Nshɛ 116 - EBƆRƐ BE KAWƆL

Enyɛnpe Ebɔrɛ ka mɔlga esa be asheŋ

¹ Mee sha Enyɛnpe Ebɔrɛ na, ŋkpal e kaa bee nu ma kekule so. Ŋ ka kule mo fanɛ e wu ma kuwɔr, e daŋ nu ma kabɔrɛkule nna.

² Ŋkpal e ka bee kaŋ kusoe a nu ma kekule so, meeŋ baa shu a tre mo jemanɛ kikɛ ashi ma kebaawɔtɔ to.

³ Luwu daŋ kulti ma nna n wɔtɔ a funti ma; nɛ keyɔ nchaŋ to be kagbenejija daŋ tɔr ma so. Kufu nɛ kafɔŋ e daŋ bɔlɔ ma to.

⁴ Ndoŋ nna nɛ n shu n tre Enyɛnpe Ebɔrɛ na, fanɛ e jande e mɔlga ma!

⁵ Enyɛnpe Ebɔrɛ na bee wu kuwɔr nsaa walɛ; Kashenteŋto Ebɔrɛ kɔ kushuso pasaa.

⁶ Enyɛnpe Ebɔrɛ na e naa kuŋ bekama nɛ b maaŋ tiŋ n chɛ bumo be amu to. Asheŋ ka tu ma, mo e mɔlga ma.

⁷ Ŋkpal Enyɛnpe Ebɔrɛ na ka wora ma kelela so, shɛŋ be asheŋ maŋ naa fɔŋ ma ashi ma kagbene to.

⁸ Enyɛnpe Ebɔrɛ na daŋ mɔlga ma ashi luwu to nna; mo e daŋ kpra ma anishichubi, nseŋ kuŋ ma nɛ m maŋ fiti n tɔr.

⁹ Naniere ma nɛ mo e naŋ baa bɔ aya a nite ashi basa nɛ b wɔ ŋkpa to be kasawule so.

¹⁰ Ŋ ka daa ji awurfoŋ ga na gba, m maŋ yige yirda nɛ ŋ kɔ ashi mo to na.

¹¹ Jemanɛ nɛ kufu daa kɔ ma gba, m maŋ ta ma yirda n deŋi esa kikɛ so.

¹² Manɛ bre nɛ meeŋ ta ŋ ka Enyɛnpe Ebɔrɛ na kukɔ, ŋkpal alelasheŋ nɛ e bee wora a sa ma so?

¹³ Meeŋ bar yabra belbelso be sarga m ba di Enyɛnpe Ebɔrɛ na epaŋ, ŋkpal e ka mɔlga ma so.

¹⁴ Jemanɛ nɛ mbe basa kikɛ beeŋ shɛr abar so na nɛ meeŋ tia nnɔ nɛ n nase n sa mo na kikɛ.

¹⁵ Basa nɛ baa shuŋ Ebɔrɛ nɛnɛ na be luwu be asheŋ tir ga n sa Enyɛnpe Ebɔrɛ na.

¹⁶ O Enyɛnpe Ebɔrɛ, n la fo kayɛrbi kashenteŋto nna; kananɛ n nio shuŋ fo na nɛ ma alɛ gba bee shuŋ fo na. Fo e mɔlga ma ashi luwu to.

¹⁷ Meeŋ lara sarga n di fo epaŋ nseŋ shu n tre fo ashi ma kabɔrɛkule to.

^18-19 Jemanɛ nɛ fo basa beeŋ shɛr abar so fo bɔrɛlambu to ashi Jerusalɛm be kadegboŋ to na, nɛ meeŋ tia kɔnɔ nɛ n nase n sa fo na. Men kpaŋ Enyɛnpe Ebɔrɛ na!