Nshɛ 61 - EBƆRƐ BE KAWƆL

Kebaa wɔ Ebɔrɛ be kekuŋ to be asheŋ

¹ Enyɛnpe Ebɔrɛ, jande nu ma kushu nɛ ma kabɔrɛkule!

² Ma tama kikɛ loge nɛ n wɔ efuli wɔfɔ so a shu a tre fo. Juŋkpar ma n yɔ kefalta gboŋ nɛ k du jeŋgreŋ a chɔ ma na so.

³ Ŋkpal manɛ so, fo e la ma ekuŋkpa lempo, nɛ mee shile n ya kaa ŋana to ashi ma doŋana so.

⁴ Enyɛnpe, ma Ebɔrɛ, shin nɛ m baa wɔ fo kutɔ mbaanaayɔ, saŋɛ na so meeŋ nya kekuŋ ashi fo aba to.

⁵ Enyɛnpe Ebɔrɛ, fo nu ma kɔnɔ naseso na nseŋ nɛfa ma fanɛ kananɛ fo nɛfa bumo nɛ baa bunyaŋ fo na.

⁶ Sa fo ewura ŋkpa tenteŋ nɛ eyur be alenfia.

⁷ Shin nɛ e baa ji kuwura fo anishito mbaanaayɔ nɛ fo kasha nɛ kashenteŋji e baa kuŋ mo.

⁸ Saŋɛ na so meeŋ baa di fo ketre epaŋ saŋkama nsaa wora a bɔlɔ ma kɔnɔ naseso so saŋkama.