Nshɛ 145 - EBƆRƐ BE KAWƆL

Enyɛnpe Ebɔrɛ ka la esa nsaa wu kuwɔr be asheŋ

¹ Meeŋ maŋ fo so nseŋ kpaŋ fo, ma Ebɔrɛ nɛ ma Ewura; Ma alɛ beeŋ maŋkura fo ketre saŋkama.

² Meeŋ baa kpaŋ fo karechɛ kikɛ nsaa maŋkura fo ketre hale mbaanaayɔ.

³ Enyɛnpe Ebɔrɛ na shi ga, nseŋ daga fanɛ b baa kpaŋ mo saŋkama. Ekama maaŋ tiŋ m pin mbe kishi na to.

⁴ Kekurgeto kama to ebi beeŋ ji fo emamachisheŋ nɛ a bee mɔ kɔnɔ na be asheŋ n sa bumo be kaman to ebi.

⁵ Baaŋ baa malga fo kemaŋkura be kela be asheŋ. Bumo alɛ beeŋ baa fɛ fo asheŋ woraso nɛ a bee mɔ kɔnɔ na be asheŋ jemanɛ kikɛ.

⁶ Basa beeŋ baa malga fo asheŋgboŋ be asheŋ nsaa ber fo keshi be kubomboŋ a sa beko.

⁷ Baaŋ baa ji fo alelasheŋ damta be asheŋ a sa beko nsaa boŋ nshɛ kagbenefuliso a laŋɛ fo asheŋ niŋiso be kaplɛa so.

⁸ Enyɛnpe Ebɔrɛ na la eshapo nɛ e bee wu kuwɔr nna, mo alɛ maa nya agbo manaŋ manaŋ; mbe kasha maa chɛrga kikɛ.

⁹ Enyɛnpe Ebɔrɛ na bee wora ekama kelela nsaa kɔ kashagboŋ a sa mbe asɔ to so kikɛ nna.

¹⁰ O Enyɛnpe Ebɔrɛ, fo asɔ to so kikɛ beeŋ kpaŋ fo, nɛ fo basa kikɛ e di fo epaŋ.

¹¹ Baaŋ baa ji fo kuwurji be kemaŋkura be asheŋ; bumo alɛ beeŋ baa malga fo eleŋgboŋ be asheŋ.

¹² Saŋɛ na so edimɛdi kikɛ beeŋ pin fo ashuŋgboŋ nɛ fo kuwurji be kemaŋkura nɛ kela be asheŋ.

¹³ Fo kuwurji wɔtɔ nna mbaanaayɔ; k maŋ kɔ ekar, fo alɛ bee ji kuwura nna, yili kenana ko n ya fo kenana ko to ebi so nna. An Nyɛnpe Ebɔrɛ, fo e naa wora a bɔlɔ fo nnɔ naseso so nsaa wora kusɔ kama nɛ fo kaŋɛ feeŋ wora.

¹⁴ Fo Enyɛnpe Ebɔrɛ na e naa chɛ bumo nɛ b wɔ tɔrɔ to to, nsaa niŋi bumo nɛ b tɔr to.

¹⁵ Asɔ futeso kikɛ bee keni fo anishito nna nɛ fo sa amo ajibi jemanɛ nɛ k daga.

¹⁶ Fo e naa bugi enɔ to a sa kusɔ futeso kikɛ kumo be asheŋ tirso yila yila so.

¹⁷ Enyɛnpe Ebɔrɛ na be kesheŋ wora kikɛ niŋi nna, mo alɛ kɔ kasha nna n sa mbe asɔ to so kikɛ.

¹⁸ E wɔ bekama nɛ baa tre mo kagbene koŋwule so na kutɔ nna.

¹⁹ Mo alɛ bee sa bekama nɛ baa bunyaŋ mo na asɔ nɛ a tir bumo nna nsaa nu bumo be kekule a mɔlga bumo ashi etɔrɔ to.

²⁰ Enyɛnpe Ebɔrɛ na bee kuŋ bekama nɛ baa sha mo na nna, ama kumukpakpasowuraana bre, e bee mur bumo nna.

²¹ Jemanɛ kikɛ ma ere beeŋ kpaŋ Enyɛnpe Ebɔrɛ na; ekama e sa mbe ketre cheembi na bunyaŋ mbaanaayɔ.