Nshɛ 44 - EBƆRƐ BE KAWƆL

Kefin kechɛto be kabɔrɛkule be asheŋ

¹ Enyɛnpe anyi be Ebɔrɛ, an nananyɛnana kaŋɛ anyi kusɔ nɛ fo wora dra dra na. Nɛ anyi alɛ kaŋ asoe n nu,

² kananɛ fo ta fo eleŋ n ju basa nɛ b daa wɔ efuli ere so dra dra na, nseŋ shin nɛ an nananyɛnana sɔ kasawule ere nɛ kananɛ fo shin nɛ asheŋ nite nɛnɛ n sa bumo.

³ Mannɛ bumo gbagba be eleŋ nɛ akɔsɔ e daŋ shin nɛ b sɔ kasawule ere, ŋko n shin nɛ b kɔ m pɔɔ so. Ama ŋkpal fo kagbene ka fuli bumo so so, nɛ fo chɛ bumo to nɛ b kɔ m pɔɔ bumo doŋana so.

⁴ Fo e la ma Ebɔrɛ nɛ ma ewura; fo e shin nɛ Israɛlebi kɔ m pɔɔ so.

⁵ Fo eleŋgboŋ na e shin nɛ an ŋmɛa an doŋana n lɛ nseŋ chichi bumo so.

⁶ M maŋ ta ma yirda n deŋi ma keta ŋko ma tokobi so, fanɛ amo e naŋ mɔlga ma ashi bedoŋ be enɔ to.

⁷ Fo nɛ n yirda fanɛ feeŋ shin nɛ ŋ kɔ m pɔɔ bedoŋ so n shin nɛ anishinyɔr e pɛ bumo nɛ b kishi anyi na.

⁸ Fo anyi be Ebɔrɛ na so nɛ anyee ji njɔŋ nsaa fur fo ketre saŋkama.

⁹ Ama naniere, fo pal kaman n sa anyi n shin nɛ an ki bebɔlpo. Fo maŋ naa tu anyi be benapo a yɔ kena to.

¹⁰ Fo shin nɛ an bɛta n shile an doŋana be anishito nɛ b ba muu anyi be asɔ.

¹¹ Fo yige anyi nna nɛ an ki fanɛ asɔbɔya nɛ basa bee mɔ a ji, nseŋ pesaŋ anyi to n wɔtɔ efuli pɔtɛana to.

¹² K du fanɛ fo maŋ fa fo basa yawu kpakpaso, amoso fo maŋ nya tɔnɔ kikɛ.

¹³ Fo shin nɛ an ki basa fuloŋ ashi an braana be anishito nna. Nseŋ shin nɛ anyi be bechenashapo bee wora anyi amɔmɔshiasheŋ nsaa keni anyi jiga.

¹⁴ Fo shin nɛ an ki basa musheso ashi efuliana so, nɛ baa wu anyi nsaa fifi amu nsaa wora anyi eyurto.

¹⁵ Sipa wɔ ma so kachɛ kama nna, nɛ mee ji anishinyɔr saŋkama.

¹⁶ Bedoŋ bee bishi ma kuwule nna, nɛ basa bee jule a keni ma nsaa wora ma eyurto.

¹⁷ An maŋ teŋ fo so, ŋko n lar anyi nɛ fo be kɔnɔ koŋwule be ŋkre na to. Ama asheŋ ere kikɛ tu anyi.

¹⁸ An maŋ lar fo kaman, ŋko ŋ kplaŋ fo keŋini so.

¹⁹ Ama k du nna fanɛ fo yige anyi n lɛ kakpa chil, nɛ teŋtembiri mina buu anyi so n wɔtɔ kakpa nɛ asɔkpaŋ wɔ, nɛ anyi maaŋ tiŋ n wora shɛŋ.

²⁰ An daŋ teŋ fo so nna, nseŋ ya kaa bunyaŋ efuli pɔtɛana so be agbirana,

²¹ fo daŋ beeŋ pin; ŋkpal manɛ so, fo nyi kagbene to be ashiri kikɛ.

²² Ŋkpal fo so anyee luri luwu to nna saŋkikɛ. An du fanɛ mbolpɔ nɛ b gberge a yɔ nɛ b ya mɔ nna.

²³ Enyɛnpe Ebɔrɛ, jande ba chɛ anyi to. Wora kusɔ ko. Sa maŋ kini anyi n lɛ.

²⁴ Manɛ nna nɛ fo ŋana anyi so, nseŋ teŋ anyi be awurfoŋ nɛ kamɛaŋ so?

²⁵ Bedoŋ pɔɔ anyi so cheche nɛ an tɔr kasawule a dese shishɛr to.

²⁶ Jande wora kusɔ ko n chɛ anyi to. Mɔlga anyi ŋkpal fo kasha nɛ k maa chɛrga na so.