Nshɛ 149 - EBƆRƐ BE KAWƆL

Kapandi be kasha be asheŋ

¹ Men baa kpaŋ Enyɛnpe Ebɔrɛ na! Men boŋ kashɛ popɔr n sa Enyɛnpe Ebɔrɛ na; men baa kpaŋ mo ashi kakpa nɛ mbe basa nɛ baa ji kashenteŋ a sa mo shɛr abar so na.

² Israɛl be basa, men shin nɛ menyi be ŋgbene e fuli menyi ŋkpal menyi be etopo na so; menyi Jerusalɛm to be basa malɛ e ji eyur ŋkpal menyi be ewura so!

³ Men ta echakachaka nɛ ejaŋjilaŋ a boŋ nshɛ nsaa cha a dele Enyɛnpe Ebɔrɛ na be ketre.

⁴ Ŋkpal manɛ so, mbe basa be asheŋ bee par mo nna. Mo alɛ bee ta kemaŋkura nna a buu bekama nɛ baa bar bumo be amu kaseto so nsaa mɔlga bumo.

⁵ Ebɔrɛ be basa kama nɛ b nya le be kemaŋkura ere e shin nɛ bumo be ŋgbene e baa fuli bumo nɛ b baa boŋ nshɛ a ji eyur kapa nɛ kanyɛ kikɛ.

⁶ B baa kpaŋ Ebɔrɛ awɔrso jemanɛ nɛ b ta bumo be etokobi jiso m bɔɔ enɔ a yɔ

⁷ nɛ b ya kɔ m pɔɔ efuli pɔtɛana be basa so ŋ gberge bumo kusoe;

⁸ nseŋ naa kpaŋ mo jemanɛ nɛ baŋ pɛ efuli pɔtɛana na be bewuraana nɛ bumo be benimuana nseŋ wɔtɔ bumo ŋgbɛlɛbiana na.

⁹ Saŋɛ na so baaŋ gberge efuli pɔtɛana na be basa kusoe fanɛ kananɛ Ebɔrɛ yili kumo na. Ebɔrɛ be basa laraso cheembi kikɛ be kemaŋkura nna na. Men baa kpaŋ Enyɛnpe Ebɔrɛ na!