Nshɛ 132 - EBƆRƐ BE KAWƆL

Ebɔrɛ ka wɔ mbe basa to saŋkama be asheŋ

¹ O Enyɛnpe Ebɔrɛ, baa nyiŋi Ewura Deevid nɛ awurfoŋ nɛ e ji na kikɛ be asheŋ.

² Nyiŋi kɔnɔ nɛ e daŋ nase n sa fo, Enyɛnpetale Ebɔrɛ nɛ an nananyɛn Jeekɔb daŋ shuŋ dra dra na:

³ E yɛ: “M maaŋ yɔ epe, ŋko n ya dese ma gedo so;

⁴ edi malɛ maaŋ la ma hale nɛ mee di,

⁵ n ya fo saŋɛ nɛ meeŋ nya ekpa m pɔr bɔrɛlambu n sa Enyɛnpetale Ebɔrɛ nɛ e la Jeekɔb be Ebɔrɛ na.”

⁶ Jemanɛ nɛ an daa wɔ Bɛtlɛhɛm na, nɛ an nu fanɛ Enyɛnpe Ebɔrɛ na be ŋkre be deka na daa wɔ kakpa ko nɛ k mata kakpa nɛ baa tre Jearim na.

⁷ Ndoŋ nna nɛ an kaŋɛ le: Men shin nɛ an yɔ Enyɛnpe Ebɔrɛ na pe n ya gbir mbe aya ase m bunyaŋ mo.

⁸ O Enyɛnpe Ebɔrɛ, shin nɛ fo ŋkre be deka nɛ k yili n sa fo eleŋgboŋ na, e ba kaa wɔ fo bɔrɛlambu to mbaanaayɔ.

⁹ Shin nɛ fo bɔrɛmatapoana e baa wora asheŋ niŋiso, nseŋ shin nɛ fo basa nɛ baa ji kashenteŋ a sa fo na e baa boŋ nshɛ nsaa ji eyur kagbenefuliso.

¹⁰ Enyɛnpe Ebɔrɛ, Ewura Deevid la esa nɛ fo lara n sa fo kumu nna, amoso sa maŋ kini mo n lɛ.

¹¹ Fo e daŋ bɔ ntaŋ n nase kɔnɔ n sa mo; kumo alɛ la kɔnɔ naseso nɛ feeŋ wora m bɔlɔ so nna. Fo yɛ: “Jemanɛ kikɛ meeŋ shin nɛ fo kaman to ebi e baa ji kuwura.

¹² Nɛ fo kaman to ebi beeŋ baa bɛ ma nɛ fo be kɔnɔkoŋwule be ŋkre na so nsaa wora ma keŋini kasonu, kumo ere meeŋ shin nɛ fo kaman to ebi e baa ji Israɛl be kuwura mbaanaayɔ.”

¹³ Enyɛnpe Ebɔrɛ na e lara Zayɔn be kebee ashi Jerusalɛm to, nɛ k baa la mbe echenakpa.

¹⁴ E yɛ: “Kakpa nɛ meeŋ baa wɔ mbaanaayɔ nde; kakpa nɛ meeŋ chena a ji kuwura nna na.

¹⁵ Meeŋ nɛfa Jerusalɛm alegaiso, Kumo to be betirpo gba beeŋ baa nya a ji a moɛ.

¹⁶ Meeŋ nɛfa kusɔ kama nɛ bɔrɛmatapoana na beeŋ baa wora nɛ basa na malɛ e baa boŋ nshɛ kagbenefuliso.

¹⁷ Meeŋ shin nɛ Deevid be kuwurji e nya eleŋgboŋ. Esa kama nɛ meeŋ lara m buu mo kuwura beeŋ baa nyɛkpɛ a fuli to fanɛ fitila na.

¹⁸ E beeŋ baa buu kuwurwuro nɛ k bee nyɛkpɛ. Ama meeŋ shin nɛ mo doŋana bre a ji anishinyɔr.”