Nshɛ 78 - EBƆRƐ BE KAWƆL

Kusɔ nɛ Ebɔrɛ wora n sa mbe basa be asheŋ

¹ Ma basa, men nu ma keŋini ere, nseŋ nu kusɔ nɛ mee kaŋɛ ere nɛnɛ.

² Meeŋ ta kanyiasheŋ be mmalga m bugi wulo to be mmalga nɛ a choŋ na to.

³ A la asheŋ nɛ an nu nsaa nyi nna, nsaa la asheŋ nɛ an nanaana kaŋɛ anyi na nna.

⁴ Anyi maaŋ ta amo ŋ ŋana anyi be mbia so. Anyeeŋ malga Enyɛnpe Ebɔrɛ na be eleŋgboŋ nɛ mbe asheŋgboŋ nɛ emamachisheŋ nɛ e wora na be asheŋ n sa anyi be mbia nɛ baaŋ ba anyi be kaman na.

⁵ Mo e ta mbe mbraana n sa Israɛl be basa nɛ b la Jeekɔb be kaman to ebi na. Mo e kaŋɛ an nanaana fanɛ b baa ŋini bumo be mbia mbe mbraana na;

⁶ saŋɛ na so mbia nɛ baaŋ ba kaman to na beeŋ koya amo nseŋ ŋini bumo alɛ be mbia amo.

⁷ Aloŋ e naŋ shin nɛ mbia na gba e ta bumo be yirda n wɔtɔ Ebɔrɛ to nsaa maŋ teŋ asɔ nɛ e wora so. Saŋɛ na so, jemanɛ kikɛ baaŋ baa wora mbe mbraana na kasonu.

⁸ Bumo ere maaŋ baa du fanɛ bumo nanaana nɛ b daŋ lar Ebɔrɛ kaman nseŋ kini kewora mo kasonu, nɛ bumo be yirda ashi Ebɔrɛ to daa maa yil to kpakpa, nɛ b maŋ ji kashenteŋ n sa mo na.

⁹ Kena be kachɛ ka fo, Efrayimebi nɛ b daa kɔ ata nɛ atanyembi to na daŋ lara keya nna n shile.

¹⁰ B daa maŋ wora m bɔlɔ bumo nɛ Ebɔrɛ be kɔnɔkoŋwule be ŋkre na so. B daŋ kini kewora mbe mbraana kasonu nna.

¹¹ B daŋ teŋ kusɔ e wora so nna, emamachisheŋ nɛ b daŋ wu e ka wora na kikɛ nɛ b daŋ teŋ so.

¹² Bumo nanaana be anishito nɛ e daŋ wora emamachisheŋ na. Ijipt be efuli so be kebonfu nɛ baa tre Zowan na so nɛ e daŋ wora amo.

¹³ E daŋ shin nɛ teku na ku to nna, nseŋ shin nɛ nchu na ki fanɛ egbal a yil, nɛ e juŋkpar bumo m bɔla kumo to n choŋ.

¹⁴ E daa bɔla kuwɔlpa so nna a ŋini bumo ekpa kapaso, nseŋ daa bɔla edɛ be kabulpi so a ŋini bumo ekpa kanyɛso malɛ.

¹⁵ E daŋ shin nɛ afalta pante a lar nchu a shile fanɛ mbombi nna ashi keshishɛrsawule so nɛ b nya nchu n nuu bumo be kepar.

¹⁶ Mo e daŋ shin nɛ nchu shi kefalta to n lar a shile fanɛ lɔr na.

¹⁷ Ama b kraŋ wora alubi n da Enyɛnpetale Ebɔrɛ so; nseŋ lar mbe kaman ashi keshishɛrsawule na so.

¹⁸ B daŋ kute nna n wora Ebɔrɛ ŋ keni; jemanɛ nɛ b daa yil mo so fanɛ e sa bumo ajibi nɛ b daa sha ga na.

¹⁹ B daŋ malga nna ŋ gbiti Ebɔrɛ ŋ kaŋɛ le: “Ebɔrɛ beeŋ tiŋ n sa anyi ajibi kiyi ere to nfe nna ere a?

²⁰ E ka daŋ shin nɛ kefalta na pante na, nchu daŋ lar a shile fanɛ mbombi na. Ama e kraa beeŋ tiŋ n sa anyi ajibi nna ere a? E beeŋ tiŋ n sa mbe basa eblaŋ nna ere a?”

²¹ Enyɛnpe Ebɔrɛ na ka nu kusɔ nɛ b kaŋɛ na, nɛ e nya agbo ga nseŋ shin nɛ mbe edɛ suse so ashi mbe basa nɛ b la Jeekɔb be kaman to ebi to,

²² ŋkpal b ka daa maŋ yirda mo nseŋ daŋ ji mbe kumɔlga be eleŋ emɔrɔ so.

²³ Ama e daŋ naŋ malga n sa awɔlpa nseŋ daŋ bugi esoso be mbuna

²⁴ nɛ ajibi nɛ baa tre manna na tɔr to nɛ basa na nya n ji. Ebɔrɛso be ajibi nɛ e daŋ sa bumo.

²⁵ Amoso emalaika be ajibi nɛ b daŋ nya n ji; Ebɔrɛ daŋ sa bumo ajibi kama nɛ baaŋ tiŋ n ji nna.

²⁶ Kumo be kaman nɛ Ebɔrɛ be eleŋgboŋ shin nɛ afu shi epeŋilarkpa, a laŋɛ kelargato be kaseto be kaba so na ber m ba.

²⁷ Afu na daŋ sulɔ mbuibi ko nna m ba sɔ kasawule na kikɛ so fanɛ teku ase be eshishɛr na.

²⁸ Basa na be keeyi to gbagba nɛ Ebɔrɛ shin nɛ mbuibi na tɔr ŋ kulti bumo be ewajɛbu n wɔtɔ.

²⁹ Ndoŋ nna nɛ b pɛ bumo m mɔ n we m moɛ. Ŋkpal manɛ so, Ebɔrɛ e daŋ sa bumo asɔ nɛ b daa sha ga nseŋ daa kɔ a fin amo na.

³⁰ Ama b daa maŋ naŋ nya amo n we bumo be keparso gba, a kraa wɔ bumo be nnɔ to nna

³¹ nɛ Ebɔrɛ be agbo koso bumo so, nɛ e shin nɛ bumo to be belempo wu. Israɛl be efuli so be mbifɔlbi e daŋ wu na.

³² Ama amo nɛ amo kikɛ, b kraa wora alubi nna. Emamachisheŋ nɛ Ebɔrɛ wora na kikɛ be kaman, b kraa maŋ yirda mo.

³³ Amoso e daŋ shin nɛ bumo be ŋkpa ku so nna, nseŋ daŋ shin nɛ kufugboŋ ko tɔr bumo so.

³⁴ Jemanɛ kikɛ nɛ Ebɔrɛ baŋ shin nɛ bumo be beko wu, bumo nɛ b ka na bee tuba nna nsaa kule mo kenishipere so.

³⁵ B daŋ nyiŋi fanɛ Ebɔrɛ la bumo be ekumpo nna, nseŋ daŋ naŋ nyiŋi fanɛ Enyɛnpetale Ebɔrɛ e la bumo be emɔlgapo.

³⁶ Ama bumo be nnɔ to be mmalga kikɛ la efɛ nna. Asheŋ kama nɛ baa malga maa shi bumo be ŋgbene to.

³⁷ B daa maa ji kashenteŋ a sa mo; bumo alɛ daa maa bɛ mo nɛ bumo be kɔnɔkoŋwule be ŋkre so.

³⁸ Ama Ebɔrɛ kraa wu mbe basa kuwɔr. E daŋ ta bumo be alubi m paŋ bumo nna, nsaa maŋ mur bumo. Ale damta nɛ e pɛ mbe kagbene, a maŋ shin nɛ mbe agbo koso bumo so alegaiso.

³⁹ E daŋ nyiŋi fanɛ b la eyur nɛ ŋklaŋ nna. B du fanɛ afu nɛ k bee ber a yɔ a maŋ naa laŋɛ nna.

⁴⁰ Jemanɛ nɛ b daa wɔ keshishɛrsawule na so na, ale damta nɛ b daŋ lar Ebɔrɛ kaman n jija mbe kagbene!

⁴¹ B daŋ baa wɔtɔ nna a wora mo a keni, nsaa wɔtɔ Israɛl be Ebɔrɛ cheembi na ebesa to.

⁴² B daa maa nyiŋi mbe eleŋ nɛ e kɔ, bumo alɛ daa maa nyiŋi kachɛ nɛ e mɔlga bumo ashi bumo doŋana be enɔ to na gba.

⁴³ B daŋ teŋ emamachisheŋ nɛ e wora ashi Zowan be kebonfu so ashi Ijipt be efuli so na nna.

⁴⁴ Ebɔrɛ e daŋ shin nɛ Ijipt be elɔrana be nchu kilgi ŋ ki ŋklaŋ nɛ b daa maŋ nya nchu nuuso na.

⁴⁵ E daŋ shin nɛ ashushombi ba sɔ kaplɛkama a tɔrɔ bumo nna; nɛ ebɔl lar bumo. E daŋ shin nɛ epulo ba ta kenishi m pere bumo ashi kasawule na so nna ga.

⁴⁶ E daŋ shin nɛ elotɔr nɛ alonte lar nna m ba mur bumo be adɔjibi kikɛ kasawule na so.

⁴⁷ E daŋ shin nɛ abɔrɛjembubi ba mur bumo be ndibi sɔrsoana nna, nseŋ shin nɛ kunyɔlɔ malɛ mur bumo be figi be ndibi kikɛ.

⁴⁸ Mo e shin nɛ abɔrɛjembubi bri bumo be ana m mɔ, nseŋ shin nɛ bɔrɛ nyɛkpɛ m mɔ bumo be asɔbɔya nɛ a ka na.

⁴⁹ Ebɔrɛ daŋ nya agbo nna nɛ mbe kagbene koso bumo so ga, fanɛ luwu be mbɔ damta ka mel abar so na.

⁵⁰ E daa maŋ pɛ mbe kagbene ashi mbe agbo na to, ŋko n yige m paŋ bumo nɛ b ji efute kikɛ. E daŋ mɔ bumo nna n shin nɛ kenishi pere bumo.

⁵¹ E daŋ shin nɛ Ijipt be efuli so be ewurkoŋnyɛn kikɛ wu nna.

⁵² Kumo be kaman nɛ Ebɔrɛ juŋkpar mbe basa fanɛ mbolpɔkpapo n lar Ijipt be efuli so m bɔla keshishɛrsawule so n choŋ.

⁵³ E ka daa juŋkpar bumo so, kufu daa maa kɔ bumo; ama Teku Peper na daŋ mur bumo doŋana bre nna.

⁵⁴ Ebɔrɛ daŋ juŋkpar mbe basa nna n yɔ kepreŋsawule nɛ e bɔla mbe eleŋgboŋ so n suge n sa bumo na so.

⁵⁵ E daŋ ju efuli pɔtɛana na be basa nna n lar nseŋ barga kasawule na nɛ bumo be nwuana to n sa Israɛl be eyiri yiri nɛ b la mbe basa na.

⁵⁶ Ama b daŋ lar Ebɔrɛ kaman nseŋ wora Enyɛnpetale Ebɔrɛ na ŋ keni nna. B daa maŋ bɛ mbe mbraana so.

⁵⁷ B daa du fanɛ bumo nanaana nɛ b daa maa ji kashenteŋ nseŋ paŋ yirda na nna. Bumo alɛ daa du fanɛ ketanyembi kɔnto nɛ esa maaŋ tiŋ n fute n yige kumo so nna.

⁵⁸ B daŋ pɔr agbirana nna n yili agurɔŋgu so a shuŋ; n shin nɛ Ebɔrɛ be kukɔrkɔ koso nɛ e nya agbo ga.

⁵⁹ Ŋkpal kusɔ nɛ b wora na so, Ebɔrɛ daŋ nya agbo nna nseŋ kini Israɛl be basa na n lɛ.

⁶⁰ E daŋ kini mbe wajɛbu nɛ e daa wɔ kumo to ashi mbe basa to ashi Shilo be kade to nna n lɛ.

⁶¹ Kumo be kaman nɛ e shin nɛ an doŋana kɔ n suge kɔnɔkoŋwule be ŋkre be deka nɛ k yili n sa mbe kemaŋkura nɛ eleŋgboŋ na.

⁶² E daŋ nya agbo nna n wɔtɔ mo gbagba be basa nseŋ shin nɛ bumo doŋana mɔ bumo.

⁶³ Edɛ e daŋ mur bumo be mbrantiɛbia, nɛ bumo be besuŋgurbi maŋ nya benyɛn nɛ b kil.

⁶⁴ Bɔrɛmatapoana na daŋ wu luwu nyaŋgraŋ nna, bumo be bekulpoche maŋ nya n shu bumo be nli gba.

⁶⁵ Kumo be kaman nɛ Enyɛnpe Ebɔrɛ na kpa niŋi to fanɛ esa ka tiŋi edi to, ŋko enapo ka diewu ŋ koso na.

⁶⁶ E daŋ bri mo doŋana nna n ju, n shin nɛ b ji nyɔmɔ mbaanaayɔ.

⁶⁷ Ama e daŋ kini kebaawɔ an nananyɛn Josɛf be kaman to ebi to nseŋ daŋ kini kelara Efrayim be yiri to ebi n yili n sa mbe kumu nna.

⁶⁸ Juda be yiri to ebi nɛ Zayɔn be kebee nɛ e daa sha ga ashi Jerusalɛm to na nɛ e daŋ lara n yili n sa mbe kumu.

⁶⁹ Kumo be awɔlto, nɛ e daŋ pɔr mbe bɔrɛlambu nɛ kumo be gbaltɔlase daa kɔ eleŋ fanɛ kasawule nɛ e to n yili mbaanaayɔ na.

⁷⁰ Ewura Deevid nɛ e daa kpa mbolpɔ na nɛ e daŋ lara fanɛ mbe kayɛrbi.

⁷¹ Mbolpɔ na be kekpa to nɛ e daa wɔ nɛ Ebɔrɛ lara mo nseŋ buu mo Israɛl be kuwura nɛ e baa juŋkpar mbe basa nɛ b la Jeekɔb be kaman to ebi na.

⁷² Ewura Deevid malɛ daŋ ta kagbene koŋwule n juŋkpar bumo nseŋ wora asheŋ kanyiasheŋ so ashi bumo to nna.