Nshɛ 112 - EBƆRƐ BE KAWƆL

Kagbenefuli nɛ esa lela kɔ be asheŋ

¹ Men kpaŋ Enyɛnpe Ebɔrɛ na awɔrso! Kagbenefuli la bekama nɛ baa bunyaŋ Enyɛnpe Ebɔrɛ na nsaa wora mbe mbraana kasonu kagbenefuliso na peya nna.

² Bumo be kaman to ebi beeŋ baa kɔ eleŋgboŋ ga kasawule so; ŋkpal manɛ so, Enyɛnpe Ebɔrɛ na bee nɛfa bekama nɛ baa wora asheŋ niŋiso na nna.

³ Baaŋ nyalɛ nseŋ dii dama; nɛ ekama malɛ e baa nyiŋi bumo ŋkpal bumo be aworbi ka niŋi so.

⁴ Basa nɛ baa wu kuwɔr nsaa la basa a wora asheŋ niŋiso na du fanɛ kefulto nna ashi tentembiri to.

⁵ Kebaawɔtɔ bee nite nɛnɛ nna a sa bekama nɛ baa bugi epunto a ta asɔ a paŋ beko nsaa ji kashenteŋ ashi bumo be keyawuji to na.

⁶ Shɛŋ maaŋ tiŋ n chɛrga bumo be kesheŋ wora; basa malɛ maaŋ teŋ bumo be alelasheŋ so kikɛ.

⁷ B maaŋ baa ŋana baru lubi ŋkpal manɛ so, bumo be ŋgbene baa yil kakpa koŋwule nna nɛ baa yirda Enyɛnpe Ebɔrɛ na.

⁸ Shɛŋ maa fɔŋ bumo ŋko a da bumo kufu; b baa nyi geeŋ fanɛ bumo doŋana beeŋ ji n tɔr.

⁹ Baa bugi ŋgbene nna a kɛ betentaŋasepo asɔ nɛ bumo be kelela be kewora malɛ maŋ kɔ ekar. Amoso basa bee nyiŋi bumo jemanɛ kikɛ nna.

¹⁰ Basa lubi baŋ wu basa nɛ b kɔ le be kebaawɔtɔ ere, baa nya agbo nna a we anyi to yurkishi so nseŋ foe eyur to. B maaŋ nya bumo be kepar kikɛ.