Nshɛ 146 - EBƆRƐ BE KAWƆL

Kekpaŋ Enyɛnpe Ebɔrɛ na awɔrso be asheŋ

¹ Men baa kpaŋ Enyɛnpe Ebɔrɛ na! Meeŋ ta ma kagbene kikɛ ŋ kpaŋ Enyɛnpe Ebɔrɛ na!

² Meeŋ boŋ nshɛ ŋ kpaŋ Enyɛnpe Ebɔrɛ na saŋɛ nɛ n wɔ ŋkpa to ere.

³ Men sa maŋ ta menyi be yirda n wɔtɔ edimɛdi be bejuŋkparpo to. Dimɛdi bomin kikɛ maaŋ tiŋ m mɔlga esa.

⁴ B baŋ wu baa bɛta a yɔ shishɛr to nna; Loŋ be kachɛ na bumo be ŋkre kikɛ bee ba ekar nna.

⁵ Enyɛnpe Ebɔrɛ nɛ e la an nananyɛn Jeekɔb be Ebɔrɛ na bee nɛfa ekama nɛ e yirda mo nseŋ ta mbe kumu n to mo so na nna.

⁶ Ebɔrɛ e to esoso nɛ kasawule; mo e to teku nɛ kumo to be asɔ kikɛ nyam. Jemanɛ kikɛ e bee wora a bɔlɔ mbe nnɔ naseso so nna.

⁷ Mo e naa ji asheŋ nɛ amo be ekpa so a sa betirpo nsaa sa bumo nɛ akoŋ kɔ kusɔ jiso. Enyɛnpe Ebɔrɛ na e naa lara basa nɛ b ti ebu ashi kabuti to.

⁸ Mo koŋwule na e naa bugi etanpo be anishi. Mo e naa pɛ bumo nɛ b tɔr to a niŋi to a yili nsaa sha basa nɛ bumo be kebaawɔtɔ niŋi.

⁹ Enyɛnpe Ebɔrɛ na e naa keni befɔ so, nsaa ji a chɛ amunibi nɛ bekulpoche to; ama kumukpakpasowuraana bre, e bee mur bumo nna.

¹⁰ Enyɛnpe Ebɔrɛ, nɛ e la Jerusalɛm be Ebɔrɛ na, bee ji kuwura nna mbaanaayɔ! Men baa kpaŋ Enyɛnpe Ebɔrɛ na!