Nshɛ 147 - EBƆRƐ BE KAWƆL

Keboŋ kashɛ ŋ kpaŋ Enyɛnpe Ebɔrɛ na be asheŋ

¹ Men baa kpaŋ Enyɛnpe Ebɔrɛ na! Keboŋ nshɛ ŋ kpaŋ an Nyɛnpe Ebɔrɛ na walɛ ga. Kekpaŋ mo wɔ ebel ga nseŋ daga loŋ.

² Enyɛnpe Ebɔrɛ na bee lɔŋɛ Jerusalɛm nna a pɔr; nsaa bɛta mbe basa nɛ b daŋ pɛ n yɔ kenyaya to ashi efuli pɔtɛ wɔfɔ so na a ba epe.

³ Mo e naa ti kagbenejijawuraana kagbene nsaa chɛ bumo be alɔana.

⁴ Mo e yili kananɛ achɛkpabi beeŋ ba sa awɔlpa so nseŋ nase amo be kekama ketre a tre kumo.

⁵ An Nyɛnpe Ebɔrɛ na shi alegaiso nsaa kɔ eleŋ ga. Mo alɛ bee pin kusɔ kama to nna.

⁶ Enyɛnpe Ebɔrɛ na e naa chɛ bebɔlpo to, nsaa bar kumukpakpasowuraana kaseto.

⁷ Men boŋ nshɛ ŋ kpaŋ Enyɛnpe Ebɔrɛ na; men laŋ ejaŋjilaŋ m boŋ nshɛ n sa anyi be Ebɔrɛ na.

⁸ Mo e naa shin nɛ abɔrɛwɔlpa bee salga to a buu kaplɛkama so; nɛ bɔrɛ bee ba kasawule so a shin nɛ afitiri bee kɔr abee so.

⁹ Mo e naa sa asɔbɔya kusɔ jiso nsaa bela ejɔnɔkoso fɔlbi jemanɛ kikɛ nɛ a shu n tre mo.

¹⁰ Mannɛ egbaŋɛ be eleŋ nɛ benapo lempoana be asheŋ e naa par Ebɔrɛ nsaa fuli mbe kagbene.

¹¹ Basa nɛ baa bunyaŋ mo nɛ bumo nɛ bumo be yirda wɔ mbe kasha nɛ k maa chɛrga na so be asheŋ e naa par mo nsaa fuli mbe kagbene.

¹² O Jerusalɛmebi, men kikɛ e maŋ Enyɛnpe menyi be Ebɔrɛ na so nseŋ kpaŋ mo!

¹³ Mo e shin nɛ menyi be kadegboŋ be mbunagboŋ na kɔ eleŋ; mo alɛ e naa nɛfa menyi be basa.

¹⁴ Ebɔrɛ e shin nɛ men wɔ kayurwushi to ashi menyi be efuli so na. Mo e naa sa menyi ajibi lela.

¹⁵ Ebɔrɛ malɛ baŋ malga kenishipereso, k bee sɔ durnya kikɛ to manaŋ nna.

¹⁶ Mo e naa shin nɛ kunyɔlɔ bee sɔ kaplɛkama, nɛ bɔrɛfurbi malɛ bee ba fanɛ kalabɛr na.

¹⁷ Mo e naa shin nɛ abɔrɛjembubi bee wurge to fanɛ awarabi na. Esa kikɛ maaŋ tiŋ n chena awo nɛ e bee shin nɛ k bee ba na to.

¹⁸ Mo koŋwule na e naa malga nɛ afu bee ber, nɛ abɔrɛjembubi na bee ŋalga a ki nchu a shile mbombi to na.

¹⁹ Ebɔrɛ e ta mbe mbraana nɛ keŋiniana n sa mbe basa nɛ b la an nananyɛn Jeekɔb nɛ e daa wɔtɔ dra dra na be kaman to ebi; bumo e ki Israɛl be efuli so be basa na.

²⁰ E maŋ wora le n sa efuli pɔtɛ kama so be basa; b maŋ nyi mbe mbraana gba. Men baa kpaŋ Enyɛnpe Ebɔrɛ na!