Nshɛ 142 - EBƆRƐ BE KAWƆLKekule Ebɔrɛ be kechɛto be asheŋ 1 Mee shu a tre Enyɛnpe Ebɔrɛ nna; a kule mo fanɛ e wu ma kuwɔr. 2 Mee ta ma nfubel kikɛ nna a bar mo; nsaa kaŋɛ mo ma etɔrɔ kikɛ be asheŋ. 3 M baa pɔ aba kiyoyu to, mo e naa ŋini ma kusɔ nɛ k daga fanɛ n wora. Bedoŋ ŋana n sho ma kejigbelɛ ashi ekpa nɛ mee nite so nna. 4 M baŋ keni ŋ kulti, mee wu fanɛ esa kikɛ maŋ wɔtɔ nɛ e chɛ ma to, esa kikɛ maŋ wɔtɔ nɛ e kuŋ ma. Ma asheŋ malɛ maŋ tir esa kikɛ. 5 Fo Enyɛnpe Ebɔrɛ na, nɛ mee kule nɛ fo chɛ ma to! Fo Enyɛnpe Ebɔrɛ na e la ma ekumpo. Fo nawule nɛ mee fute a yigeso ashi ma kebaawɔtɔ to. 6 Enyɛnpe Ebɔrɛ, nu ma kushu nɛ mee shu a fin fo kechɛto ere. Ŋkpal manɛ so, asheŋ gben ma nna na. Mɔlga ma ashi ma doŋana be enɔ to; b chɔ ma eleŋ ga nɛ m maaŋ tiŋ bumo. 7 Lara ma ashi ebesa nɛ kafɔŋ to; saŋɛ na so, meeŋ kpaŋ fo ashi fo basa be nshɛr to, ŋkpal kelela nɛ fo wora ma so. |
© 2015 GILLBT Ghana Institute of Linguistics, Literacy and Bible Translation