Nshɛ 109 - EBƆRƐ BE KAWƆL

Kekule Ebɔrɛ n fin mbe kechɛto be asheŋ

¹ O Ebɔrɛ, mee kpaŋ fo nna. Amoso sa maŋ lo to loŋ; kaŋɛ ma kusɔ ko!

² Kumukpakpasowuraana nɛ befɛpo bee kɔ ma nna a ku efɛ a deŋi ma,

³ nsaa malga asheŋ lubi a laŋɛ ma kaplɛa so; nɛ m maŋ wora bumo shɛŋ.

⁴ Ma ere ta bumo fanɛ nteriana nna, a kule Ebɔrɛ a sa bumo, ama b kraa malga mmalga lubi nna a gbiti ma.

⁵ Kulubi nɛ baa ta a ka ma kelela be kukɔ, nsaa ta yurkishi a tal ma kasha to.

⁶ N doŋana yɛ: “Fin esa lubi ko nɛ e wu mo kulubi ŋ kaŋɛ fanɛ e wora kulubi ko nna.

⁷ Ji mo demu ŋ kaŋɛ fanɛ e ji n tɔr nna! Wu mbe kabɔrɛkule fanɛ efɛ nɛ e bee ku.

⁸ Ku mbe ŋkpa so nseŋ shin nɛ esa ko e sɔ mo so ashi mbe eshuŋkpa.

⁹ Ebɔrɛ e shin nɛ mbe mbia e ki amunibi, nɛ mbe eche e ki ekulpoche,

¹⁰ nseŋ naŋ shin nɛ mbe laŋ e bure nɛ mbia na e ki mbi jiga a di kowu nsaa na a kule a ji.

¹¹ Ebɔrɛ e shin nɛ basa nɛ e ji bumo be kukɔ e suge asɔ nɛ e kɔ kikɛ; n shin nɛ befɔ chil e sɔ asɔ nɛ e gben n nya na kikɛ mo kutɔ.

¹² Sa maŋ shin nɛ mbe asheŋ e baa tir esa kikɛ, ŋko n shin nɛ esa ko e sɔ mbe amunibi m bela kikɛ.

¹³ Ebɔrɛ e shin nɛ mbe kanaŋ nɛ kaman to ebi kikɛ e mur kuraa; nseŋ shin nɛ b teŋ bumo be atre so hale mbaanaayɔ.

¹⁴ Enyɛnpetale Ebɔrɛ e sa maŋ ta mo tutoana nɛ mo nanaana be alubi m paŋ bumo kikɛ.

¹⁵ Enyɛnpetale Ebɔrɛ na e baa nyiŋi mbe kanaŋ kikɛ be alubi; nsaa maŋ naŋ shin nɛ esa kikɛ e nyiŋi bumo be asheŋ kikɛ kuraa!

¹⁶ Ŋkpal manɛ so, e daa maŋ la esa kikɛ; e daa kɔrfɛ betirpo nɛ bematako nɛ betentaŋasepo nna a mɔ bumo.

¹⁷ E daa sha kebaasho basa kɔnɔ nna; amoso shin nɛ kɔnɔsho e pɛ mo alɛ gba. E daŋ kishi basa ga; amoso mo alɛ gba maaŋ nya nɛfa!

¹⁸ Kananɛ e bee buu mbe epiŋi a chɛrga ale damta na, aloŋ nɛ e bee shoduu basa. Ebɔrɛ e shin nɛ mbe shoduu na e laŋɛ mo gbagba so!

¹⁹ Ebɔrɛ e shin nɛ mbe eshoduu na e ki fanɛ epiŋi nɛ e bee buu karechɛ kikɛ m buu mo kikɛ so.”

²⁰ Enyɛnpe Ebɔrɛ na e naŋ ka bedoŋ nɛ baa wu ma kulubi nsaa malga a gbiti ma na kukɔ.

²¹ Enyɛnpetale Ebɔrɛ, chɛ ma to, fanɛ kananɛ fo nase kɔnɔ na; nseŋ mɔlga ma ŋkpal fo kasha nɛ k maa loge na so.

²² N la etirpo nɛ etentaŋasepo nɛ ebesa damta bɔlɔ ma kagbene to nna.

²³ Ma kebaawɔtɔ bee choŋ fanɛ kaaseso be kiyoyul nna; ŋko fanɛ afu ka bee kpata kusɔ firgisobi nna.

²⁴ Ma amuli bee yɔɔ nna ŋkpal akoŋ so; nɛ ma kikɛ nyɔr ŋ ki awibi.

²⁵ Bedoŋ baŋ wu ma gba, baa mushe nna nsaa fifi amu.

²⁶ O n Nyɛnpe nɛ ma Ebɔrɛ, chɛ ma to nseŋ mɔlga ma ŋkpal fo kasha nɛ k maa loge na so.

²⁷ Shin nɛ bedoŋ e pin fanɛ fo, Enyɛnpe Ebɔrɛ na, e la ma emɔlgapo.

²⁸ Bumo ere beeŋ tiŋ n shoduu ma, ama fo ere bee nɛfa ma nna. Nɛ bedoŋ bee kɔ ma gba, fo maaŋ shuli nɛ b pɔɔ ma so; fo alɛ beeŋ shin nɛ ma, nɛ n la fo kayɛrbi na, be kagbene e fuli ma.

²⁹ Fo e naŋ shin nɛ anishinyɔr e ki fanɛ asɔbuuso m buu basa nɛ baa wu ma kulubi na.

³⁰ O Enyɛnpe Ebɔrɛ, meeŋ boŋ nshɛ ŋ kpaŋ fo nseŋ di fo epaŋ ga ashi fo basa be nshɛrana to.

³¹ Ŋkpal manɛ so, fo e naa chɛ bekama nɛ asheŋ tir na to, nsaa mɔlga bumo ashi basa nɛ baa wu bumo kulubi na be enɔ to.