Nshɛ 124 - EBƆRƐ BE KAWƆL

Ebɔrɛ ka la mbe basa be ekumpo be asheŋ

¹ Men shin nɛ Israɛl be basa e kaŋɛ le: Enyɛnpe Ebɔrɛ na daa maa wɔ anyi be kaman nna; manɛ nɛ anyi daa beeŋ wora?

² Jemanɛ nɛ an doŋana daa kɔ anyi na, e daa wɔ anyi kutɔ nna.

³ B daa sha kemɔ anyi kikɛ nna m mur, ŋkpal b ka daŋ nya agbo ga so.

⁴ N dafanɛ bumo be agbo nɛ k daŋ koso fanɛ lɔr ka bɔlɔ n dii kepla so na daa beeŋ dii m muni anyi so.

⁵ Nchu nɛ e daa baga to a shile ga ere daa beeŋ sulɔ anyi n yɔ.

⁶ Men shin nɛ an di Enyɛnpe Ebɔrɛ nɛ e maŋ sa an doŋana ekpa, nɛ b we anyi m mur fanɛ kupuŋ to be asɔbɔya na epaŋ.

⁷ An nya anyi be amu n shile fanɛ kusɔbɔya ka gbaŋ ekpampo be kejigbelɛ n lɛ nseŋ nya n shile na nna.

⁸ Anyi be kechɛto bee shi Enyɛnpe Ebɔrɛ nɛ e to esoso nɛ kasawule na kutɔ nna.