Nshɛ 108 - EBƆRƐ BE KAWƆL

Ebɔrɛ kaa wɔ anyi be kaman be asheŋ

¹ O Ebɔrɛ, ma kagbene kikɛ nɛ ŋ kɔ a ji kashenteŋ a sa fo. Meeŋ boŋ nshɛ nseŋ ta ma kagbene kikɛ ŋ kpaŋ fo.

² Meeŋ fara a laŋ ma ejaŋjilaŋ a sa fo pɔɛŋ nɛ epeŋi e pete.

³ O Enyɛnpe Ebɔrɛ, meeŋ di fo epaŋ nɛ ekama e nu fo asheŋ ashi efuli kikɛ so. Meeŋ boŋ nshɛ ŋ kpaŋ fo ashi basa to.

⁴ Ŋkpal manɛ so, k du fanɛ fo kasha, nɛ k maa loge na, choŋ ebɔrɛso nna; fo kashenteŋji malɛ bee chute awɔlpa nna.

⁵ O Ebɔrɛ, shin nɛ fo asheŋgboŋ e dii efuli ashi awɔlpa so kikɛ, nseŋ shin nɛ basa e wu fo kemaŋkura ashi kasawule ere kikɛ so.

⁶ Nu anyi be kekule nseŋ chɛ anyi to; ta fo eleŋgboŋ na m mɔlga anyi, nɛ an tiŋ ŋ kɔ m pɔɔ so. Saŋɛ na so fo basa shaso beeŋ nya bumo be amu.

⁷ O Ebɔrɛ, fo nase kɔnɔ ashi fo kakpa cheembi na fanɛ feeŋ barga kadegboŋ nɛ baa tre Shɛkɛm na to nseŋ chige Sukɔf be Ketaŋɛ na to n sa fo basa kagbenefuliso.

⁸ Fo yɛ, Giliad nɛ Manase be nsawule la feya nna; nɛ Efrayim la fanɛ fo kebɛlso be kusɔ kuŋkumuso, nɛ Juda malɛ la fanɛ fo kuwurkpabi.

⁹ Ama Mowab be kasawule bre la fanɛ fo kawie fɔr enɔ nna; Edɔm be kasawule malɛ la fanɛ kusɔ nɛ fee lɛ fo asɛbta a deŋi so a ŋini fanɛ k la feya nna. Fo alɛ bee yili Filistiebi to nna a ponte to a kaŋɛ fo ka kɔ m pɔɔ so.

¹⁰ O Ebɔrɛ, wanɛ e naŋ keta ma m ba kadegboŋ lempo na to; ŋko n juŋkpar ma n yɔ Edɔm be kasawule so?

¹¹ Fo maŋ naa juŋkpar anyi be benapo; fo kini anyi nna n lɛ a?

¹² Chɛ anyi to nɛ an kɔ m pɔɔ an doŋana so! Ŋkpal manɛ so, esa kikɛ maaŋ tiŋ ŋ kɔ m mɔlga anyi, nɛ mannɛ fo!

¹³ Fo Ebɔrɛ na e naa shin nɛ anyee kɔ a pɔɔ so, nsaa chichi an doŋana so a mata kasawule.