Nshɛ 115 - EBƆRƐ BE KAWƆL

Enyɛnpe Ebɔrɛ na ka daga kekpaŋ be asheŋ

¹ Anyi ere maŋ daga fanɛ b kpaŋ anyi kuraa! Enyɛnpe Ebɔrɛ na nawule e daga fanɛ ekama nyam e kpaŋ mo; ŋkpal mbe kasha nɛ k maa chɛrga nɛ mbe kashenteŋji so.

² Manɛ e ba nɛ efuliana na be basa bee kaŋɛ le: “Men be Ebɔrɛ na wɔ nnɛ?”

³ Anyi be Ebɔrɛ na wɔ ebɔrɛso nna a wora kusɔ nɛ e bee sha.

⁴ Ama shuwa nɛ gbiti nɛ efuli pɔtɛana be basa bre ta n lɔŋɛ bumo be agbirana a shuŋ.

⁵ Agbirana na kɔ nnɔ, ama a maa malga, a kɔ anishi, ama a maa wu.

⁶ A kɔ asoe, ama a maa nu, nsaa kɔ mmuna, ama a maa nu efɛa.

⁷ Agbirana na kɔ enɔana, ama a maaŋ tiŋ m pɛ shɛŋ to, a kɔ aya, ama a maaŋ tiŋ n nite; a maaŋ tiŋ m malga ŋ kaŋɛ shɛŋ.

⁸ Bekama nɛ b lɔŋɛ agbirana na nɛ bumo nɛ b yirda amo na du jiga fanɛ agbirana na nna; b maŋ kɔ tɔnɔ kikɛ.

⁹ Israɛl be basa, men yirda Enyɛnpe Ebɔrɛ na, ŋkpal manɛ so, mo e naa chɛ menyi to nsaa kuŋ menyi.

¹⁰ Menyi nɛ men la Ɛɛrɔn be kanaŋ to ebi nsaa la bɔrɛmatapoana na, a daga fanɛ men yirda Enyɛnpe Ebɔrɛ na nɛ e baa chɛ menyi to nsaa kuŋ menyi.

¹¹ Menyi nɛ menyee bunyaŋ Ebɔrɛ na, a daga fanɛ menyi alɛ gba e yirda Enyɛnpe Ebɔrɛ na nɛ e baa chɛ menyi to nsaa kuŋ menyi.

¹² Enyɛnpe Ebɔrɛ bee nyiŋi anyi be asheŋ; mo alɛ beeŋ nɛfa anyi. E beeŋ nɛfa Israɛl be basa kikɛ nɛ Ɛɛrɔn be kanaŋ to ebi kikɛ.

¹³ E beeŋ nɛfa bekama nɛ baa bunyaŋ mo na; bewurjipo nɛ bebɔlpo kikɛ.

¹⁴ Ma kabɔrɛkule e la fanɛ Enyɛnpe Ebɔrɛ na beeŋ shin nɛ menyi nɛ men be kaman to ebi kikɛ e salga n wora keshi.

¹⁵ Enyɛnpe Ebɔrɛ nɛ e to esoso nɛ kasawule na e nɛfa menyi!

¹⁶ Ebɔrɛso la Enyɛnpe Ebɔrɛ na nawule peya nna, ama e ta kasawule nna n sa anyi edimɛdi.

¹⁷ Basa nɛ b teŋ wu n yɔ bubuni to maaŋ naŋ tiŋ ŋ kpaŋ Enyɛnpe Ebɔrɛ na.

¹⁸ Anyi nɛ an wɔ ŋkpa to ere nawule e naŋ tiŋ a di mo epaŋ naniere hale mbaanaayɔ. Men kpaŋ Enyɛnpe Ebɔrɛ na!