Nshɛ 73 - EBƆRƐ BE KAWƆL

KESASOPO ( Nshɛ 73—89 ) Ebɔrɛ ka walɛ be asheŋ

¹ Kashenteŋto, Ebɔrɛ walɛ n sa Israɛl nɛ bekama nɛ baa bunyaŋ mo nɛ ŋgbene fuful na.

² Ama ma ere, a daŋ ka gbrɛ nɛ n fɛrge n tɔr.

³ Ŋkpal manɛ so, ŋ ka daŋ wu kamoowuwuraana ka dii kedama na, n daa besa bumo eyur nna.

⁴ B maa ji awurfoŋ ŋko ebesa kikɛ; b baa kɔ eyur be alenfia nɛ eleŋ nna.

⁵ B maa ji awurfoŋ nɛ beko bee ji na; bumo alɛ maŋ naa kɔ etɔrɔ nɛ ekama kɔ na.

⁶ Amoso kamoowu ki fanɛ kubɔtoshembi ashi bumo be ebɔ to nna, nɛ kebaanyaŋɛto a wora asheŋ malɛ ki fanɛ bumo be asɔbuuso.

⁷ Asheŋ lubi nawule e naa shi bumo be ŋgbene to a lar, nɛ ŋkre lubi malɛ bɔlɔ bumo be nfɛra to.

⁸ Baa tege basa nna nsaa malga mmalga jiga, nseŋ naa kre beko be kamɛaŋ kamoowuso.

⁹ Baa malga mmalga lubi a gbiti Ebɔrɛ nna, nsaa malga ŋkpensheŋ so ekama kutɔ durnya to.

¹⁰ Amoso Ebɔrɛ be basa gba maŋ naa fɛ bumo be mmalga na be asheŋ pɔɛŋ nsaa yirda bumo.

¹¹ Le nɛ baa kaŋɛ: “Enyɛnpetale Ebɔrɛ na maaŋ tiŋ m pin kusɔ kikɛ!”

¹² Kananɛ kumukpakpasowuraana du nna na. B maŋ ta asheŋ lubi fanɛ asheŋ lubi; bumo alɛ bee dii kedama a ti so nna.

¹³ Manɛ be tɔnɔ nɛ n nya ashi ma kebaakɔ nfɛra lela, nɛ kekini kewora asheŋ lubi to bre?

¹⁴ O Ebɔrɛ, fo shin nɛ n ji awurfoŋ kachɛ lelemu. Kachipurso kikɛ fee gberge ma kusoe nna.

¹⁵ Nɛ n daŋ malga mmalga lubi nna, ndafanɛ n daa beeŋ ki edebɔrpo fo basa to.

¹⁶ Kedaa du kpakpa n sa ma nɛ n tiŋ m pin asheŋ ere kikɛ to.

¹⁷ Ebɔrɛ be bɔrɛlambu to nɛ n yɔ pɔɛŋ nseŋ ya pin kusɔ nɛ k beeŋ tu kumukpakpasowuraana.

¹⁸ Abaanaaworasheŋ feeŋ shin nɛ b fɛrge n tɔr nsaa maŋ naŋ tiŋ ŋ koso kikɛ.

¹⁹ Baaŋ mur epul to nɛ kufu e pɛ bumo nɛ b baa chicha. Bumo be lalaloge beeŋ lubi pasaa!

²⁰ Baaŋ baa du fanɛ edare nɛ kare beeŋ chɛ nɛ k choŋ na nna. O Enyɛnpe Ebɔrɛ, fo baŋ kpa n niŋi to, baaŋ foe fanɛ afu.

²¹ Ma kagbene to ka daa ji edɛ ŋkpal kusɔ nɛ k daa wora so na,

²² kawulisheŋ nɛ kebaamaŋ nyi asheŋ e daa kɔ ma, nɛ n daa wora asheŋ fo anishito fanɛ kusɔbɔya na.

²³ Ama amo nɛ amo kikɛ ŋ kraa wɔ fo kutɔ jemanɛ kikɛ. Fo daa kɔ ma to fo enɔ jisa to nna.

²⁴ Fo kasotoji e daa ŋini ma kananɛ meeŋ baa wora asheŋ, kumo be lalaloge nɛ fo ba ta ma n yɔ kemaŋkura to.

²⁵ M maŋ naa kɔ esa kikɛ ebɔrɛso n naŋ ti fo so. Ŋ ka baa kɔ fo ere, m maŋ naa sha shɛŋ durnya ere to.

²⁶ Ma eyur nɛ nfɛra beeŋ tiŋ n wora asheŋ ŋ gben, ama Ebɔrɛ e la ma eleŋ ashi ma kagbene to. Mo alɛ be asheŋ a tir ma jemanɛ kikɛ.

²⁷ O Enyɛnpe Ebɔrɛ, bekama nɛ b kplaŋ fo so beeŋ mur cheche. Fo alɛ beeŋ mur bekama nɛ b maŋ ji kashenteŋ n sa fo.

²⁸ Ama k walɛ ga ŋkpal ma ere ka taga fo, Ebɔrɛ na, to so. N ta fo, Enyɛnpetale Ebɔrɛ na, fanɛ ma ekumpo nna. Ma alɛ beeŋ baa bɔ fo emamachisheŋ na be kubɔya.