Nshɛ 68 - EBƆRƐ BE KAWƆL

Ebɔrɛ ka beeŋ kɔ m pɔɔ so be asheŋ

¹ Ebɔrɛ koso, n shin nɛ fo doŋana e pesaŋ to n shile.

² Shin nɛ b pesaŋ to fanɛ edishi. Shin nɛ b ŋalga fo anishito fanɛ kananɛ kemushoŋmar bee ŋalga edɛ to na.

³ Ama shin nɛ basa nɛ baa wora asheŋ niŋiso na bre be ŋgbene e fuli bumo, nɛ b ji eyur fo anishito.

⁴ Men boŋ nshɛ n sa Ebɔrɛ, men boŋ nshɛ n fur mbe ketre. Mo e dii n chena awɔlpa so, amoso men maŋkura mo. Mbe ketre e la Enyɛnpe na, nɛ anyee tiŋ n ji eyur nseŋ maŋkura mo.

⁵ Mo e wɔ mbe kakpa cheembi, nsaa la amunibi bumo tuto a kuŋ bekulpoche na.

⁶ Mo e naa ta bumo nɛ b maŋ kɔ basa a ki kanaŋ wurana. Mo e naa sɔ basa nɛ b ti ebu a yige, nsaa shin nɛ asheŋ bee nite nɛnɛ a sa bumo. Ama e bee yɛr bumo nɛ b kɔ asoe kpakpaso nsaa maa nu a sa mo na bre epeŋi kpakpaso be kasawule so nna.

⁷ Fo e sa fo basa kamooji, nseŋ juŋkpar bumo m bɔla keshishɛrsawule so,

⁸ nɛ kasawule gbuŋgbuŋ nɛ bɔrɛ chulgi. Fo nawule e la Ebɔrɛ, nsaa tase kebee nɛ baa tre Sainai na so a ji kuwura.

⁹ Kasawule ka wɔl nɛ fo shin nɛ bɔrɛ ba nɛ kaboŋ wushi.

¹⁰ Nɛ fo basa chena kumo so, nɛ fo sa bumo to be bumo nɛ b maŋ kɔ shɛŋ na kusɔ jiso.

¹¹ Fo e sa mbra na, nɛ beche damta cha awɔr, ŋ kaŋɛ kusɔ nɛ k wora.

¹² Bewura, nɛ bumo be benapo kilgi n shile, nɛ b chige asɔ nɛ b shile ŋ ka na to n sa abar.

¹³ Abɛlso be ali nɛ b ta gbiti m mata amo be aba so nseŋ ta shuwa nɛ a bee kpa edɛ n wora amo be atɛ e ki basa nɛ b shir kaman a keni mbolpɔ so na peya.

¹⁴ Enyɛnpetale Ebɔrɛ na shin nɛ efuli na so be bewura pesaŋ to, fanɛ kananɛ abɔrɛjembubi bee tɔr kebee nɛ baa tre Zalmɔn na so a pesaŋ to na.

¹⁵ Bashan be kebeegboŋ na shi nna nseŋ lar n lar ayabi.

¹⁶ Kebeegboŋ, manɛ nna nɛ fee besa Zayɔn be kebeegboŋ nɛ Enyɛnpe na lara fanɛ mbe echenakpa nsaa wɔ kumo so saŋkama na eyur?

¹⁷ Enyɛnpe Ebɔrɛ, egbaŋɛturko lempo ŋgboŋto ŋgboŋto nɛ fo ta n shi Sainai be kebeegboŋ na so m ba fo lambu cheembi na to.

¹⁸ Fo keta basa nɛ b ti ebu nna n dii n yɔ kebeegboŋ na be esoso. Ndoŋ nɛ basa ya kɛ fo asɔ. Fo doŋana nɛ b daa maa sha fanɛ fo baa wɔ ndoŋ gba sa fo ŋkɛ.

¹⁹ Anyee fur fo Enyɛnpe nɛ anyi be Ebɔrɛ nɛ fee mɔlga anyi nsaa wora anyi kelela karechɛ kikɛ na.

²⁰ Saŋkikɛ fee kuŋ anyi nna, nsaa mɔlga anyi ashi luwu to.

²¹ Kashenteŋto, Ebɔrɛ beeŋ bure mo doŋana be amu to; bumo nɛ b kini kelar bumo be alubi to na be amu.

²² Enyɛnpe Ebɔrɛ na yɛ, e beeŋ lara bumo ashi Bashan be kebeegboŋ na so nɛ teku chiŋgeliŋ to m ba.

²³ Saŋɛ na so anyeeŋ chichi bumo be ŋklaŋ to nɛ an be njɔnɔ malɛ e bure bumo be awibi to.

²⁴ An Nyɛnpe nɛ anyi be Ebɔrɛ, an wu basa damta ka bɛ abar so a yɔ fo bɔrɛlambu to.

²⁵ Beshɛbompo e juŋkpar nɛ bumo nɛ baa laŋ alaŋsɔ bɛso nɛ besuŋgurbi bee laŋ echakachaka a chaŋ bumo.

²⁶ Le nɛ baa ponte a kaŋɛ: “Men fur Enyɛnpe Ebɔrɛ ashi mbe basa Israɛlebi be nshɛr to.”

²⁷ Bɛnjamin be yiri to ebi nɛ b maŋ shi na e juŋkpar n ta Juda be yiri to be benimu m bɛso. Nɛ Zɛbyulɔn nɛ Naftali malɛ bɛ benimu bɛso.

²⁸ Anyi be Ebɔrɛ, ŋini fo eleŋ; naaŋ ŋini anyi fo eleŋ na.

²⁹ Nɛ bewura e ta ŋkɛ m ba fo bɔrɛlambu to ashi Jerusalɛm.

³⁰ Gberge kusɔbɔya nɛ k wɔ ketaŋɛ to na kusoe. Gberge efuliana na be basa nɛ bumo be bejuŋkparpo du fanɛ apuntona na kusoe, n shin nɛ b ta gbiti be ŋkɛ ŋ gbeye amuli so m ba. Shin nɛ efuliana nɛ amo be basa bee sha kebaa ku kena na e pesaŋ to.

³¹ Shin nɛ basa nɛ efuliana na bee yɛr efuli pɔtɛ so nɛ b ya yili amo be katelamu to a fin kɔnɔkoŋwule na e shi Ijipt be efuli so m ba. Nseŋ shin nɛ Itiopiaebi e ba bunyaŋ fo Enyɛnpe Ebɔrɛ na.

³² Men boŋ nshɛ n fur Ebɔrɛ. Durnya to be efuli kikɛ so ebi e boŋ nshɛ n sa Enyɛnpe Ebɔrɛ na.

³³ Men fur emo nɛ e yili dra na kikɛ a dii awɔlpa na. Men kaŋ kusoe n nu mbe ebɔl nɛ k bee gbri fanɛ bɔrɛ ka bee ponte na.

³⁴ Men kaŋɛ basa Ebɔrɛ be eleŋgboŋ na be asheŋ. Mbe kemaŋkura e buu Israɛl so nɛ e wɔ awɔlpa to a ji kuwura na.

³⁵ O, Ebɔrɛ, fo asheŋ woraso bee keta kufu ashi fo bɔrɛlambu to nna, nɛ fee sa fo basa eleŋ nɛ yuku. Men shin nɛ an fur anyi be Ebɔrɛ na!