Nshɛ 40 - EBƆRƐ BE KAWƆL

Kechɛto be kabɔrɛkule be asheŋ

¹ N ta kanyiti nna n jo Enyɛnpe Ebɔrɛ na fanɛ e chɛ ma to, nɛ e nu ma kekule nseŋ chɛ ma to.

² K du fanɛ n daŋ tɔr kemaŋ chiŋgeliŋ nɛ depɔ bɔlɔ kumo to nna, nɛ e gberge ma n lara ashi kumo to. Nseŋ ta ma n yili kefalta so; kakpa nɛ m maaŋ naŋ nia.

³ E sa ma kashɛ popɔr nna, nɛ m boŋ n fur mo, nɛ basa damta e wu kusɔ nɛ Enyɛnpe Ebɔrɛ na wora, nsaa ŋana mo; saŋɛ na so, baaŋ ta bumo be yirda n deŋi mo so.

⁴ Enyɛnpe Ebɔrɛ na bee nɛfa bekama nɛ b yirda mo nɛ bumo nɛ b maa shuŋ agbir nɛ a la asɔ fuloŋ na nna.

⁵ Enyɛnpe Ebɔrɛ, fo wora emamachisheŋ damta. Ŋkre nɛ fo kɔ n sa anyi shi m pɔɔ anyi be nfɛra so. Esa kama maŋ du fanɛ fo. M maaŋ tiŋ ŋ kute fo asheŋ woraso kikɛ.

⁶ Mannɛ basa be esarga nɛ ŋkɛ e naa bɔlɔ fo kenishi. Mannɛ esarga chɔɔso nɛ alubi be ketampaŋ be esarga nɛ amo be ŋkɛ nɛ fee fin. Ama kusɔ nɛ k tir fo kashenteŋto e la ŋ kaa beeŋ baa wora fo kasonu.

⁷ Amoso nɛ ŋ kaŋɛ fanɛ ma nde na. Meeŋ wora asheŋ nɛ b sibɛ n wɔtɔ fo mbra be kawɔl na to fanɛ m bɛ so na; Kumo e kaŋɛ le na:

⁸ “Kebaa wora fo aparsheŋ e naa fuli ma kagbene, amoso n ta fo mbra n wɔtɔ ma kagbene to nna.”

⁹ Meeŋ kaŋɛ kananɛ fee mɔlga anyi saŋkama ashi fo basa be nshɛrgboŋ to. Enyɛnpe, fo nyi ŋ ka maaŋ lo ma kɔnɔ to kikɛ.

¹⁰ M maŋ ta fo kumɔlga be asheŋ na n wɔtɔ n nawule be kagbene to nna na. Ŋ ji fo kumɔlga nɛ fo kashenteŋji nɛ fo kasha nɛ k maa chɛrga na be asheŋ be shɛda nna ashi fo basa be nshɛrgboŋ to.

¹¹ Enyɛnpe Ebɔrɛ, n nyi fo ka maaŋ yige kebaawu ma kuwɔr. Fo kasha nɛ k maa chɛrga na nɛ fo kashenteŋji e naa kuŋ ma saŋkama.

¹² Ma etɔrɔsheŋ shi alegaiso nɛ ma alubi kulti ma n wɔtɔ kaplɛkama nɛ m maŋ naa nyi kusɔ nɛ meeŋ wora. Ma alubi shi a chɔ emin nɛ a wɔ ma kumu so gba, nɛ kumo be loŋ shin nɛ m pɔ aba.

¹³ Enyɛnpe Ebɔrɛ, jande, mɔlga ma. Ba chɛ ma to manaŋ.

¹⁴ Wul basa nɛ baa fin ma nɛ b mɔ na be nfɛra to nseŋ shin nɛ b ji anishinyɔr. Shin nɛ bekama nɛ baa fin ma luwu na e sipa.

¹⁵ Shin nɛ anishinyɔr gboŋgboŋi e pɛ bekama nɛ baa kaŋɛ ma le na: “Men keni kananɛ e ki a.” Nɛ kufu e pɛ bumo nɛ b baa chicha.

¹⁶ Enyɛnpe Ebɔrɛ, shin nɛ bumo nɛ baa bunyaŋ fo na be ŋgbene e fuli bumo nɛ b ji eyur. Shin nɛ bekama nɛ baa sha fo kumɔlga na e baa kaŋɛ le saŋkama: “Enyɛnpe Ebɔrɛ na shibi ga.”

¹⁷ N la etirpo nɛ etentaŋasepo nna; m maaŋ tiŋ n wora shɛŋ. Ama ma asheŋ tir fo, Enyɛnpe Ebɔrɛ na. Fo e la ma emɔlgapo, amoso jande, nya manaŋ m ba mɔlga ma.