Nshɛ 140 - EBƆRƐ BE KAWƆL

Kekule Enyɛnpe Ebɔrɛ kechɛto be asheŋ

¹ O Enyɛnpe Ebɔrɛ, mɔlga ma ashi kumukpakpasowuraana be enɔ to! Nseŋ kuŋ ma ashi bedoŋ nyaŋnyaŋso kutɔ.

² Ŋkre lubi e wɔ bumo be ŋgbene to, nɛ baa bar kebagato karechɛ kikɛ.

³ Bumo be nnɔ to be mmalga du fanɛ awɔ lubi be kubɔr ashi esa be eyur to nna.

⁴ O Enyɛnpe Ebɔrɛ, baa kuŋ ma ashi kumukpakpasowuraana nɛ bedoŋ nyaŋnyaŋso nɛ baa fin ma kemur na be enɔ to.

⁵ Kamoowuwuraana ŋana nna n sho ajigbelɛ nɛ ashewu ma ekpa to a fin ma nɛ b pɛ.

⁶ O Enyɛnpe Ebɔrɛ, fo e la ma Ebɔrɛ. Jande nu ma kekule nseŋ chɛ ma to!

⁷ O Enyɛnpetale Ebɔrɛ, fo la ma emɔlgapo lempo, fo e naa kuŋ ma ashi kekɔ nɛ bedoŋ bee kɔ ma kikɛ to.

⁸ O Enyɛnpe Ebɔrɛ, sa maŋ kaŋ shin nɛ kumukpakpasowuraana e nya kusɔ nɛ baa sha. Nɛ mannɛ aloŋ b maaŋ yige kebaakre asheŋ lubi.

⁹ Shin nɛ basa nɛ b kulti ma n wɔtɔ be mmalga lubi e laŋɛ n ji bumo.

¹⁰ Shin nɛ kedɛmurmur e tɔr bumo be amu so. Ta bumo n lɛ edepɔmaŋ to nɛ b lar ŋ gben.

¹¹ Sa maŋ shin nɛ basa nɛ baa ku asheŋ a deŋi beko e nya kusɔ nɛ baa sha kasawule ere so kikɛ. Shin nɛ asheŋ lubi e ba basa nyaŋnyaŋso so m mur bumo cheche.

¹² Enyɛnpe Ebɔrɛ, n nyi fanɛ fo e naa kɔ a sa betirpo, nsaa shin nɛ betentaŋasepo bee nya asɔ nɛ a daga bumo.

¹³ Kashenteŋto, basa nɛ bumo be asheŋ woraso niŋi beeŋ baa wɔ fo kutɔ a kpaŋ fo ketre na.