Nshɛ 138 - EBƆRƐ BE KAWƆL

Kapandi be kabɔrɛkule be asheŋ

¹ Meeŋ ta ma kagbene kikɛ ŋ kpaŋ fo; O Enyɛnpe Ebɔrɛ; meeŋ boŋ nshɛ ŋ kpaŋ fo ashi emalaika be anishito.

² Meeŋ bunyaŋ fo ashi fo bɔrɛlambu cheembi to, nseŋ kpaŋ fo ketre ŋkpal fo kasha nɛ k maa chɛrga na nɛ fo kashenteŋji so, ŋkpal manɛ so, fo maŋ fo ketre nɛ fo atande so a chɔ asɔ kikɛ.

³ Ŋ ka shu n tre fo, fo nu ma kekule nna nseŋ sa ma kenyɛn nɛ kagbene.

⁴ Enyɛnpe Ebɔrɛ, nɛ durnya to be bewuraana kikɛ nu fo nnɔ naseso, baaŋ kpaŋ fo.

⁵ Baaŋ baa boŋ nshɛ a laŋɛ asɔ nɛ fo wora nɛ fo kemaŋkuragboŋ na be kaplɛa so.

⁶ Fo, Enyɛnpe Ebɔrɛ na wɔ esoso ga, ama kumubarasewuraana be asheŋ tir fo; kamoowuwuraana malɛ maaŋ tiŋ ŋ ŋana fo so.

⁷ Nɛ etɔrɔ baŋ kulti ma n wɔtɔ gba, fo e naa kuŋ ma ashi bedoŋ nɛ b nya agbo n wɔtɔ ma be enɔ to. Fo gbagba be enɔ lempo na e naa shin nɛ mee nya ma kumu a ji.

⁸ Fo, Enyɛnpe Ebɔrɛ na beeŋ wora m bɔlɔ kusɔ kama nɛ fo nase kumo be kɔnɔ so. Fo kasha nɛ k maa chɛrga na wɔtɔ nna mbaanaayɔ; amoso, jande sa maŋ kini anyi, fo basa n lɛ.