Nshɛ 118 - EBƆRƐ BE KAWƆL

Ebɔrɛ ka bee wu kuwɔr jemanɛ kikɛ be asheŋ

¹ Men di Enyɛnpe Ebɔrɛ na epaŋ, ŋkpal manɛ so, e walɛ nɛ mbe kasha nɛ k maa chɛrga na malɛ wɔtɔ mbaanaayɔ.

² Shin nɛ Israɛl be basa e kaŋɛ le: “Mbe kasha wɔtɔ nna mbaanaayɔ.”

³ Shin nɛ Ɛɛrɔn be laŋ to ebi, nɛ b la bɔrɛmatapoana na e kaŋɛ le: “Mbe kasha wɔtɔ nna mbaanaayɔ.”

⁴ Shin nɛ bekama nɛ baa bunyaŋ mo na e kaŋɛ le: “Mbe kasha wɔtɔ nna mbaanaayɔ.”

⁵ Ma awurfoŋ nɛ ebesa to nɛ n shu n tre Enyɛnpe Ebɔrɛ na, nɛ e nu ma kabɔrɛkule nseŋ lara kafɔŋ na ma so.

⁶ Enyɛnpe Ebɔrɛ na ka wɔ ŋ kutɔ so, m maaŋ naa ŋana kufu. Manɛ nɛ dimɛdi beeŋ tiŋ n wora ma?

⁷ Enyɛnpe Ebɔrɛ na ka la ma echɛtopo so, bedoŋ beeŋ kɔ n tɔr nɛ n wu bumo.

⁸ Keta fo yirda n to Enyɛnpe Ebɔrɛ so nɛ e baa kuŋ fo bɔ fo ka ta fo kumu n to nyiŋgbasa so

⁹ ŋko edimɛdi be bejuŋkparpo lempoana so.

¹⁰ Efuli damtaana e kulti ma n wɔtɔ, ama Enyɛnpe Ebɔrɛ na be eleŋgboŋ so, n tiŋ m mur bumo kikɛ nyam.

¹¹ B daa kɔ ma kaba kama so nna, ama Enyɛnpe Ebɔrɛ na be ketre to, n tiŋ m mur bumo.

¹² B daŋ ba mel ma so fanɛ emushoŋ nna, ama Enyɛnpe Ebɔrɛ na be ketre to, b daŋ chɔɔ m mur nna fanɛ edɛ ka tɔr afitiri wɔlso so na.

¹³ B daa kɔ ma kenishipereso nna; a daŋ ka gbrɛbi nɛ b pɔɔ ma so. Ama Enyɛnpe Ebɔrɛ na e daŋ chɛ ma to.

¹⁴ Enyɛnpe Ebɔrɛ na e wɔtɔ ma eleŋ to nseŋ sa ma kashɛ nɛ m boŋ; mo e mɔlga ma.

¹⁵ Ebɔrɛ be basa bee chena bumo be elaŋana to nna a boŋ kekɔmpɔɔso be nshɛ awɔrso a kaŋɛ: “Enyɛnpe Ebɔrɛ na be eleŋgboŋ na e wora asheŋgboŋ!

¹⁶ Enyɛnpe Ebɔrɛ na be eleŋgboŋ na e shin nɛ an kɔ m pɔɔ so. Enyɛnpe Ebɔrɛ na kɔ eleŋ pasaa!”

¹⁷ Amoso m maaŋ wu, meeŋ baa wɔ ŋkpa to, a ber kusɔ nɛ Enyɛnpe Ebɔrɛ na wora be kubomboŋ.

¹⁸ E daŋ gberge ma kusoe kenishipereso, ama mo alɛ maŋ shin nɛ n wu.

¹⁹ Men bugi kebaawɔtɔ niŋiso be mbunagboŋ n sa ma nɛ n luri to n di Enyɛnpe Ebɔrɛ na epaŋ.

²⁰ Enyɛnpe Ebɔrɛ na be kabunagboŋ na nɛ n da na; basa niŋiso nawule e naŋ tiŋ m bɔla kumo to n luri.

²¹ Meeŋ di fo, Enyɛnpe Ebɔrɛ na epaŋ, ŋkpal fo ka nu ma kabɔrɛkule nseŋ shin nɛ ŋ kɔ m pɔɔ so so.

²² Kejembu nɛ bepɔrpo kini n lɛ na e ki ebu na be kebonfu to be gbaltɔlase be kejembu lela na.

²³ Enyɛnpe Ebɔrɛ na e wora loŋ; anyi alɛ wu kumo fanɛ k la mamachi be kesheŋ nna.

²⁴ Kabre la Enyɛnpe Ebɔrɛ na be kachɛ nna, men shin nɛ anyi be ŋgbene e fuli, nɛ an ji eyur!

²⁵ O Enyɛnpe Ebɔrɛ, mɔlga anyi, nseŋ shin nɛ asheŋ a nyalɛ n sa anyi!

²⁶ Nɛfa la esa nɛ e bee ba Enyɛnpe Ebɔrɛ be ketre to na peya nna. Enyɛnpe Ebɔrɛ, fo bɔrɛlambu na ase nɛ an yil a nɛfa fo.

²⁷ Enyɛnpe Ebɔrɛ na e la Ebɔrɛ, mo e shin nɛ mbe kefulto nyaŋɛ n yuu anyi so! Men shin nɛ an ta abii be ayabi ŋ keta enɔ to nseŋ bɛ abar so a ji eyur a kulti bɔrɛsure na.

²⁸ Enyɛnpe Ebɔrɛ na e la ma Ebɔrɛ, ma alɛ beeŋ di mo epaŋ nseŋ ber mbe keshi be kebomboŋ n sa basa kikɛ nɛ b nu.

²⁹ Men di Enyɛnpe Ebɔrɛ na epaŋ, ŋkpal manɛ so, e walɛ nɛ mbe kasha nɛ k maa chɛrga na malɛ wɔtɔ mbaanaayɔ.