Nshɛ 144 - EBƆRƐ BE KAWƆL

Kekule Ebɔrɛ n sa efuli be asheŋ

¹ Meeŋ kpaŋ fo, Enyɛnpe Ebɔrɛ! Fo e la ma kefalta gboŋ. Fo alɛ e naa ŋini ma kananɛ meeŋ baa kɔ kena.

² Fo e la n teri shaso nɛ ma ekumpo lempo, Fo nɛ mee shile a mata nsaa nya ma kumu. Fo e la ma kebɛlso be kusɔ kuŋso, fo alɛ e shin nɛ mee ji kuwura anyi be basa so.

³ O Enyɛnpe Ebɔrɛ, wanɛ e la dimɛdi, nɛ fee keni a wu mo; nɛ mbe asheŋ tir fo le ere bre?

⁴ Dimɛdi baa du fanɛ afu futeso nna; mbe nchɛ bee choŋ nna fanɛ kiyoyul.

⁵ O Enyɛnpe Ebɔrɛ, bugi esoso be kuwɔlpa fanɛ patisa ŋ gbelge m ba; Beta abeeana na, nɛ edishi e kaa amoso.

⁶ Shin nɛ bɔrɛ e nyɛkpɛ m pesaŋ fo doŋana to; To fo atanyembi m bar kebagato bumo to, nɛ b lara aya n shile.

⁷ Shi esoso ndoŋ n teŋi fo enɔ to m pɛ ma n chule ashi nchu be kechimbi to n sɔ ma n yige; mɔlga ma ashi efuli pɔtɛ be basa be enɔana to.

⁸ Bumo e la befɔ nɛ b maa ji kashenteŋ nsaa ku efɛ a bɔ ntaŋ na.

⁹ O Ebɔrɛ, meeŋ boŋ kashɛ popɔr ŋ kpaŋ fo; meeŋ laŋ jaŋjilaŋ m boŋ kashɛ n sa fo.

¹⁰ Fo e naa shin nɛ bewura bee kɔ a pɔɔ so, fo e naa kɔ a mɔlga fo kayɛrbi, Ewura Deevid ashi kena to.

¹¹ Jande kɔ m mɔlga ma alɛ gba ashi befɔ fɛpoana nɛ b maa ji kashenteŋ na be enɔ to.

¹² An kule Ebɔrɛ fanɛ e shin nɛ anyi be mbrantiɛbia e baa du fanɛ ndibi nɛ a daŋ yili a kɔ eleŋ; nɛ anyi be bibiche malɛ e baa du fanɛ eshabɔrɛ nɛ b pɔr n ji kuwurlambu kebita na.

¹³ Shin nɛ anyi be mpuro e bɔlɔ adɔjibi be yiri kikɛ nɛ anyi be mbolpɔ e kurge ga n salga n sɔ kaplɛkama,

¹⁴ n shin nɛ anyi be ana gba e kurge ga. Sa maŋ shin nɛ amo be kekama e gboŋi kedampo n lɛ kikɛ. Sa maŋ shin nɛ bedoŋ e kɔ m pɔɔ anyi be kadegboŋ na so, ŋko m pɛ anyi be beko n yɔ kenyaya to efuli wɔfɔ so. Fo alɛ e sa maŋ shin nɛ an nu kagbenejija be kushu ashi anyi be abɔrbi so kikɛ.

¹⁵ Kagbenefuli la bekama nɛ le be asheŋ bee wora bumo to na peya nna. Kagbenefuli la bekama nɛ bumo be Ebɔrɛ la Enyɛnpe Ebɔrɛ na peya nna.