Nshɛ 31 - EBƆRƐ BE KAWƆL

Yirda be kabɔrɛkule be asheŋ

¹ Fo Enyɛnpe Ebɔrɛ na kutɔ nɛ m ba nɛ fo kuŋ ma. Sa maŋ shin nɛ n ji anishinyɔr. Enyɛnpe, jande, sɔ ma n yige; ŋkpal fo ka la esa niŋiso so.

² Nu ma kekule nseŋ mɔlga ma manaŋ. Baa la ma kefaltagboŋ, nɛ kumɔlga be kakpa lempo nɛ mee nya kumɔlga fo kutɔ.

³ Fo Enyɛnpe Ebɔrɛ na, e la ma kefaltagboŋ a kuŋ ma. Amoso baa juŋkpar a ŋini ma ekpa lela na; nɛ fo ketre e nya kemaŋkura.

⁴ Kuŋ ma ashi ajigbelɛ nɛ ma doŋana sho ma to, n shin nɛ n nya kumɔlga.

⁵ Enyɛnpe Ebɔrɛ, fo e naa keni ma so. Jande mɔlga ma ŋkpal fo ka la eshenteŋjipo so.

⁶ Ŋ kishi basa nɛ baa shuŋ agbir nɛ a maŋ la shɛŋ na ga. Fo Enyɛnpe Ebɔrɛ na nɛ n yirda.

⁷ Ma kagbene beeŋ fuli ma, nɛ n ji eyur ŋkpal fo kasha nɛ k maa loge na so. Fo wu ma etɔrɔ nɛ awurfoŋ nseŋ chɛ ma to.

⁸ Fo maŋ yige ma n wɔtɔ ma doŋana be enɔ to. Ama fo sɔ ma n yige, nɛ n nya ma kumu a ji.

⁹ Enyɛnpe Ebɔrɛ wu ma kuwɔr ŋkpal tɔrɔ nɛ n wɔtɔ so. N shu nɛ ma anishi puŋi m puŋi; hale ma eyur to kikɛ bee besa ma.

¹⁰ Kagbenejija shin nɛ n bel katiŋso; nɛ kebɔltofinfin bee ku ma ŋkpa so. Awurfoŋ shin nɛ ŋ ki esa pɔso, nɛ ma awibi to maŋ naa kɔ eleŋ.

¹¹ N doŋana nɛ ma bechenashapo kikɛ bee keni ma jiga nna. Ŋ ki kusɔ ŋana so n teriana kutɔ, nɛ baa wu ma nsaa shile.

¹² B teŋ ma so nna fanɛ esa nɛ e wu, nɛ ŋ ki fanɛ kapɛlanfu na.

¹³ N nu basa ka bee kuli ma, nɛ kufu pɛ ma ga. B yɛ, baa kre ma ŋkre nna, a fin ma nɛ b mɔ.

¹⁴ Ama ma yirda deŋ fo so nna. Enyɛnpe, fo e la ma Ebɔrɛ.

¹⁵ Ma ŋkpa wɔ fo enɔ to nna. Mɔlga ma ashi ma doŋana nɛ b ju a buu ma so saŋkama na kutɔ.

¹⁶ Wu fo kenya kuwɔr nseŋ mɔlga ma, ŋkpal fo kasha nɛ k maŋ kɔ ekar na so.

¹⁷ Enyɛnpe Ebɔrɛ, fo nɛ mee shu a tre. Sa maŋ shin nɛ anishinyɔr e ji ma. Ama shin nɛ basa lubi bre e ji anishinyɔr, hale n ya wu n yɔ nchaŋ to.

¹⁸ Shin nɛ befɛpo na e lo bumo be nnɔ. Bumo e naa wu bumo be amu nsaa keni basa niŋiso jiga na.

¹⁹ Fo kelela shi m baŋ so; nɛ fee sha kebaawora basa nɛ baa ŋana fo kelela. Ekama nyi fo kelela nɛ kananɛ fee kuŋ basa nɛ b yirda fo.

²⁰ Fee kuŋ bumo ashi basa nɛ baa kre bumo ŋkre lubi be enɔ to nna, nsaa ta bumo a gelge katege nɛ asheŋ nɛ bedoŋ bee ku a deŋi bumo.

²¹ Kapandi e baa la Enyɛnpe na peya. Ŋkpal manɛ so e ŋini ma kashagboŋ, saŋɛ so nɛ bedoŋ kulti ma n wɔtɔ fanɛ kananɛ benapo bee kulti kadegboŋ nɛ b pɔr egbal ŋ kulti a wɔtɔ na.

²² Kufu daa kɔ ma nna, nɛ n daa fɛ fanɛ Ebɔrɛ ju ma ashi mbe anishito nna. Ama n shu n tre mo fanɛ e chɛ ma to, nɛ e nu ma kekule.

²³ Menyi Ebɔrɛ be basa e baa sha Enyɛnpe na. Ŋkpal manɛ so, e bee kuŋ beshenteŋjipo nna, nsaa gberge kamoowuwuraana bre kusoe kananɛ k daga bumo.

²⁴ Amoso menyi kikɛ nɛ men be yirda deŋ Enyɛnpe Ebɔrɛ na so na, e baa kɔ eleŋ nsaa leŋ men be amu to.