Nshɛ 77 - EBƆRƐ BE KAWƆL

Ebɔrɛ ka wɔ mbe basa to tɔrɔ be jemanɛ be asheŋ

¹ N shu n tre Ebɔrɛ nna a fin kechɛto. Ŋ ka shu n tre mo, nɛ e nu ma kushu na.

² Enyɛnpe Ebɔrɛ na nɛ mee kule tɔrɔ be jemanɛ; mee maŋ ma enɔana so kanyɛ na kikɛ nna ashi kabɔrɛkule to, ama n daa maŋ nya kagbenewushi.

³ N daŋ nyiŋi fo Ebɔrɛ na nna, nseŋ tekeŋto; n fɛ nfɛra ga, nɛ aba pɔ ma.

⁴ Ŋkpal fo, Enyɛnpe Ebɔrɛ na so, m maŋ tiŋ nɛ n di. Ewushi kikɛ maŋ wɔ ma to, m maŋ tiŋ nɛ m malga gba.

⁵ Mee fɛ nchɛ nɛ a choŋ na nɛ nfɛ dra na be asheŋ nna.

⁶ Mee nyiŋi kanyɛso kikɛ be nshɛ nɛ n daa boŋ, nsaa fɛ nfɛra ga na nna, a bishi ma kumu le:

⁷ “Enyɛnpe Ebɔrɛ na kini anyi nna n lɛ le mbaanaayɔ a? E maaŋ naŋ wu anyi kuwɔr a?

⁸ Mbe kasha nɛ k maŋ kɔ ekar na loge anyi so nna ere a? Mbe nnɔ naseso na malɛ gba ba ekar nna ere a?

⁹ Ama Ebɔrɛ teŋ so kananɛ baa wu kuwɔr nna a? E kpal agbo so m pɛ mbe kuwɔrwu be kasha nna ere a?”

¹⁰ Ade be kaman nɛ n fɛ le: “Enyɛnpetale Ebɔrɛ, kusɔ nɛ k baa tɔrɔ ma ga e la fo ka maŋ naa ta fo eleŋgboŋ na a chɛ anyi to na.

¹¹ Enyɛnpe Ebɔrɛ, meeŋ baa nyiŋi fo asheŋgboŋ nɛ emamachisheŋ nɛ fo wora dra dra na be asheŋ.

¹² Meeŋ baa fɛ asheŋ tumase nɛ fo wora na kikɛ be asheŋ.

¹³ O Ebɔrɛ, kusɔ kama nɛ fee wora du cheembi nna. Kegbir kikɛ maŋ shi nsaa kɔ eleŋ fanɛ fo.

¹⁴ Fo nawule e la Ebɔrɛ nɛ e bee wora emamachisheŋ; nsaa ŋini fo eleŋgboŋ ashi efuliana na be basa to.

¹⁵ Fo eleŋgboŋ na nɛ fo ta m mɔlga fo basa nɛ b la Jeekɔb nɛ Josɛf be kaman to ebi na.

¹⁶ O Ebɔrɛ, kewora fanɛ teku be nchu na ka wu fo, kufu pɛ amo nna nɛ kumo be kechimbi to baga to m pulgi to kufuso.

¹⁷ Abɔrɛwɔlpa daŋ chulgi bɔrɛchu nna n wurge to; nɛ bɔrɛ nyɛkpɛ awɔlpa to nseŋ ponte to.

¹⁸ Bɔrɛ na ka nyɛkpɛ m ponte to nɛ kusɔ kikɛ nu kumo. K ka nyɛkpɛ na nɛ durnya kikɛ fulto. K ka ponte to na nɛ kasawule gbuŋgbuŋ to fanɛ k kaa bee chicha na.

¹⁹ Fo daŋ nase ekpa teku be nchugboŋ na to nna, nɛ k wora fanɛ fo ka bɔla kumo to n choŋ; ama esa maŋ wu fo aya ka dese.

²⁰ Fo daŋ bɔla Mosis nɛ Ɛɛrɔn so nna n juŋkpar fo basa fanɛ mbolpɔkpapo na.”