Nshɛ 121 - EBƆRƐ BE KAWƆL

Ebɔrɛ ka beeŋ baa kuŋ mbe basa be asheŋ

¹ N to kenishi ŋ keni abee so; Nnɛ nɛ ma kechɛto bee shi a ba?

² Ma kechɛto bee shi Enyɛnpe Ebɔrɛ nɛ e to esoso nɛ kasawule na kutɔ nna.

³ E maaŋ shin nɛ fo fɛrge n tɔr; Edi maa la fo ekumpo na.

⁴ Kashenteŋto edi maa la Israɛl be ekumpo na.

⁵ Enyɛnpe Ebɔrɛ na e naa keni fo so; mo alɛ wɔ fo kutɔ nna a kuŋ fo saŋkama.

⁶ Kapiidi be epeŋi maaŋ tiŋ n doro fo, kanyɛso be kufɔl gba maaŋ tiŋ n wora fo shɛŋ.

⁷ Enyɛnpe Ebɔrɛ na e naŋ kuŋ fo ashi kusɔ kama nɛ k beeŋ tiŋ n doro fo, ŋko m mɔ fo. Saŋɛ na so, shɛŋ shɛŋ maaŋ wora fo.

⁸ Fo keyɔ nɛ keba kikɛ to, mo e naaŋ baa kuŋ fo mbaanaayɔ.