Nshɛ 135 - EBƆRƐ BE KAWƆL

Kekpaŋ Ebɔrɛ ŋkpal mbe alelasheŋ so be asheŋ

¹ Men kpaŋ Enyɛnpe Ebɔrɛ na! Menyi nɛ men la mbe nyɛrbi na e kpaŋ mbe ketre.

² Menyi nɛ menyee shuŋ Enyɛnpe anyi be Ebɔrɛ na ashi mbe bɔrɛlambu to na e kpaŋ mbe ketre.

³ Men kpaŋ Enyɛnpe Ebɔrɛ na, ŋkpal e ka la esa lela so. Men boŋ nshɛ ŋ kpaŋ mbe ketre, ŋkpal k ka bee par mo so.

⁴ Ŋkpal manɛ so, mo e lara an nananyɛn Jeekɔb be kaman to ebi, nɛ b la Israɛl be basa na, fanɛ b baa la mo gbagba be basa.

⁵ N nyi fanɛ Enyɛnpe Ebɔrɛ na shi ga a chɔ agbirana kikɛ.

⁶ Kusɔ nɛ k par mo nɛ e bee wora ashi ebɔrɛso nɛ kasawule so nɛ teku be kechimbi to kikɛ nyam.

⁷ Mo e naa shin nɛ bɔrɛwɔlpa bee yili durnya be ekar a ka a dii a buu so; nsaa shin nɛ bɔrɛ bee ba nsaa nyɛkpɛ nɛ afu bee shi kakpa nɛ k wɔ a chela.

⁸ Enyɛnpe Ebɔrɛ na e daŋ mɔ Ijipt be efuli so be ewurkoŋ nɛ asɔbɔya be bibi juŋkparso kikɛ na.

⁹ Mo e daŋ bɔla emamachisheŋ nɛ alemaŋkarsheŋ so ŋ gberge Ijipt be ewura, Fɛɛro, nɛ mbe basa kikɛ kusoe na.

¹⁰ E daŋ shin nɛ efuli damtaana mur nɛ bewura lempo wu nna.

¹¹ Loŋ be bewura na be beko e daa la: Amɔri be ewura nɛ baa tre Sihɔn na; nɛ Bashan be ewura nɛ baa tre Ɔg na nɛ Keenan be efuli so be bewuraana.

¹² E daŋ ta bewura na be nsawule nna n sa mbe basa, Israɛlebi, fanɛ bumo be kapetɛsawule.

¹³ O Enyɛnpe Ebɔrɛ, fo ketre wɔtɔ nna mbaanaayɔ, kekurgeto kikɛ to be basa beeŋ baa nyiŋi kumo.

¹⁴ Ŋkpal manɛ so, Enyɛnpe Ebɔrɛ maaŋ ji m bri mbe basa; e beeŋ wu bekama nɛ baa shuŋ mo na kuwɔr.

¹⁵ Shuwa nɛ gbiti e la efuli pɔtɛana be agbirana; edimɛdi e ta enɔ n lɔŋɛ amo.

¹⁶ Agbirana na kɔ nnɔ nɛ anishi, amo alɛ maaŋ tiŋ m malga ŋko n wu shɛŋ.

¹⁷ A kɔ asoe, amo alɛ maaŋ tiŋ n nu asheŋ; a maaŋ tiŋ n fute gba kuraa.

¹⁸ Bekama nɛ b lɔŋɛ agbirana ere ŋko n yirda amo beeŋ ki basa fuloŋ fanɛ amo.

¹⁹ Israɛl be basa nɛ bɔrɛmatapo Ɛɛrɔn be kanaŋ to be basa kikɛ, men kpaŋ Enyɛnpe Ebɔrɛ na.

²⁰ Livai be kanaŋ to be basa nɛ bekama nɛ baa bunyaŋ Ebɔrɛ na, men kpaŋ Enyɛnpe Ebɔrɛ na.

²¹ Men kpaŋ Enyɛnpe Ebɔrɛ nɛ e chena Jerusalɛm to ashi Zayɔn be kebee na so na. Men kpaŋ Enyɛnpe Ebɔrɛ na!