Nshɛ 148 - EBƆRƐ BE KAWƆL

Durnya kikɛ ka daga kekpaŋ Enyɛnpe Ebɔrɛ na be shɛŋ

¹ Men baa kpaŋ Enyɛnpe Ebɔrɛ na! Menyi nɛ men wɔ ebɔrɛso na, men baa kpaŋ Enyɛnpe Ebɔrɛ na.

² Menyi Ebɔrɛ be emalaika kikɛ, nɛ ebɔrɛso be beshumpo kikɛ, men baa kpaŋ Enyɛnpe Ebɔrɛ na.

³ Kufɔl nɛ epeŋi, e baa kpaŋ mo. Achɛkpabi nɛ e bee nyɛkpɛ gba e baa kpaŋ Enyɛnpe Ebɔrɛ na.

⁴ Ebɔrɛso nɛ k wɔ awɔlto chilili, nɛ awɔlto be nchuana kikɛ, e baa kpaŋ Enyɛnpe Ebɔrɛ na.

⁵ Men shin nɛ le be asɔ ere kikɛ e baa kpaŋ Enyɛnpe Ebɔrɛ na be ketre. Ŋkpal manɛ so, mo e malga eleŋso n to amo kikɛ kuraa.

⁶ Mo koŋwule na e malga eleŋso nɛ amo be kekama ere nya kumo be eyilikpa a yil mbaanaayɔ na. Mbe atande maa chɛrga kikɛ.

⁷ Kasawule so be asɔ keniso kikɛ, e baa kpaŋ Enyɛnpe Ebɔrɛ na. Teku to be asɔbɔya gboŋgboŋi kikɛ, nɛ kumo to be asɔ keniso kikɛ e baa kpaŋ mo.

⁸ Bɔrɛ be kenyɛkpɛ nɛ abɔrɛjembubi nɛ kunyɔlɔ nɛ awɔlpaana nɛ bɔrɛfugboŋana nɛ amo kikɛ bee nu a sa mo na e baa kpaŋ mo.

⁹ Abeegboŋana nɛ abeebiana kikɛ, nɛ ndibi sɔrsoana nɛ kupo to be ndibi kikɛ e baa kpaŋ mo.

¹⁰ Kowu nɛ kupuŋ to be asɔbɔya be yiri kikɛ; asɔbɔya wurbi be yiri kikɛ nɛ mbuibi kikɛ e baa kpaŋ Enyɛnpe Ebɔrɛ na!

¹¹ Durnya to be efuliana kikɛ so be bewuraana, bewurbi nɛ durnya to be kenimujipoana kikɛ,

¹² mbrantiɛbia nɛ besuŋgurbi kikɛ, basakpar nɛ mbiwurbi kikɛ e baa kpaŋ Enyɛnpe Ebɔrɛ na.

¹³ Asɔ to so kikɛ e baa kpaŋ Enyɛnpe Ebɔrɛ na be ketre. Men baa kpaŋ mbe ketre na nawule. Ebɔrɛ be kemaŋkura shi ga a chɔ esoso nɛ kasawule so kikɛ peya.

¹⁴ Mo e shin nɛ mbe efuli nya eleŋ, saŋɛ na so, mbe basa, Israɛlebi kikɛ, nɛ bumo be asheŋ wɔ mbe kagbene to na, beeŋ baa kpaŋ mo. Men baa kpaŋ Enyɛnpe Ebɔrɛ na!