Nshɛ 111 - EBƆRƐ BE KAWƆL

Kekpaŋ Enyɛnpe Ebɔrɛ na be asheŋ

¹ Meeŋ kpaŋ Enyɛnpe Ebɔrɛ na ashi ma kagbene to. Ma alɛ beeŋ di mo epaŋ ashi mbe basa be nshɛr to.

² Enyɛnpe Ebɔrɛ na wora emamachisheŋ damta nna! Ekama nɛ amo be asheŋ bɔlɔ mo kenishi bee fɛ amo be asheŋ nna.

³ Enyɛnpe Ebɔrɛ na be asheŋ woraso kikɛ kɔ bunyaŋ nɛ kemaŋkura nna. Kusɔ kama nɛ e bee wora malɛ niŋi nna mbaanaayɔ.

⁴ Enyɛnpe Ebɔrɛ na maa shin nɛ anyee teŋ mbe emamachisheŋ so; Mo alɛ la esa nsaa wu kuwɔr nna.

⁵ E bee sa bekama nɛ baa bunyaŋ mo na ajibi nna. Mo alɛ nsaa nyiŋi mo nɛ bumo be kɔnɔkoŋwule be ŋkre na hale mbaanaayɔ.

⁶ Mo e lara mbe eleŋgboŋ na ŋ ŋini mbe basa, jemanɛ nɛ e sɔ efuli pɔtɛana be nsawule n sa bumo na.

⁷ Ebɔrɛ be kasheŋwora kikɛ to, e bee ji asheŋ nɛ amo be ekpa so nna. Esa beeŋ tiŋ n yirda mbe mbraana.

⁸ Amo alɛ wɔtɔ nna mbaanaayɔ. Kashenteŋ nɛ ekpa niŋiso so nɛ e bɔla so n sa mbraana na.

⁹ Ebɔrɛ e sɔ mbe basa n yige; mo e wora mo nɛ bumo be kɔnɔkoŋwule be ŋkre mbaanaayɔ. E la esa cheembi nɛ esa gboŋgboŋi nɛ e daga bunyaŋgboŋ nna.

¹⁰ Men baa bunyaŋ Enyɛnpe Ebɔrɛ na, ŋkpal manɛ so, ekpa nɛ esa beeŋ bɔla so n nya kanyiasheŋ nna na. Bekama nɛ baa bɛ mbe mbraana so na e naa pin asheŋ to nɛnɛ. Kapandi e baa la mo peya mbaanaayɔ.