchaŋ be eleŋana to.

⁴⁹ O Enyɛnpe Ebɔrɛ, nnɛ nɛ kashagboŋ nɛ fo daa kɔ na wɔ? Nnɔ nɛ fo nase kashenteŋ be ekpa so n sa Deevid na wɔ nnɛ?

⁵⁰ Enyɛnpe Ebɔrɛ baa nyiŋi kananɛ basa tege ma nseŋ wora fo kayɛrbi eyurto, nɛ n ta amo kikɛ n wɔtɔ kagbene to na be asheŋ.

⁵¹ O Enyɛnpetale Ebɔrɛ, fo doŋana bee tege ewura nɛ fo lara n sa fo kumu nna na. Kaplɛkama nɛ e yɔ, baa tege mo nsaa wora mo eyurto nna.

⁵² Men baa kpaŋ Enyɛnpe Ebɔrɛ na mbaanaayɔ! Amɛn! Amɛn!