Nshɛ 69 - EBƆRƐ BE KAWƆL

Esa ka beeŋ tiŋ n yirda Ebɔrɛ be asheŋ

¹ O Ebɔrɛ, mɔlga ma. Ŋkpal manɛ so, nchu bɔlɔ n fo ma kubɔ nsaa shin nɛ a mur ma.

² Mee nia depɔ to nna nɛ ma aya maŋ naa mur efar. N fo kakpa chiŋgeliŋ nɛ nchu na bee muni ma so.

³ N shu n tre fo hale ma eleŋ kikɛ loge, nɛ ma ebɔl to wɔl. N mɛrge anishi ŋ keni fo ekpa, hale ma anishi bee kurge.

⁴ Basa nɛ b kishi ma kenyanyaŋɛso shibi a chɔ ma kumu so be emin. Ebɔrɛ, bedoŋ lubi nɛ baa fin ma nɛ b jija na shi alegaiso. Baa tintiŋ ma nna nɛ ŋ ka kusɔ nɛ m maŋ yuri be kukɔ.

⁵ Fo nyi ma kawuliso be alubi kikɛ. Amo be kukoŋwule kama maŋ ŋana fo so.

⁶ Enyɛnpetale Ewurgboŋ, nɛ fee ji Israɛlebi so kuwura, sa maŋ shin nɛ ekama nɛ e bee bunyaŋ fo e ji anishinyɔr ŋkpal ma so.

⁷ Fo nawule so nɛ mee sɔ katege nsaa ji nyɔmɔ na.

⁸ Ŋ ki fanɛ efɔ ashi ŋ kurgepoana kutɔ nna; nsaa du fanɛ esa nɛ e shi efuli pɔtɛ so ashi n niopibiana to.

⁹ Kasha nɛ ŋ kɔ n sa fo bɔrɛlambu na bee chɔ ma to nna fanɛ edɛ, nɛ basa baa tege fo, k bee lɛa ma alɛ gba nna.

¹⁰ Mee kishi nsaa shu; ama b kraa tege ma.

¹¹ M buu kagbenejijaso be asɔbuuso gba basa bee wora ma eyurto nna.

¹² Bejuŋkparpo nɛ demujipoana bee kuli ma nna, nɛ basa nɛ baa nuu nsa a boo, bee boŋ nshɛ a wora ma eyurto.

¹³ Ama fo Enyɛnpe na nɛ mee shu a tre. Nu ma kekule saŋɛ nɛ k par fo nseŋ yili fo kashagboŋ na so m mɔlga ma.

¹⁴ Sa maŋ shin nɛ n nia depɔ to. Mɔlga ma ashi bedoŋ nɛ nchu nɛ a bee shin nɛ a mur ma na to.

¹⁵ Sa maŋ shin nɛ chuful e sulɔ ma n yɔ, ŋko n shin nɛ teku e mur ma, ŋko n shin nɛ luwu e ta ma m min.

¹⁶ Enyɛnpe Ebɔrɛ, nu ma kekule, ŋkpal fo ka walɛ nsaa la esa so. Chɛ ma to, ŋkpal fo kuwɔrwu gboŋgboŋi na so.

¹⁷ Saŋ maŋ pal kaman n sa fo kenya. Jande nu ma kekule manaŋ, ŋkpal manɛ so, n wɔ tɔrɔ to nna.

¹⁸ Ba mɔlga ma ashi bedoŋ be enɔ to.

¹⁹ Fo nyi kananɛ baa wora ma eyurto, a tege ma nsaa wɔtɔ ma nyɔmɔ to. Fo nyi n doŋana na be ekama.

²⁰ Ma kagbenejija ŋkpal katege so, n shin nɛ ŋ ki elɔpo katinso. N daa fɛ fanɛ baaŋ wu ma kuwɔr nna; ma alɛ maŋ nya loŋ.

²¹ Baa ta kɔrtɔ nna a wɔtɔ ma ajibi to nsaa sa ma nsa nyaŋnyaŋso fanɛ nchu nuuso.

²² Shin nɛ bumo be ejikpa e ki ajigbelɛ n sa bumo nɛ bumo teriana.

²³ Shin nɛ tentembiri e tan bumo nɛ b baa chicha.

²⁴ Shin nɛ b pin fo ka nya agbo ga, nseŋ shin nɛ fo agbo e ba bumo so.

²⁵ Jija bumo be echenakpa. Sa maŋ shin nɛ esa koŋwule gba e ka a wɔ bumo be keeyi to.

²⁶ Ŋkpal manɛ so, baa malga nna a gbiti basa nɛ fo gberge kusoe na; nɛ bumo be ŋkuli bee tɔrɔ basa nɛ fo doro na.

²⁷ Shin nɛ b ji n tɔr ekpa kama so. Sa maŋ ta bumo be alubi m paŋ bumo kikɛ.

²⁸ Bubɔ bumo be atre ashi basa nɛ b wɔ ŋkpa to na be atre be kawɔl na to. Lara bumo ashi bumo nɛ b maŋ wora n jija to.

²⁹ B maa keta ma nɛnɛ nɛ ebesa kɔ ma. Ebɔrɛ kuŋ ma nseŋ mɔlga ma.

³⁰ Meeŋ boŋ kashɛ n fur Enyɛnpe Ebɔrɛ na, nseŋ chɔrɔ mo ma kagbene to.

³¹ Kumo be loŋ beeŋ par Enyɛnpe Ebɔrɛ na a chɔ keta gbolu fɛlso ŋko gbolu danso n lara sarga n sa mo.

³² Betirpo beeŋ wu kumo be loŋ nɛ bumo be ŋgbene e fuli bumo. Saŋɛ na so basa nɛ baa bunyaŋ Enyɛnpe na beeŋ nya keleŋto.

³³ Bumo nɛ b maŋ kɔ epe baŋ shu n tre Enyɛnpe Ebɔrɛ na, e beeŋ nu. Mo alɛ maaŋ teŋ mbe basa nɛ b wɔ kabuti to na so.

³⁴ Esoso nɛ kasawule nɛ teku nɛ asɔ nɛ a wɔ amo to kikɛ beeŋ fur anyi be Ebɔrɛ na.

³⁵ Ebɔrɛ beeŋ sɔ Jerusalɛm n yige nseŋ lɔŋɛ m pɔr Juda be ndeana, nɛ mbe basa e baa wɔ amo to ashi bumo gbagba be kasawule so.

³⁶ Kasawule na beeŋ ki bumo be mbia be kapetɛ kachako. Nɛ esa kama nɛ e bee sha Ebɔrɛ e chena kumo so.