Nshɛ 119 - EBƆRƐ BE KAWƆL

Enyɛnpe Ebɔrɛ na be Mbra be asheŋ

¹ Kagbenefuli la bekama nɛ bumo be kebaawɔtɔ maŋ kɔ saŋgre kikɛ nɛ baa wora asheŋ a bɛ Enyɛnpe Ebɔrɛ be mbra be ekpa so na peya nna.

² Kagbenefuli la bekama nɛ baa bɛ mbe atande so, nsaa wora mo kasonu ashi bumo be ŋgbene to na peya nna.

³ B maa wora asheŋ lubi, baa wora asheŋ nɛ a bɛ Enyɛnpe Ebɔrɛ be ekpa so nna.

⁴ Enyɛnpe Ebɔrɛ, fo e sa anyi fo mbraana na, nsaa sha fanɛ an baa wora amo kasonu kashenteŋto.

⁵ Ekpa kikɛ so, n daa sha ketiŋ m bɛ fo mbraana so kashenteŋto nna!

⁶ M maaŋ ji anishinyɔr jemanɛ nɛ meeŋ baa bɛ fo mbraana so na.

⁷ Ma kekoya fo mbra niŋiso na e naŋ shin nɛ ŋ kpaŋ fo kagbenefuliso.

⁸ Meeŋ wora fo mbraana kasonu, amoso sa maŋ kaŋ pal kaman n sa ma!

Kewora Ebɔrɛ be mbra na kasonu be asheŋ

⁹ Kebaawora fo kamalga kasonu e naaŋ shin nɛ mbifɔlbi be kebaawɔtɔ e baa walɛ nseŋ niŋi.

¹⁰ Meeŋ shuŋ fo nɛ ma kagbene kikɛ; sa maŋ shin nɛ n lar kebaawora fo mbraana kasonu to.

¹¹ N ta fo mbra nna n wɔtɔ ma kagbene to, saŋɛ na so m maaŋ wora kulubi ŋ gbiti fo.

¹² O Enyɛnpe Ebɔrɛ, mee kpaŋ fo nna; ŋini ma fo mbraana na.

¹³ Meeŋ bugi kɔnɔ ŋ kaŋɛ beko awɔrso fo mbraana nɛ fo sa na kikɛ be asheŋ.

¹⁴ Kebaa bɛ fo mbraana so bee fuli ma kagbene a chɔ kebaakɔ kedama damta.

¹⁵ Mee koya fo mbraana nna, nsaa mige fo keŋini to a keni nɛnɛ.

¹⁶ Ma kagbene bee fuli fo mbra so nna; ma alɛ maaŋ teŋ fo mmalga so kikɛ.

Kagbenefuli nɛ k wɔ Ebɔrɛ be mbra to be asheŋ

¹⁷ Wora fo kayɛrbi kelela; saŋɛ na so meeŋ baa wɔtɔ nsaa wora fo kamalga kasonu.

¹⁸ Bugi ma nfɛra to nɛ n tiŋ m pin emamachisheŋ nɛ e wɔ fo mbra to.

¹⁹ Efɔ e la ma ashi kasawule ere so; amoso sa maŋ ta fo mbraana ŋ ŋana ma so.

²⁰ Kusɔ nɛ ma kagbene bee sha ga e la fanɛ ŋ ka beeŋ baa nyi fo mbraana na jemanɛ kikɛ.

²¹ Fo e naa gberge kamoowuwuraana nɛ b maŋ la shɛŋ nseŋ kini kewora fo mbraana kasonu na kusoe.

²² Lara ma ashi bumo be katege nɛ kemɔmɔshia to; ŋkpal ŋ ka bɛ fo mbraana so so.

²³ Bewurjipo shɛr a kre ma ŋkre lubi, ama ma ere bee fɛ fo mbraana be asheŋ nna.

²⁴ Fo mbraana e naa shin nɛ ma kagbene bee fuli ma ga; amo e naa ji ma asoe to.

²⁵ A ka gbrɛ nɛ n wu n yɔ eshishɛr to; shin nɛ fo kamalga na e naŋ sa ma ŋkpa popɔr.

²⁶ Ŋ ka kaŋɛ fo ma etɔrɔbi kikɛ na, fo nu ma kabɔrɛkule nna. Naniere ŋini ma fo atande.

²⁷ Chɛ ma to nɛ n tiŋ m pin fo mbraana to, saŋɛ na so meeŋ baa fɛ fo emamachisheŋ be asheŋ.

²⁸ Ma ebɔl to duŋi ma alegaiso nna; leŋ ma to fanɛ kananɛ fo nase kɔnɔ na.

²⁹ Shin nɛ m baa gelge kafulesheŋ; wu ma kuwɔr nseŋ ŋini ma fo mbra na.

³⁰ Ma ere yili kumo fanɛ meeŋ baa wɔ kashenteŋji be kebaawɔtɔ to nna; nsaa sa fo mbraana bunyaŋ.

³¹ O Enyɛnpe Ebɔrɛ, ma ere bɛ fo mbraana so nna; amoso sa maŋ shin nɛ n ji anishinyɔr.

³² N wora shiriya kenishipereso nna nɛ ŋ wora fo mbraana kasonu, ŋkpal manɛ so, feeŋ chɛ ma to nɛ n nya kepinto n ti so.

Kekule Ebɔrɛ n fin kepinto be asheŋ

³³ Enyɛnpe Ebɔrɛ, ŋini ma fo mbraana be kifi to, saŋɛ na so, meeŋ baa wora amo kasonu saŋkikɛ.

³⁴ Chɛ ma to nɛ m pin fo mbra to nseŋ wora kumo kasonu; saŋɛ na so, meeŋ ta ma kagbene kikɛ m bɛ kumo so.

³⁵ Ta fo mbraana na a ŋini ma ekpa, ŋkpal manɛ so, amo e naa fuli ma kagbene.

³⁶ Shin nɛ ma kagbene e kilgi a sha kebaawora fo mbraana kasonu a chɔ kebaasha kedamaya.

³⁷ Lara ma lakal ashi asheŋ fuloŋ so; nseŋ shin nɛ ma kebaawɔtɔ e baa du fanɛ kananɛ fo kamalga bee ŋini na.

³⁸ N la fo kayɛrbi nna. Wora kusɔ nɛ fo nase kɔnɔ n sa bekama nɛ baa ŋana fo na n sa ma alɛ gba.

³⁹ Baa kuŋ ma ashi ŋaba nɛ mee ŋana to; ŋkpal manɛ so, fo mbraana walɛ nna.

⁴⁰ Mee sha kebaawora fo mbraana kasonu ga; Sa ma ŋkpa popɔr, ŋkpal fo ka la esa niŋiso so.

Kebaa yirda Ebɔrɛ be mbraana be asheŋ

⁴¹ Enyɛnpe Ebɔrɛ, ŋini ma fo kasha nseŋ mɔlga ma, fanɛ kananɛ fo nase kɔnɔ na;

⁴² saŋɛ na so meeŋ tiŋ n tuge bumo nɛ baa tege ma na be mmalga to; ŋkpal manɛ so, fo kamalga nɛ n yirda.

⁴³ Jemanɛ kikɛ sa maŋ kaŋ lara fo kashenteŋ be mmalga na ma kɔnɔ to; ŋkpal manɛ so, ma tama wɔ fo mbraana to nna.

⁴⁴ Meeŋ baa wora fo mbra na kasonu, hale mbaanaayɔ.

⁴⁵ Ŋkpal ŋ ka bee wora fo mbraana kasonu so, n nya ma kumu nna a ji ma keparso.

⁴⁶ Ma alɛ beeŋ baa malga fo mbraana be asheŋ a sa bewurjipo nsaa maa ŋana anishinyɔr.

⁴⁷ Ŋkpal ŋ ka bee sha fo mbraana na so, amo be asheŋ bee par ma, a fuli ma kagbene.

⁴⁸ Mee sha fo mbraana na nsaa sa amo bunyaŋ, amoso meeŋ ta amo n wɔtɔ kumu to a fɛ amo be asheŋ.

Keta yirda n deŋi Ebɔrɛ be mbra so be asheŋ

⁴⁹ Baa nyiŋi kɔnɔ nɛ fo nase n sa ma, fo kayɛrbi na; ŋkpal manɛ so, ma tama deŋ kumo so nna.

⁵⁰ Ashi ma etɔrɔ to gba, n daŋ nya kelolo nna ŋkpal fo kɔnɔ naseso ka sa ma ŋkpa so.

⁵¹ Kamoowuwuraana bee wora ma eyurto nna, ama ma alɛ maŋ lar fo mbra kaman.

⁵² O Enyɛnpe Ebɔrɛ, n nyiŋi fo mbra nɛ e wɔtɔ dra dra na kikɛ na; amo e naa bar ma kagbenewushi.

⁵³ M baŋ wu kumukpakpasowura ka bee wora a da fo mbra so, k bee kaa ma kagbene nna.

⁵⁴ Kaplɛkama nɛ n wɔ, fo mbra be nshɛ nɛ mee boŋ.

⁵⁵ Kanyɛso gba mee fɛ fo, Enyɛnpe Ebɔrɛ na be asheŋ nna, nsaa wora fo mbra kasonu.

⁵⁶ Kusɔ nɛ mee wora saŋkikɛ e la kebaawora fo mbra na kasonu.

Keta fo kumu n deŋi Ebɔrɛ be mbra so be asheŋ

⁵⁷ Fo, Enyɛnpe Ebɔrɛ na e la ma kusɔ kikɛ. N nase kɔnɔ fanɛ meeŋ wora fo mmalga kasonu.

⁵⁸ Mee kule fo nna ashi ma kagbene to kikɛ fanɛ fo wu ma kuwɔr fanɛ kananɛ fo nase kɔnɔ na.

⁵⁹ Ŋ keni ŋ gbagba be asheŋ woraso to nɛnɛ nseŋ nase kɔnɔ fanɛ meeŋ bɛ fo mbraana so.

⁶⁰ Meeŋ baa nya manaŋ a wora fo mbraana kasonu.

⁶¹ Hale nɛ kumukpakpasowuraana ta efɔl ŋ kre ma gba, m maaŋ teŋ fo mbra so.

⁶² Mee koso kiidiso nna a kpaŋ fo, ŋkpal fo mbra niŋiso na so.

⁶³ Ekama nɛ e bee shuŋ fo ŋko a wora fo mbraana kasonu na la n teri nna.

⁶⁴ O Enyɛnpe Ebɔrɛ, fo kasha nɛ k maa loge na bɔlɔ kasawule ere kikɛ so nna; amoso ŋini ma fo mbraana na.

Enyɛnpe Ebɔrɛ be mbra na be tɔnɔ be asheŋ

⁶⁵ Enyɛnpe Ebɔrɛ, wora fo kayɛrbi kelela fanɛ kananɛ fo nase kɔnɔ ashi fo kamalga to na.

⁶⁶ Sa ma kanyiasheŋ nɛ nfɛra lela, ŋkpal manɛ so, fo mbraana nɛ n yirda.

⁶⁷ N daŋ wora n da so nna nɛ fo gberge ma kusoe, ama naniere bre n wora fo kamalga kasonu nna na.

⁶⁸ Fo la esa lela nna nɛ fo asheŋ woraso kikɛ la asheŋ lela; amoso ŋini ma fo mbraana.

⁶⁹ Kamoowuwuraana ku efɛ n deŋi ma a fin kejija ma ketre; ama ma kagbene kikɛ nɛ ŋ kɔ a bɛ fo mbraana na so.

⁷⁰ B maa pin fo asheŋ to, ama ma ere be kagbene bee fuli fo mbra so nna.

⁷¹ Kasogberge nɛ n daŋ nya na daŋ chɛ ma to; k daŋ chɛ ma to nɛ ŋ koya fo mbraana.

⁷² Mbra nɛ fo ta n sa ma na kɔ kechɛto n sa ma a chɔ durnya to be amansherbi kikɛ.

Ebɔrɛ be mbra ka bee ji asheŋ nɛnɛ be asheŋ

⁷³ Fo e to ma nseŋ bela ma eyur n chuge abar so; sa ma kanyiasheŋ nɛ ŋ koya fo mbraana na.

⁷⁴ Bumo nɛ baa bunyaŋ fo beeŋ wu ma nɛ bumo be ŋgbene e fuli bumo ŋkpal ŋ ka ta ma tama n wɔtɔ fo kamalga to so.

⁷⁵ Enyɛnpe Ebɔrɛ, n nyi fanɛ fo mbra niŋi nna; fo ekpa so nɛ fo gberge ma kusoe.

⁷⁶ Shin nɛ fo kasha nɛ k maa loge na e baa lolo ma, fanɛ kananɛ fo nase kɔnɔ n sa ma, fo kayɛrbi na.

⁷⁷ Wu ma kuwɔr n shin nɛ m baa wɔ ŋkpa to, ŋkpal fo mbra ka bee fuli ma kagbene so.

⁷⁸ Shin nɛ kamoowuwuraana e ji anishinyɔr ŋkpal b kaa bee ku efɛ a deŋi ma so; ma ere beeŋ ta fo mbra n wɔtɔ kumu to a fɛ amo be asheŋ.

⁷⁹ Shin nɛ bekama nɛ baa bunyaŋ fo nsaa nyi fo mbraana na e ba ma kutɔ.

⁸⁰ Shin nɛ m baa sa fo mbraana bunyaŋ kashenteŋto, saŋɛ na so, m maaŋ ji anishinyɔr.

Kesɔnyige be kabɔrɛkule be asheŋ

⁸¹ N jo fo, Enyɛnpe Ebɔrɛ, nɛ fo sɔ ma n yige n ya gben; ama ma tama kraa wɔ fo kamalga to.

⁸² N to kenishi a keni fo kɔnɔ naseso ekpa n ya gben. Saŋɛ mo nɛ feeŋ wu ma kuwɔr nseŋ chɛ ma to?

⁸³ M maaŋ naa kɔ tɔnɔ fanɛ yabra be kapuya bureso; ama ma alɛ kraa maŋ teŋ fo mbraana so.

⁸⁴ Saŋɛ mo nɛ a daga fanɛ n jo n ya fo? Jemanɛ mo nɛ feeŋ gberge basa nɛ baa kɔrfɛ ma na kusoe?

⁸⁵ Kamoowuwuraana nɛ b maa wora fo mbra kasonu kur amaŋ nna n nase a jo ma nɛ n tɔr to.

⁸⁶ Esa beeŋ tiŋ n yirda fo mbraana kikɛ; basa bee ku efɛ nna a tɔrɔ ma, amoso chɛ ma to!

⁸⁷ A ka gbrɛbi nɛ b mɔ ma, ama ŋ kraŋ maŋ kplaŋ fo mbraana so.

⁸⁸ Ŋini ma fo kasha n shin nɛ m baa wɔ ŋkpa to; saŋɛ na so, meeŋ wora fo mbraana kikɛ kasonu.

Keyirda Enyɛnpe Ebɔrɛ be mbra na be asheŋ

⁸⁹ O Enyɛnpe Ebɔrɛ, fo kamalga wɔtɔ nna mbaanaayɔ; ebɔrɛso nɛ k wɔ hale nɛ mbre.

⁹⁰ Fo kashenteŋji malɛ wɔtɔ nna n sa kekurgeto kama to ebi. Fo e to kasawule n nase kumo be kakpa, nɛ k dese dindiŋ a maa fifir.

⁹¹ Asɔ kikɛ bee shuŋ fo nna fanɛ fo nyɛrbi; fo mbraana kraa shuŋ hale kabre gba.

⁹² Nɛ n daa maa nya kagbenefuli ashi fo mbraana to nna, ndafanɛ n wu ashi ma awurfoŋ to.

⁹³ M maaŋ teŋ fo keŋini so kikɛ; ŋkpal manɛ so, amo nɛ fo bɔla so n sa ma ŋkpa nɛ n wɔtɔ.

⁹⁴ Mɔlga ma, ŋkpal manɛ so, n la feya nna! Ma alɛ wora ania nna fanɛ meeŋ wora fo mbraana kasonu.

⁹⁵ Kumukpakpasowuraana bee jo ma nna nɛ b mɔ ma, ama meeŋ wɔtɔ lakal fo mbraana to n wora amo kasonu.

⁹⁶ N wu fanɛ kusɔ kama maŋ niŋi kumo alɛ kɔ ekar; fo mbraana nawule e niŋi nsaa maa kɔ ekar.

⁹⁷ Mee sha fo mbraana na ga! Mee fɛ amo be asheŋ kachɛ lelemu kikɛ nna.

⁹⁸ Fo mbraana maa lar ma nfɛra to kikɛ, amo alɛ bee shin nɛ mee pin asheŋ to a chɔ ma doŋana nna.

⁹⁹ Ŋ ka bee fɛ fo mbraana be asheŋ ga so, mee pin asheŋ a chɔ ma beŋinipoana kikɛ gba.

¹⁰⁰ Ŋkpal ŋ ka bee wora fo mbraana kasonu so, ŋ kɔ kanyiasheŋ ga a chɔ basakpar gba.

¹⁰¹ Ŋ ka bee sha kelara ma kumu asheŋ lubi to so, mee wora fo mbraana kasonu nna.

¹⁰² Ma alɛ maŋ yige fo mbraana n lɛ ŋkpal fo gbagba ka la ma eŋinipo so.

¹⁰³ Fo mbraana bee wora ma ebel a chɔ mushoŋchu gba.

¹⁰⁴ Fo mbraana so nɛ mee bɔla a pin asheŋ to, amoso nɛ ŋ kishi efɛsheŋ kikɛ na.

Kefulto nɛ k wɔ Ebɔrɛ be mbra to be asheŋ

¹⁰⁵ Fo kamalga du fanɛ fitila nna n sa ma, kumo e naa shin nɛ ma ekpa so bee fulto nɛ mee wu a wora asheŋ.

¹⁰⁶ M bɔ ntaŋ n nase kɔnɔ nsaa yil kumo so fanɛ meeŋ wora fo mbra niŋisoana na kasonu.

¹⁰⁷ Awurfoŋ damta nɛ n ji! Amoso, Enyɛnpe Ebɔrɛ, shin nɛ m baa kraa wɔ ŋkpa to, fanɛ kananɛ fo kaŋɛ fanɛ feeŋ wora na.

¹⁰⁸ O Enyɛnpe Ebɔrɛ, sɔ ma kapandi be sarga nseŋ ŋini ma fo mbraana na.

¹⁰⁹ Jemanɛ kikɛ mee ta ma ŋkpa nna a pɛl, ama m maaŋ teŋ fo mbraana bre so kikɛ.

¹¹⁰ Kumukpakpasowuraana sho ma ajigbelɛ nna, ama ma alɛ maŋ lar fo mbraana kaman kikɛ.

¹¹¹ Fo mbraana na la ma mpetɛsɔ nna mbaanaayɔ; amo e naa shin nɛ ma kagbene bee fuli ma.

¹¹² Ma ere yili kumo ma kagbene to fanɛ meeŋ wora fo mbraana kasonu hale n ya fo ma kaluwuachɛ.

¹¹³ Ŋ kishi nfɛraanyɔnyɔwuraana be asheŋ ga; ama mee sha fo mbra bre be asheŋ.

¹¹⁴ Fo kutɔ nɛ mee nya ma kumu a ji, fo alɛ e la ma ekumpo a kuŋ ma; amoso nɛ n ta ma tama n deŋi fo nnɔ naseso so na.

¹¹⁵ Alubiworapoana, men shile ma so! Ma ere beeŋ wora ma Ebɔrɛ be mbraana kasonu.

¹¹⁶ Sa ma eleŋ fanɛ kananɛ fo nase kɔnɔ na nseŋ shin nɛ m baa wɔ ŋkpa to. Sa maŋ shin nɛ ma tama e to jiga nɛ n ji anishinyɔr.

¹¹⁷ Baa keni ma so nɛ n nya ma kumu a wɔtɔ, nɛ jemanɛ kikɛ ma lakal e baa wɔ fo mbraana so.

¹¹⁸ Fee lar bekama nɛ baa kini kebaawora fo mbraana kasonu na kaman nna; bumo alɛ be kafulesheŋ la asheŋ fuloŋ nna.

¹¹⁹ Fee wu kumukpakpasowuraana fanɛ epi nna, amoso nɛ meeŋ bɛ fo keŋini so.

¹²⁰ Ŋkpal kananɛ fo demuji be mbraana du so, kufu bee pɛ ma nna nɛ mee chicha.

¹²¹ N wora kusɔ nɛ k daga nsaa walɛ; sa maŋ yige ma n sa bedoŋ.

¹²² Jande keni fo kayɛrbi so nɛnɛ; sa maŋ shin nɛ kamoowuwuraana e nya ma ŋ kɔrfɛ.

¹²³ Ŋ keni fo kumɔlga nɛ fo nase kumo be kɔnɔ na ekpa hale nɛ ma anishi gben a besa.

¹²⁴ Ŋini fo kayɛrbi fo kasha nɛ k maa loge na, nseŋ ŋini ma fo mbraana na.

¹²⁵ N la fo kayɛrbi nna a shuŋ fo, sa ma asheŋ be kepinto nɛ m baa pin fo mbraana to.

¹²⁶ O, Enyɛnpe Ebɔrɛ, jemanɛ fo nɛ fo wora kusɔ ko! Ŋkpal manɛ so, basa bee wora a da fo mbraana so nna.

¹²⁷ Mee sha fo mbraana a chɔ shuwa, mee sha amo a chɔ shuwa gbagba gba.

¹²⁸ Mee bɛ fo mbraana kikɛ so nna, ŋ kishi ekpa lubi be yiri kikɛ be kebɔla so n wora asheŋ.

¹²⁹ Fo mbraana la mamachi nna pasaa, amoso nɛ mee wora amo kasonu na.

¹³⁰ Kebaapin fo mmalga to bee bugi nfɛra to nna nsaa sa basa nɛ b maŋ nyi asheŋ kanyiasheŋ.

¹³¹ Mee sha kepere kenishi nna m pin kusɔ kama nɛ fee ŋini to.

¹³² Naŋ laŋɛ fo nfɛra m ba ma so nseŋ wu ma kuwɔr, fanɛ kananɛ fee kaa wora bekama nɛ fee sha na.

¹³³ Sa maŋ shin nɛ n tɔr fanɛ kananɛ fo nase kɔnɔ na, fo alɛ e sa maŋ shin nɛ kulubi e pɔɔ ma so.

¹³⁴ Baa kuŋ ma nɛ basa e sa maŋ nya ma ŋ kɔrfɛ; saŋɛ na so meeŋ wora fo mbraana kasonu.

¹³⁵ Mushe n wora ma, fo kayɛrbi, nseŋ ŋini ma fo mbraana na.

¹³⁶ Mee kaa shu anishichubi nna, ŋkpal basa ka maa wora fo mbraana kasonu so.

¹³⁷ O Enyɛnpe Ebɔrɛ, fo niŋi nna nɛ fo mbraana malɛ bɔla ekpa.

¹³⁸ Fo keŋini kikɛ la kashenteŋ nna nseŋ daga esa ka yirda amo.

¹³⁹ Jemanɛ kikɛ nɛ bedoŋ baŋ kplaŋ fo mbraana so, k bee chɔɔ ma to nna fanɛ edɛ.

¹⁴⁰ Fo kamalga du fanɛ shuwa nna n sa fo kayɛrbi; mee sha kumo nsaa keni kumo a bɔlɔ kenishi alegaiso.

¹⁴¹ Ekama maa ta ma a tre shɛŋ, ama ma alɛ maa teŋ fo mbraana so.

¹⁴² Fo kebaawɔtɔ niŋiso wɔtɔ nna mbaanaayɔ; nɛ fo mbra malɛ la kashenteŋ jemanɛ kikɛ.

¹⁴³ Etɔrɔ nɛ kagbenejija damta wɔ ma to; ama fo mbraana bee sa ma kagbenefuli nna.

¹⁴⁴ Fo mbraana niŋi nna jemanɛ kikɛ, amoso chɛ ma to nɛ m pin amo to nsaa wɔ ŋkpa to.

¹⁴⁵ O Enyɛnpe Ebɔrɛ, ma kagbene kikɛ nɛ ŋ kɔ a tre fo, nu ma ketre ere n shin nɛ n wora fo mbraana kasonu.

¹⁴⁶ Fo nɛ mee shu a tre; mɔlga ma nseŋ shin nɛ n wora fo mbraana kasonu.

¹⁴⁷ Pɔɛŋ nɛ epeŋi e pete gba, fo nɛ mee kule a fin kechɛto. N ta ma tama nna n deŋi fo kamalga naseso so.

¹⁴⁸ N dese nna a keni kanyɛ lelemu kikɛ, a fɛ fo mmalga naseso be asheŋ.

¹⁴⁹ Ŋini ma fo kasha nɛ k maa loge na nseŋ nu ma kekule; wu ma kuwɔr nseŋ mɔlga ma ŋkpa fanɛ kananɛ fo mbraana bee ŋini na.

¹⁵⁰ Basa nɛ b maa wora fo mbra kasonu kre bumo be ŋkre lubiana nna a fin ketɔrɔ ma.

¹⁵¹ Ama fo Enyɛnpe Ebɔrɛ na bre taga ma to nna, nɛ fo mbraana kikɛ la kashenteŋ.

¹⁵² Ŋ koya fo mbraana na m pin to fanɛ dra kikɛ nɛ fo yili kumo fanɛ a baa wɔtɔ mbaanaayɔ.

¹⁵³ Keni awurfoŋ nɛ mee ji so nseŋ mɔlga ma, ŋkpal manɛ so, m maŋ teŋ fo mbraana so.

¹⁵⁴ Kɔ n sa ma nseŋ sɔ ma n yige, mɔlga ma fanɛ kananɛ fo nase kɔnɔ na.

¹⁵⁵ Kumukpakpasowuraana maaŋ nya kumɔlga, ŋkpal b ka maa wora fo mbraana kasonu so.

¹⁵⁶ O Enyɛnpe Ebɔrɛ, fo kuwɔrwu be kasha shi ga; jande wu ma kuwɔr nseŋ mɔlga ma.

¹⁵⁷ Ŋ kɔ bedoŋ damta nɛ baa fin ma nɛ kulubi, ama m maa kini kebaawora fo mbraana kasonu.

¹⁵⁸ Ŋ kishi basa kama nɛ b maŋ kɔ yirda n sa fo, ŋkpal manɛ so, b maa wora fo mbraana kasonu.

¹⁵⁹ Keni kananɛ mee sha fo keŋini loŋ, O Enyɛnpe Ebɔrɛ, ŋini ma fo kasha nɛ k maa loge na nseŋ mɔlga ma.

¹⁶⁰ Fo mmalga kikɛ la kashenteŋ nna, nɛ fo mbraana nɛ a niŋi na wɔtɔ mbaanaayɔ.

Keta kumu n to Ebɔrɛ be mbra so be asheŋ

¹⁶¹ Kenyanyaŋɛso nɛ bewurjipo bee kɔ ma; ama ma ere bee sa fo kamalga bunyaŋ ashi ma kagbene to nna.

¹⁶² Fo nnɔ naseso bee fuli ma kagbene nna fanɛ esa nɛ e nya yawu kpakpaso be asɔ lela kena to nna.

¹⁶³ Ŋ kishi efɛsheŋ ga; maa sha amo be asheŋ, ama mee sha fo mbra bre.

¹⁶⁴ Ale shunu nɛ mee kpaŋ fo karechɛ kikɛ, ŋkpal fo mbraana ka niŋi nsaa maŋ kɔ ŋkpɛato so.

¹⁶⁵ Bekama nɛ baa sha fo mbraana na bee nya kayurwushi gboŋgboŋi nna; shɛŋ shɛŋ maaŋ tiŋ n shin nɛ b fiti n tɔr kikɛ.

¹⁶⁶ O Enyɛnpe Ebɔrɛ, mee jo fo nna, nɛ fo mɔlga ma nɛ m bɛ fo kanase so.

¹⁶⁷ Mee wora fo keŋini kasonu nna, ŋkpal ŋ ka bee sha amo ga so.

¹⁶⁸ Mee wora fo kanase nɛ keŋini kasonu nna; fo alɛ bee wu kusɔ nɛ mee wora kikɛ.

Kekule Ebɔrɛ n fin kechɛto be asheŋ

¹⁶⁹ Jande Enyɛnpe Ebɔrɛ, nu ma kabɔrɛkule; sa ma kepinto nɛ k shi fo kamalga to.

¹⁷⁰ Nu ma kabɔrɛkule nseŋ mɔlga ma fanɛ kananɛ fo nase kɔnɔ na.

¹⁷¹ Meeŋ bugi kɔnɔ ŋ kpaŋ fo, ŋkpal fo kaa bee ŋini ma fo mbraana so.

¹⁷² Meeŋ boŋ nshɛ a laŋɛ fo mbra be kaplɛa so; ŋkpal fo atande ka niŋi so.

¹⁷³ Wora shiriya n chɛ ma to, ŋkpal ŋ ka bee bɛ fo kusɔ nɛ fo yili so so.

¹⁷⁴ Enyɛnpe Ebɔrɛ, fo nɛ mee jo nɛ fo mɔlga ma, ŋkpal manɛ so, fo mbra e naa fuli ma kagbene.

¹⁷⁵ Shin nɛ m baa wɔ ŋkpa to, saŋɛ na so meeŋ baa kpaŋ fo. Jande shin nɛ n nya kechɛto ashi fo keŋini to.

¹⁷⁶ N la fo kayɛrbi nna nseŋ foe n luri to fanɛ kubolpɔ. Amoso jande fin ma, ŋkpal manɛ so, m maaŋ teŋ fo mbraana so kikɛ.