Nshɛ 37 - EBƆRƐ BE KAWƆL

Keyirda Ebɔrɛ be asheŋ

¹ Sa maŋ shin nɛ belubiworapoana be asheŋ woraso e baa fɔŋ fo, ŋko n shin nɛ bumo be kanya be asheŋ e baa besa fo.

² Ŋkpal manɛ so, b du fanɛ afitiri ŋko afantaŋ bumbuŋ nna, b maa chɛr nsaa wɔl a wu.

³ Yirda Enyɛnpe Ebɔrɛ na, nsaa wora alelasheŋ. Saŋɛ na so feeŋ chena kasawule ere so n nya kekuŋ.

⁴ Shin nɛ fo kagbene e baa fuli fo ga; ŋkpal fo ka bee wora Enyɛnpe Ebɔrɛ na be aparsheŋ so. Mo alɛ beeŋ baa wora kusɔ nɛ fee sha a sa fo.

⁵ Shin nɛ Enyɛnpe Ebɔrɛ na e baa juŋkpar fo kusɔ kama to. Yirda fanɛ e beeŋ chɛ fo to.

⁶ Shin nɛ fo asheŋ woraso niŋiso e baa kpa edɛ fanɛ karechɛ, nɛ kananɛ fee ji asheŋ nɛ amo be ekpa so, e baa di efuli fanɛ kapiidi be epeŋi.

⁷ Baa kɔ kanyiti a jo Enyɛnpe be saŋɛ. Sa maŋ shin nɛ k baa tɔrɔ fo ŋkpal asheŋ ka bee nite nɛnɛ a sa belubiworapo so.

⁸ Saa maa nya agbo ŋko a wora asheŋ agbo so. Agbo bee yɛra esa alubi to nna.

⁹ Alubiworapoana kikɛ beeŋ mur. Ama bekama nɛ b yirda Enyɛnpe Ebɔrɛ na bre beeŋ ji kasawule ere so be tɔnɔ.

¹⁰ K maaŋ chɛr nɛ alubiworapoana e mur, nɛ fo keni n fin bumo ŋ gben.

¹¹ Ama bebɔlpo bre beeŋ ji kasawule ere so be tɔnɔ; nseŋ nya kagbenewushi gboŋgboŋi.

¹² Belubiworapo bee kre basa lela asheŋ lubi nna, nsaa keni bumo yurkishiso.

¹³ Ama Enyɛnpe Ebɔrɛ na bee mushe belubiworapo nna, ŋkpal bumo be kasogberge be saŋɛ ka maaŋ chɛr nseŋ ba so.

¹⁴ Belubiworapo bee pe nsaŋɛ nna nsaa gberge bumo be ata to a fin betirpo nɛ betentaŋasepo nɛ basa nɛ baa wora asheŋ niŋiso nɛ b mɔ.

¹⁵ Ama bumo gbagba be nsaŋɛ na beeŋ kilgi n da bumo m mɔ, nɛ bumo be ata na e buri to.

¹⁶ Kebaa kɔ kebaawɔtɔ niŋiso nsaa la etirpo bɔ kebaala damawura nsaa la alubiworapo.

¹⁷ Ŋkpal manɛ so, Enyɛnpe Ebɔrɛ na beeŋ jija belubiworapo be eleŋ kikɛ; nseŋ sa bumo nɛ baa bɔla mbe ekpa niŋiso so na eleŋ.

¹⁸ Enyɛnpe Ebɔrɛ na e naa keni bekama nɛ baa wora mo kasonu so. Kusɔ kama nɛ mo alɛ sa bumo beeŋ baa la bumo peya mbaanaayɔ.

¹⁹ B maaŋ ji awurfoŋ jɛrbi be saŋɛ. Akoŋ be jemanɛ malɛ, bumo ere beeŋ baa kɔ ajibi yɛlyɛla so.

²⁰ Ama belubiworapo, nɛ b la Ebɔrɛ mo doŋana na bre, beeŋ foe fanɛ kananɛ edishi bee shi edɛ to a lar a foe na.

²¹ Belubiworapo bee paŋ asɔ nna, nsaa kini keka. Ama basa nɛ baa wora asheŋ nɛ a niŋi na bre bee bugi kagbene nna a kɛ basa asɔ saŋkama.

²² Basa nɛ Enyɛnpe Ebɔrɛ nɛfa na, e naŋ ji kasawule ere so be tɔnɔ. Ama bekama nɛ Ebɔrɛ sho kɔnɔ na bre beeŋ mur.

²³ Nɛ esa be asheŋ woraso baa fuli Enyɛnpe Ebɔrɛ na be kagbene; e bee ŋini mo kananɛ e beeŋ baa tia mbe aya nna.

²⁴ E fiti gba, e maaŋ tɔr; ŋkpal manɛ so, Enyɛnpe Ebɔrɛ gbagba e naŋ pɛ mo to n yili.

²⁵ Yili ma kebiato kikɛ m ba fo ma mbel to; m maŋ naŋ wu Enyɛnpe Ebɔrɛ ka kplaŋ esa lela so; ŋko n wu esa lela be mbia ka ta kawie a na a kule ajibi.

²⁶ Ama baa nya a ji nɛnɛ nna, nsaa bugi kagbene a kɛ basa asɔ yɛlyɛla so; nɛ bumo be mbia malɛ bee nya nɛfa.

²⁷ Yige asheŋ lubi be kebaawora; nseŋ fara a wora alelasheŋ. Saŋɛ na so fo kaman to ebi beeŋ nya kasawule ere so n chena mbaanaayɔ.

²⁸ Ŋkpal manɛ so, Enyɛnpe Ebɔrɛ na bee sha bekama nɛ baa wora asheŋ nɛ amo be ekpa so na nna. Mo alɛ maaŋ kplaŋ bekama nɛ baa ji kashenteŋ so. Enyɛnpe na beeŋ baa kuŋ bumo, ama e beeŋ mur belubiworapo bre be kaman to ebi.

²⁹ Kasawule ere beeŋ baa la basa nɛ baa wora asheŋ nɛ a niŋi na peya, nɛ b chena kumo so mbaanaayɔ.

³⁰ Kanyiasheŋ be mmalga e naa lar esa nɛ e bee wora asheŋ nɛ a niŋi be kɔnɔ to, nɛ mbe kudonduloŋ bee tuge asheŋ nɛ a niŋi ekpa.

³¹ E ta Ebɔrɛ be mbra na nna n wɔtɔ mbe kagbene to; amoso e bee pere kenishi nna a bɛ kumo so saŋkikɛ.

³² Belubiworapo bre bee ŋana nna a fin basa lela nɛ b mɔ.

³³ Ama Enyɛnpe Ebɔrɛ na wɔ basa lela kutɔ nna; nsaa beeŋ malga n sɔ bumo n yige; saŋɛ nɛ baŋ bar bumo demujikpa na.

³⁴ Ta fo yirda n wɔtɔ Enyɛnpe na to, nsaa bɛ mo so. E beeŋ shin nɛ fo chena kasawule ere so n wu kananɛ belubiworapo beeŋ mur.

³⁵ N wu amukpakpasowuraana ka puni basa n nyalɛ; fanɛ kananɛ ndibi bee daŋ a walɛ nɛnɛ ashi kasawule lela so na.

³⁶ Ama k maaŋ chɛr ko nɛ b foe; nɛ ŋ keni nɛ b maaŋ naa wɔtɔ.

³⁷ Keni, asheŋ lela bee jo basa nɛ baa ji kashenteŋ nsaa maa wora a foe; nsaa fin kayurwushi na be kaman to ebi nna.

³⁸ Ama alubiworapoana nɛ bumo be kaman to ebi kikɛ beeŋ mur.

³⁹ Enyɛnpe Ebɔrɛ na e naa kuŋ mbe basa, nsaa mɔlga bumo tɔrɔ be saŋɛ.

⁴⁰ Enyɛnpe na e naa mɔlga bumo; ashi alubiworapoana be enɔ to, ŋkpal b kaa bee fin kekuŋ ashi mo kutɔ so.