Nshɛ 6 - EBƆRƐ BE KAWƆL

Tɔrɔ to be kabɔrɛkule be asheŋ

Ewura Deevid be kashɛ

¹ Enyɛnpe Ebɔrɛ, sa maŋ nya agbo ŋ kaŋɛ fanɛ n wora n jija, nseŋ gberge ma kusoe agbo so.

² Wu ma kuwɔr nseŋ sa ma eleŋ; ŋkpal manɛ so, ma eyur kikɛ chɛl ma nna

³ nɛ mee shin nɛ n wu. Saŋɛ mo nɛ feeŋ chɛ ma to, Enyɛnpe Ebɔrɛ?

⁴ Enyɛnpe, ba mɔlga ma. Wu ma kuwɔr, nseŋ mɔlga ma ashi luwu to.

⁵ M baŋ wu, m maaŋ naŋ tiŋ n fur fo, ŋko n nyiŋi fo asheŋ.

⁶ Kebɔltofinfin e naa mɔ ma. Kanyɛso kikɛ, ma anishichubi bee pɔ ma gedo nɛ kaputi nna.

⁷ N doŋana shin nɛ kagbenejija pɛ ma, nɛ n shu nɛ ma anishi puŋi a maŋ naa wu nɛnɛ.

⁸ Basa lubi, men shile ma so! Enyɛnpe Ebɔrɛ na, nu ma kushu.

⁹ E nu ma kekule nseŋ wu ma kuwɔr, n wora ma asheŋ tirso n sa ma.

¹⁰ Anishinyɔr beeŋ pɛ ma doŋana kikɛ nɛ kufu e pɛ bumo ga nɛ b wulto, nseŋ pal kaman n ta nyɔmɔ n shile n yɔ.