Nshɛ 139 - EBƆRƐ BE KAWƆL

Ebɔrɛ ka taga to jemanɛ kikɛ be asheŋ

¹ O Enyɛnpe Ebɔrɛ, fo e keni ma kagbene to, nseŋ pin ma nɛnɛ.

² Fo nyi jemanɛ nɛ mee wushi ŋko a shuŋ; n wɔ kufɔ a maŋ taga fo to gba fo nyi, fo nyi kusɔ nɛ k wɔ ma nfɛra to kikɛ.

³ Fee wu kusɔ kama nɛ mee wora, ŋko kaplɛkama nɛ mee yɔ nna.

⁴ O Enyɛnpe Ebɔrɛ, pɔɛŋ nɛ kesheŋ e lar ma kɔnɔ to, nɛ fo tia nyi kumo.

⁵ Fo kulti ma kaba kama so nna n wɔtɔ, nseŋ ta fo enɔgboŋ na a kuŋ ma.

⁶ Kananɛ fo nyi ma na la mamachi nna; m maaŋ tiŋ m pin kumo to.

⁷ Nnɛ nɛ meeŋ tiŋ n shile fo Kiyoyu n yɔ; ŋko nnɛ nɛ meeŋ yɔ nɛ fo maaŋ wu ma?

⁸ M baŋ dii n yɔ ebɔrɛso chilili, fo wɔ ndoŋ; ma alɛ naŋ yɔ bubuni to ashi kasawule to gba, fo kraa wɔ ndoŋ gba.

⁹ Nɛ m baŋ shile n yɔ epeŋilarkpa be kakpa wɔfɔ; ŋko n dii teku be kaba ndoŋ n yɔ epeŋitɔrkpa be kakpa wɔfɔ n ya kaa wɔ ndoŋ gba,

¹⁰ fo kraa beeŋ baa kɔ ma to, nsaa juŋkpar ma ashi ma kesheŋ wora kikɛ to.

¹¹ Nɛ m baŋ kaŋɛ fanɛ meeŋ ŋana tentembiri to, ŋko n shin nɛ kapa e ki kanyɛ m buu ma so gba,

¹² tentembiri kraa maŋ biri to n sa fo ere; kanyɛso malɛ du fanɛ kapaso nna n sa fo. Tentembiri nɛ kefulto kikɛ la kukoŋwule nna n sa fo ere.

¹³ Fo e to ma eyur ere kikɛ, nseŋ bela ma n chuge abar so ashi n nio be kakurgesha to.

¹⁴ Mee kpaŋ fo nna, ŋkpal manɛ so, kananɛ fo to ma na la mamachi nna nsaa keta kufu. Fo asheŋ woraso kɔ mamachi pasaa. M baa nyi kumo ma kagbene to nna geeŋ.

¹⁵ Shɛŋ shɛŋ maŋ ŋana fo so a laŋɛ ma kaplɛa so! Jemanɛ nɛ ma awibi daa chuge abar so ashi n nio be kakurgesha to ashiri to na,

¹⁶ fo wu ma ndoŋ nna pɔɛŋ nɛ b kurge ma. Nchɛ nɛ meeŋ ji durnya to gba kikɛ dese fo kawɔl na to nna pɔɛŋ nɛ ma kebaawɔtɔ fara.

¹⁷ O Ebɔrɛ, m maaŋ tiŋ m pin kusɔ nɛ k wɔ fo nfɛra to kikɛ! A shi m baŋ ma ketiŋ pin amo be kananɛ a sa so.

¹⁸ Nɛ fanɛ ŋ karga fo nfɛra gba, e beeŋ baa chɔ teku ase be eshishɛr. M baŋ di n tiŋi kelaŋ so gba, ma nɛ fo e kraa la.

¹⁹ O Ebɔrɛ, fo daa beeŋ shuli m mɔ kumukpakpasowuraana nna nseŋ kuŋ ma ashi bumo be kamɛaŋ to, k daa beeŋ par ma ga.

²⁰ Baa kaa malga mmalga lubi a gbiti fo nna nsaa jija fo ketre.

²¹ O Enyɛnpe Ebɔrɛ, ma alɛ gba kishi bekama nɛ b kishi fo nseŋ kini fo, n lar fo kaman na nna.

²² Yurkishi nawule nɛ ŋ kɔ a sa bumo; n ta bumo nna fanɛ ma doŋana.

²³ O Ebɔrɛ, mige ma to ŋ keni, m pin ma kagbene to; wora ma ŋ keni m pin ma nfɛra fɛso.

²⁴ Sa maŋ shin nɛ m baa bɔla ekpa lubiana so a wora asheŋ, ama baa juŋkpar ma ashi fo ekpa nɛ k dese mbaanaayɔ na so.