Nshɛ 137 - EBƆRƐ BE KAWƆL

Kekule Ebɔrɛ a fin kewora n tal to be asheŋ

¹ An daŋ chena Babilɔn be elɔr na ase nna n nyiŋi Jerusalɛm be asheŋ nseŋ chena n shu ga.

² An daŋ ta anyi be ejaŋjilaŋ n shiga ndibi nɛ a mata ndoŋ na so nna.

³ Ŋkpal manɛ so, basa nɛ b pɛ anyi anya m ba ndoŋ na daŋ kaŋɛ anyi nna fanɛ an boŋ nshɛ n deŋi bumo anishito. B yɛ: “Men boŋ Jerusalɛm to be nshɛ na be kuko!”

⁴ Ndoŋ nna nɛ an kaŋɛ bumo: “Nuso nɛ anyeeŋ tiŋ m boŋ Enyɛnpe Ebɔrɛ na be kashɛ efuli pɔtɛ so?

⁵ O Jerusalɛm, nɛ ŋ kaŋ teŋ fo so, Ebɔrɛ e shin nɛ n sa maŋ naŋ tiŋ n laŋ alaŋsɔ kikɛ.

⁶ Nɛ ŋ ka maŋ naŋ nyiŋi fo, ŋko n ta Jerusalɛm fanɛ kakpa nɛ ma kagbene bee fuli so ga, Ebɔrɛ e shin nɛ ma kudonduloŋ e cha m mata ma kɔnɔ to nɛ nsaa maŋ naŋ tiŋ m malga ŋko m boŋ nshɛ.

⁷ O Enyɛnpe Ebɔrɛ, nyiŋi kusɔ nɛ Edɔmebi na wora kachɛ nɛ Jerusalɛmebi kɔ n tɔr na. B yɛ: ‘Men bure kadegboŋ na! Men mur kumo kikɛ kuraa!’

⁸ Babilɔnebi, menyeeŋ mur cheche! Ebɔrɛ e nɛfa basa nɛ baaŋ ka menyi kusɔ nɛ men wora anyi ere be kukɔ.

⁹ Mo e naŋ nɛfa bekama nɛ baaŋ pɛ menyi be mbiwurbi ŋ ŋmɛa afalta so m mɔ!.”